Ауыл кәсіпкерлері бизнес-жобаларды дамытуға 6%-бен 5 жылға дейінгі мерзімге несие ала алады. Несиенің жылдық тиімді сыйақы мөлшерлемесі 6,7%-дан аспайды. Ауыл кәсіпкеріне Ұлттық банк белгілеген 100 АЕК-тен 5400 АЕК-ке дейінгі мөлшерде несие беру жоспарланған. Бағдарламаға қатысуға өтінім беру үшін Ауыл шаруашылығын қаржылай қолдау қорының облыстардағы филиалына бару керек. Қосымша ақпаратты www.fagri.kz сайтынан алуға болады.
Айта кетелік, Қазақстандағы БҰҰ Даму бағдарламасы, Экология, геология және табиғи ресурстар министрлігінің Орман шаруашылығы және жануарлар дүниесі комитеті мен Ауыл шаруашылығын қаржылай қолдау қоры қол қойған келісім нәтижесінде 2014-2015 жылдары «Эко-даму» несиелеу бағдарламасының бірінші кезеңі жүзеге асырылған болатын.
«Бұл ауыл шаруашылығын қаржылай қолдау қоры мен БҰҰ Даму бағдарламасы арасындағы алғашқы келісім емес. 2008-2013 жылдары «Табиғи орта» бірлескен жобасы іске асырылды, оның аясында ерекше қорғалатын табиғи аумақтарға жақын орналасқан ауылдардың 154 тұрғыны жалпы сомасы 221,4 млн теңгенің шағын несиесін алды. 2008 жылдан бері БҰҰ ДБ-мен ынтымақтастықта 561,6 млн теңгенің 221 жобасы қаржыландырылды, оның ішінде қордың қаражаты – 216,6 млн теңге. Мұндай бағдарламалар ауыл тұрғындарына қоршаған ортаны сақтай отырып, микробизнес ашуға және дамытуға, жаңа жұмыс орындарын құруға мүмкіндік береді», дейді «Ауыл шаруашылығын қаржылай қолдау қоры» АҚ басқарма төрағасы Жандар Омаров.
«Эко-даму» бағдарламасының негізгі бағыттарының бірі тең экономикалық мүмкіндіктерді қамтамасыз ете отырып, гендерлік теңдікті сақтау. Сондықтан бұл бағдарламада несие алушы әйелдерге басымдық беріледі. Мәселен, Алматы облысының Кербұлақ ауданында тұратын жеке кәсіпкер Батжан Омарханова 2002 жылдан бері мал шаруашылығымен айналысып келеді. Ол 2015 жылы Ауыл шаруашылығын қаржылай қолдау қорынан «Эко-даму» бағдарламасы арқылы 2 млн теңге несие алып, ұсақ мал басын көбейткен болатын. Қазіргі уақытта алған несиені өтеп беріп, кәсібін одан әрі дамытып жатыр.