Ғылым • 22 Сәуір, 2021

Жастарды стартап жобалар қанаттандырады

21 рет көрсетілді

Осыдан екі жыл бұрын Алматы облысының кәсіпкерлер палатасы мен Жетісу университеті бірлесіп, StartUp Academy ашқан болатын. Мұндағы мақсат жастар ара­сын­да­ғы кәсіпкерлікті дәріптеп, ғылымға негізделген әрі ин­но­вациялық әлеуеті зор стартап жобаларды дайындау еді. Бүгінде сол мұратқа толық қол жеткендей.

Жақында Zhetysu – Startup инновациялық идеялар мен жобалар байқауының қо­ры­тындысы шығарылды. Бай­қау­ға өңірдегі маңдайалды оқу орнынан 30 студент және Назарбаев зияткерлік мек­те­бі­нің оқушылары түрлі жоба­ла­рын ұсыныпты. Солар­дың ішінде жаңалығы мен өзек­ті­лігі, инвестициялық тар­тым­­дылығы, коммерциаланды­ру деңгейі мен өңір үшін әлеу­мет­тік-экономикалық ма­ңызы жо­ғары деген 9 жоба үздік деп та­нылған екен.

– Бүгінде жастар студент кезінен бастап кәсіппен айна­лыс­­қысы келеді. Олардың талабын шыңдау мақсатында университте Zhetysu – Startup академиясы ашылған бо­латын. Мұнда жастар биз­нес­тің алғашқы әліппесін үй­ре­­неді және өздерінің зерттеу жұмыстарын жүргізіп, на­рық әлемін зерделейді. Жас ға­лым­дардың инновациялық әлеуе­тін дамытып, олардың жоба­сының іске асуын қаржы­лан­дыру үшін университет стартап жобаларға байқау өткі­зіп тұрады, – дейді Жетісу университетінің басқарма төра­ғасы-ректор Қуат Баймырзаев.

Биылғы стартап жобалар байқауының бас жүлдесін жеңіп алған М.Беимбетова мен Ж.Жексенбайға 100 мың, 1 орын алған А.Есейқызы, Н.Ким, Ә.Танабаеваға 70 мыңға сертификат табысталды. Ал жобаға қатысқан басқа да студенттер ынталандыру сыйлықтарымен марапатталды.

Жалпы, Жетісу универ­си­­тетінде студенттерді эко­но­­ми­­­ка­ның жоғары техно­ло­гия­­лық секторын дамытуға ық­пал ету бағытында білім беру үрдісі қанат жайып келеді. Яғни қа­зір­гі білім берудің маңызды мін­деті инновацияға бет бұру бо­лып отыр. Бұл мақсатқа жету үшін оқу орнының қа­быр­ға­сын­да озық ғылыми-зерттеу жұмысы жасалуы тиіс.

– Экономикалық өсу мен адамдардың әл-ауқатының артуы озық білімге байланыс­ты. Ал озық білім мен ғы­лыми идеялардың иесі – адам. Адами капиталдың сапасын экономикалық өсіммен салыс­ты­руға болады. Демек, адами капиталға құйылатын инвес­ти­ция экономикалық өсуге ық­пал етеді. Бұл тұрғыда университет ұстаздары Білім және ғылым министрлігі жариялаған ғылыми жобалар байқауына жиі қатысып жүр. Биылдың өзінде алты әріптесіміздің еңбегі жо­ғары бағаланды. Бұл бір жағынан Жетісу ғылымының бір орында тоқтап қалмай, заман талаптарына сай жаңарып келе жатқанын аңғартады, – дейді Жетісу университетінің ғылыми жұмыстар жөніндегі проректоры Алефтина Бахтаулова.

 

Соңғы жаңалықтар

Алматы қаласында жер сілкінді

Аймақтар • Бүгін, 17:39

Мереке қарсаңында марапатталды

Аймақтар • Бүгін, 13:58

Ұқсас жаңалықтар