Жас ұрпақтың рухани азығы

Композитордың өмірі мен шы­ғармашылығына негізделген қойылым туралы белгілі композитор Жоламан Тұрсынбай: «Спектакльде Шәмші әндерінің көп дауысты хормен шырқалуы жүрек тебірентті. Қазақта он мың ән, бес мың күй бар десек, бұл қойылымның да руха­ни қазы­на­мызға қосылған тың дүние еке­нінде дау жоқ. Қойы­лымға Шәм­шінің ең мағы­налы, жақсы ән­дерінің топ­тастырылғаны сүй­сінтті. Сөз бен ән домбыраның қос ішегіндей әсем үндесіп тұр. Өз басым Шәм­ші ағамызбен көп ара­ласқан адаммын. Спектакльден қа­зақ «вальсінің королі» атанған атақ­ты композитордың сан қырлы бейнесімен қайта қауышқандай күй кештім», деп жүрекжарды лебізін білдірді.

Спектакльде орындалатын Шәм­ші әндерінің қай-қайсысы да автордың өмірінде орын алған әртүрлі оқиғаны баяндайды. Тұла бойы әнге айналған тұлғаның әсерлі әлемі көрермен көңілін баурап әкетуімен құнды. Жүректерге сезім ұялатып, махаббат отын маздатқан мюзиклдің кейінгі жастарға берер тағылымы мен тәрбиелік мәні өте зор. Мәдина Омарова жазған мюзиклді труппа әртістері екі  айдан астам уақыт дайындаса, ал спектакльдің режиссері, Қазақстанның ең­бек сіңірген қайраткері Асхат Мае­миров шығармашыл тұлғаның бейнесі мен өнер жолын халыққа шы­найы жеткізу мақсатында композитордың туған жерін аралап, көп мағлұматқа қанығып қайтқанын алға тартады. Ком­позитордың шығармашылық қор­жынында 300-ге жуық ән сақ­талған десек, сахналық қо­йы­лымға олар­дың ең көп та­раған үздіктері ғана таңдап алынған. Спектакльдің бір ғана Шәмшімен шектелмей, сахнаға үш бірдей Шәмшіні қатар алып шығуы және әндердің оркестр сүйемелдеуімен жанды дауыста орындалуы қойылымның басты ерекшелігі саналады.

Айта кететін жайт, Тәуел­сіз­діктің 30  жылдық ме­рекесі құр­метіне әзірленген қойы­лымның премьерасы наурыз айында өт­кен болатын. Белгілі тұлғаның кү­рескер бейнесін  Аман Ғұмаров, Ернар Мұхамбетов, ғашық кезін Са­­ламат Мұқашев, Ермахан Ай­махан, ал композиторлық қы­рын Сұлтан Кеңшілік, Азамат Болатов сынды талантты жас­тар сомдап, композитордың өмір жолында кезіккен қиындық­та­рын, қоғамға деген азаматтық көз­қарасын, теңіздей тулаған ішкі алапат сезімін, ғашықтық сырларын әуезді әндерімен әсем жеткізе білді. Сол сияқты  Ақан сері, Ахмет Жұбанов, Мұқа­ғали Мақатаев, Роза Бағ­ланова, Әбілахат Еспаев, Тө­леген Айбергенов, Жұмекен Нәжі­меденов сияқты қазақ мәдениеті мен өнерінде орны биік қайраткер тұлғалар бейнесінің бір арнаға шоғырланып, қойылымнан көр­і­ніс табуы – бұрын-соңды пайда­ланылмаған тың тәсіл, өте сирек құбылыс. 

Музыкалық жас көрермен
театры репертуарындағы «Шәм­ші»­ мюзиклі ел болашағы – жас буынның өнерге деген сүйіспен­шілігін арттыруда орасан зор іс тындырып отыр деуге толық не­­гіз бар. Өскелең сана интернетке телмірген заманда кейінгі ұр­пақты төл құндылықтармен сусындатып, жастарымыздың бойына отан­шыл­дық сезімін ұялатуда театр өнері алдында үлкен міндеттер тұр. Осы жағынан алғанда, «Шәмші» спек­таклі жас ұрпаққа киелі өнердің таза ауасын жұтқызуды мұрат тұ­тады. Театрдың Камералық ор­кес­трі сүйемелдеуімен орын­далған «Жан аға», «Арыс жағасында», «Әнім сен едің», «Қайықта», «Өмір-өзен», «Бақыт құшағында», «Сағынышым менің», «Қуаныш вальсі», «Ақ маңдайлым», «Сыған әні», «Ақан сері», «Ана туралы жыр», т.б. әндер көңіл көкжиегін көр­­кем­дікке бөлейтін тұнық бастау­лар іспетті.

Мәдениет пен өнер қыз­меткер­лері күні құрметіне ұсы­нылған қойылымды дүлдүл әнші Димаш Құдайберген, халықаралық 71-ші Канн фес­тивалінің лауреаты, «Ника» жүл­десінің иегері Самал Еслямова сынды қазақ өнерінің туын көтеріп жүрген дарын ие­ле­рінің келіп тамашалауының өзінде үл­кен мән бар. Өмір жолы өз өне­ріңе құрмет көрсетуден басталады.