Вакцина алғандар пәтер мен көлік ұтысына қатыса алады

Осы ретте елордада «Вакцина ал – машина ұтып ал» акциясы бастал­ды. 23 маусым мен 31 тамыз аралығын­да «Mega Silk Way» СОО-да Сovid-19 вакцинасының бірінші компонентін алатын қазақстандықтар «Астана Моторс» компаниясынан Hyundai Accent автокөлігін ұтып ала алады. Акцияның бас серіктесі – «Астана Моторс» ҚМК. Финалдық ұтыс ойы­нын 5 қыркүйекте «Mega Silk Way» СОО Instagram арқылы тікелей эфирде өткізеді. Сонымен қатар апта сайын тұрмыстық техника, түрлі сер­тификаттар және тағы басқа да сыйлықтар ойнатылады.
Акцияның мақсаты Қазақстанда вакциналау қарқынын арттыру екені түсінікті. Мұндай акциялар түрлі ел­дерде сәтті өтіп жатыр. Жақында Польша, Таиланд, АҚШ, Ресей, Моң­ғолия, Сербия, Индонезия, Қы­тай, Венгрия, Израиль елдерінің үкі­меттері вакциналанғандар арасында автокөлік ұтыс ойынын өткі­зуді қолға алған еді.
«Вакцина ал – машина ұтып ал» акциясы туралы толық ақпаратты mega.kz сайтынан және MEGA-ның әлеуметтік желілердегі ресми ак­каунттарынан алуға болады.
Сонымен қатар Нұр-Сұлтан қала­сының әкімі Алтай Көлгінов Instagram парақшасында вакцина салдырғандар арасында пәтер ұтысы ойнатылатынын мәлімдеді.
«Коронавирустың таралуын бол­­дырмау және вакциналау жүр­гізу бойынша штаб отырысын өт­кіздім. Орынбасарларыма, бас­қарма басшыларына және аудан әкім­деріне жетекшілік ететін салаларда вакциналаудың маңыздылығы мен қажеттілігін жоғары деңгейде түсіндіру үшін жекелеген жауап-­
­кершілік жүктелді. Ұжымдық имму­нитетті қалыптастыру үшін қала халқының 60%-дан астамы вакциналануы қажет. Санитарлық дәрігер­лер қосымша карантин шектеуле­рі ту­ралы жаңа қаулы дайындауда: қауіп-қатер тобы үшін вакцина алу міндетті, вакциналанбаған қыз­меткерлерді қашықтан жұмыс істеу режіміне көшіру сияқты талап қойы­лады. Қала тұрғындарын ынталандыру үшін бағалы сыйлықтардың ұтыс ойынын енгізіп жатырмыз. Ал жаңадан вакциналанғандар арасында инвесторлар есебінен екі бөлмелі пәтер ойнатпақпыз. Ұтыс ойынына қала емханаларында немесе сауда-ойын-сауық орталықтарында екпе алған қала тұрғындарының бәрі қа­тыса алады. Ал пәтер ұтысының ­ойынына осы жылдың 25 маусымы мен 31 тамызы аралығында вак­цинаның бірінші компонентін алатын 18 жастан асқан қала тұрғын­дары қатыса алады. Қыркүйек айы­ның басында нәтижесін жариялаймыз. Конкурстың әділ өтуі және вак­ци­наланғандарды толығымен қам­ту үшін IT-қоғамдастықты жұмыл­ды­рамыз», деп жазды елорда әкімі.