Алдағы бағытымызды айқындап тұр

Пікір • 20 Қаңтар, 2021

Алдағы бағытымызды айқындап тұр

20 рет көрсетілді

Мемлекет басшысы Қасым-Жомарт Тоқаевтың «Тәуелсіздік бәрінен қымбат» атты мақаласында айтылған ойлар халқымыз үшін аса маңызды. Бәріміз біліп отырғандай, көрші елдегі бірқатар азаматтар Қазақстанның территориясына, жер аумағына қатысты орынсыз пікір білдіріп, бұрыс көзқарас қалыптастырған болатын. Ел Президенті осы мәселені жан-жақты шешу, ақ-қараны ажырату мақсатында нақты саяси ұстанымын жеткізді.

Egemen Qazaqstan

Расында, Қазақстанның ауқымды территориясы ешкімнен сый ретінде берілген жоқ. Яғни ата-бабаларымыз кезінде бұл ұлан байтақ даланы найзаның ұшымен, білектің күшімен қорғап, өз ұрпақтарына аманаттаған болатын. Бұл аса маңызды мәселе. Сондықтан бұл мақала алдағы уақытта ел мен жерімізге көз тігемін деушілердің барлығына нақты жауап болды деп есептеймін. Мұндай жайттар қайталана бермеуі тиіс. Бірлігіміз бен тұтастығымызға, иелік етіп отырған жерімізге ешкімнің де көз тігуіне қақысы жоқ.

Әрине, біздің сөзі мен ісінде, әрекетінде алалығы жоқ көршілеріміз көп. Бәріне бірдей топырақ шашқым келмейді. Алайда кей елдердегі ниеті бұрыс некен-саяқ саясаткерлер мемлекетаралық достық пен ынтымақтастыққа нұқсан келтіріп жатады. Оған осы күні көзіміз анық жетіп отыр. «Аумақтық тұтастығымызға күмән келтіріп, тату көршілік қатынастарға сына қаққысы келетін кейбір шетел азаматтарының арандатушылық іс-әрекеттеріне ресми және қоғамдық деңгейде тойтарыс бере отырып, ағартушылық жұмыстарын ұстамдылықпен жүргізген жөн. Біз ұлттық мүддені аспен де, таспен де қорғауға дайын болуымыз қажеттігін тағы да баса айтқым келеді», деді Президент.

Қ.Тоқаев айтып отырғандай, ұлттық мүддені қорғауға халқымыз дайын. Оған ешкім де күмән келтірмейді. Мемлекет басшысының сөзімен айтатын болсақ, «Қазір кім не айтса да, біздің екіжақты келісімдермен бекітіліп, халықаралық деңгейде танылған шекарамыз бар. Енді оған ешкім дауласа алмайды».

Қасым-Жомарт Кемелұлы бір сөзінде мемлекеттік тілдің алдағы уақытта ұлтаралық тілге айналатыны анық екенін айтқан болатын. Президент осы ойын біз айтып отырған мақалада тағы да айқындап көрсетті. «Бүгінде мемлекеттік тілді білетін қазақтың да, өзге этнос өкілдерінің де үлесі едәуір артты. Қазақ тілін, шын мәнінде, бүкіл халқымызды біріктіруші факторға айналдырудың барлық құқықтық тәсілдері және кепілдіктері қалыптасты. Мәселе – ниетте. Ниеттің дұрыс болуы қазақ тілін меңгергісі келетін адамдарға да, осы мақсатқа жетуге жағдай жасайтын Үкіметке де байланысты», деді Мемлекет басшысы.

Мемлекеттік тілді білу әрбір отандасымыз үшін үлкен міндетке, қастерлі парызға айналуы тиіс. Бұл туралы Қасым-Жомарт Тоқаев «Мемлекеттік тілді білу – Қазақстанның әрбір азаматының парызы. Міндеті деп те айтуға болады. Осы орайда мен барша қазақстандықтарға, оның ішінде қазақ тілін әлі жете меңгермеген отандастарыма үндеу тастағым келеді. Жастар ағылшын тілін немесе басқа да тілдерді аз ғана уақытта меңгере алатынын көріп отырмыз. Тұтас буын алмасқан осы жылдарда қазақ тілін үйренгісі келген адам оны әлдеқашан біліп шығар еді. Халқымызда «Ештен кеш жақсы» деген сөз бар. Ең бастысы, ынта болуы керек», деді.

Расында, біздің жастарымыз шет тілін бір, бір жарым айдың көлемінде еркін меңгеріп кетеді. Сондай ұмтылыс, тілек пен ниет қазақ тілін үйрену кезінде де болуы керек. Мемлекеттік тіліміз халықты біріктіруші факторға айналатын күнге де бірте-бірте жақындап келеміз. Осы мақсатта түрлі қадамдар жасалынып жатыр. Әлі де жасалынатын болады.

Геннадий ШИПОВСКИХ,

Мәжіліс депутаты

Күннің маңызды және өзекті жаңалықтарын «Егемен Қазақстан» телеграм каналынан оқыңыз