Аймақтар • 19 Сәуір, 2021

Ескі үйлерді есіркеген жоба

75 рет көрсетілді

Апатты үйлерімен аты шыққан Жаңаөзенде «апатты» санатына жатпаға­нымен, ескі үйлердің де жағдайы жақсы емес. Кейбірінде орын алған оқыс оқиғаларымен бұл үйлер «апаттыға» сұранып тұр деуге де болады. Жуырда мұнайлы қаладан ескі үйлерге жөндеу жүргізу басталды деген жағымды жаңалық келіп жетті.

Тұрғындары күрт көбеюі салдарынан әлеуметтік мәселелері күн тәртібіне көтерілген Жаңаөзен қаласында 262 көп пәтер­лі тұрғын үй бар және оның ішінде 52 үй күр­делі жөндеуді қажет етеді. 1967-1971 жыл­дары пайдалануға берілген бұл үй­лерге содан бері күрделі жөндеу жасалмаған.

– Жаңаөзен қаласын әлеуметтік-эконо­мик­алық дамытудың кешенді жоспары аясында 2018 жылы Samruk-Kazyna Trust әлеуметтік жобаларды дамыту қорының де­меушілігімен 25 көп пәтерлі үйлерге күр­­делі жөндеу жұмыстарын жүргізуге 257 млн теңге қаражат бөлінген болатын. Осы қара­жаттың 74 млн теңгесі аталған тұрғын үй­лерге құрылыс-техникалық зерттеу жүр­гізуге, энергоаудит жасауға, жобалық-сме­талық құжат әзірлеп, ведомстводан тыс сараптама қорытындысын алуға жұм­салды. Сараптама қорытындысына сай, күрделі жөндеу жұмыстарының құны 1,6 млрд теңгені құрайды, – дейді Жаңаөзен қалалық тұрғын үй инспекциясы бөлімінің басшысы Сүйіндік Мұхамедов.

Оның айтуынша, қазіргі кезде бөлінген қаражаттың қалған бөлігіне, яғни 183 млн теңгесіне 3 көп пәтерлі тұрғын үйге күрделі жөндеу жұмыстары жүргізілуде. Жөндеу жұмыстары биыл мамыр айында аяқталады деп жоспарланған.

Күрделі жөндеу жұмыстары бары­сын­да көп пәтерлі тұрғын үйлердің тіреу конс­трукциялары, баспалдақтары, шатыры жаңартылып, ішкі инженерлік желілері толық ауыстырылып, сыртқы келбеті әрленіп, энерготиімді нысанға айналатындығы айтылуда. Сондай-ақ бұл өз кезегінде тұрғын үйдің пайдалану мерзімін ұзартуға ықпал етеді екен. «Жаңартылды» деген желеуді жамылып жылтырақ бояумен баттастыра салмай, жөндеудің сапалы жүргені маңызды.

Жергілікті атқарушы орган тарапынан да жөндеу жұмыстарының сапалы жүр­гізілуіне ерекше бақылау жасалуда, дейді құзырлы мекемедегілер. Сондай-ақ тұр­ғын­дар тарапынан да «Меншік иеле­рі бір­лестігі» құрылып, жөндеу жұмыс­та­рын өз қадағауларына алған. Күр­де­лі жөндеу жүргізіліп жатқан тұр­ғын үй­­лер қолданыстағы тұрғын үй заңна­ма­сы­­на сәйкес басқарудың жаңа фор­ма­ты­­на көшеді. Яғни пәтер иелері коо­пе­ра­­тив­і­нен «Меншік иелерінің бірлес­тігі» ны­­са­нында басқарылатын болады. Іске мен­шік иелерінің араласуы жөн­деу жұ­мыс­­­тары­ның сапасына деген сенім­ді арт­­тыр­­са, басқару форматындағы өзгеріс­­тер жөн­делген үйлердің келешегіне жауап­кер­­ші­лікті жоғарылатады деген ойға жетелейді.

Онсыз да біраз айқай-шуға себеп бо­лып, тұрғындарының наразылығын, тү­сін­бес­тігін тудырған апатты үйлердің сана­т­ын то­лық­тырмай, ескі үйлердің дер кезін­де жөндеуге іліккеніне қуанасың, енді олар «ескі» деген айдардан құтылатын бола­ды. Тек жұмыстың сапасы, нәтижесі қуант­сын дейік.     

 

Маңғыстау облысы

 

Соңғы жаңалықтар

Ақыретке дейінгі адалдық

Өнер • Бүгін, 10:23

Ұқсас жаңалықтар