Ұжымдық монографияда институттың италиялық археологтармен бірлескен «Археологиялық контекстегі Сарыарқаның киелі ландшафты: генезис, типология, семантика» жобасы бойынша ғылыми-зерттеу жұмысының нәтижелері көрсетілген. Бұл – Сарыарқаның аумағы киелі кеңістік ретінде қарастырылатын алғашқы еңбек. Сарыарқа өңірі бай мұраға ие және төл тарихымыздағы алар орны айрықша. Институт жұмысының ғылыми-зерттеу нәтижелері және Ақмола, Есіл жағалауы археологиялық жұмыстарының 20 жылдық кезеңінде алынған жаңа материалдардың ауқымы тарихи интерпретациялар деңгейіне шығуға және Сарыарқаның даласын қазақ мемлекеттілігінің қалыптасуының этностық аумағы ретінде ұсынуға мүмкіндік береді.
«Тұсаукесерге музей мен мәдениет өкілдері кездейсоқ шақырылған жоқ. Себебі бұл жұмыс музейлердің ғылыми-зерттеу қызметі үшін үстел кітабына айналуы керек. Біздің міндетіміз әрбір қазақстандық өңірдің тарихын білуі, ата-бабаларымыз қалдырған бай мұраның ауқымын түсінуі үшін отандық ғалымдардың зерттеу материалдарын жұртшылыққа жеткізу. Бүгінде «Бозоқ» тарихи-мәдени орталығы ғалымдардың ғылыми ізденістері үшін тұрақты жұмыс істейтін түрлі форматтағы диалог алаңына айналды. Біз институттың зерттеулері жұртшылық арасында сұранысқа ие болатынына сенімдіміз», деді К.Ақышев атындағы Археология ғылыми-зерттеу институтының директоры Марал Хабдулина.
Тұсаукесерге жетекші археологтар, этнологтар, барлық өңірдің мұражай қызметкерлері, сондай-ақ ғылыми-зерттеу институттарының қызметкерлері қатысты. Дөңгелек үстел барысында монография авторлары М.Хабдулина Сарыарқа – Қазақстанның киелі орталығы тақырыбында, аталған өңірдің археологиясын зерттеудегі халықаралық ынтымақтастық тәжірибесі бойынша Жан Лука Бонора, институттың дала бағыттары жөнінде Д.Тлеуғабұлов, Қараөткелдің қаланың киелі нысаны ретінде В.Кошман баяндама жасады.
