Жоба жақсы нәтиже көрсетіп, өзінің қажеттілігін дәлелдеді. Сондықтан, биыл ҮЕҰ академиясы жаңартылған және терең білім форматын ұсынды. Нәтижесінде, сәуір айында таныстырылған арнайы ғылыми зерттеу негізінде ең қажетті пәндерге назар аударатын бірегей білім беру бағдарламасы құрылды. 15 маусым күні ҮЕҰ-ға арналған білім беру бағдарламасы басталды. Онда 8 модуль қарастырылған, оның әрқайсысында 5 тренинг бар.
Оқыту тақырыптарының ауқымы өте кең, оған маркетинг және PR, фандрайзинг, жобаларды басқару, ақпараттық технологиялар, әлеуметтік жобалау және тағы басқалар кіреді. Оқудың қаншалықты тиімді болғанын түсіну үшін оқу басында және соңында өлшемдер жүргізіледі.
«Қоғамшылдар, әсіресе, әлеуметтік салада жұмыс істеушілер өз білімін үнемі жаңартып отыруы керек. Өкінішке қарай, Қазақстанда қазір ҮЕҰ білім беру проблемасына алаңдайтын ұйымдар жоқ. Сондықтан, біз бұл функцияны өзімізге жүктедік. Сонымен қатар, біз қызмет саласын мұқият зерттеп, сауалдама жүргіздік. Оның қорытындысы бойынша қатысушылардың басым көпшілігі, яғни, 84%-ы тегін оқуға ниет білдірді. Сонымен қатар, біз оқу бағдарламасына тек пайдалы болатын пәндерді енгіздік», дейді Азаматтық бастамаларды қолдау орталығы басқармасының төрағасы Лима Диас.
Тыңдаушылар онлайн режімде тәжірибелі спикерлермен жұмыс істеп, жаңа және пайдалы білім мен дағдыларды алып, сонымен бірге, бизнес-модельді әзірлеуге дейін өз идеяларын пысықтайды. Жобаға қазақстандық және халықаралық бизнес-жаттықтырушылар, кәсіби коучтер, бірегей жеке бағдарламалардың авторлары тартылған.
«Өзімізге жетіспеген бағыттар бойынша білім алып жатырмыз. Білімді тегін алу өте маңызды. Жаттықтырушылардың бізге берген ақпараттары қиындықсыз игерерліктей түсінікті. Алған білімді өз ұйымыма қолданып жүрмін және біздің жұмысымыздың тиімділігін арттыру үшін нені жақсартуға болатынын талдап көрдім», дейді «Береке» қоғамдық қоры тарапынан қатысушы Галина Шеенко.
Жыл соңына дейін академия-
да ҮЕҰ-ның 800 өкілі білім алмақ. Еске сала кетейік, білім беру бағдарламасынан басқа, маусым айының басында үкіметтік емес ұйымдар өкілдеріне арналған әлеуметтік кәсіпкерлік онлайн-мектебі де іске қосылды, ол қазақ және орыс тілдерінде үш кезеңде өтеді. Бірінші кезең қалыптасып, оның тыңдаушылары оқудан өтуде, ал екінші және үшінші кезең өз жұмысын шілде және тамыз айларында бастайды, оған қабылдау әлі де жүргізілуде.
Оқудың екінші легі 28 маусымда (қазақ тілінде), үшіншісі 19 шілдеде (орыс тілінде) басталады, сондықтан, қазақстандық ҮЕҰ өкілдерінің оқуға тіркелу мүмкіндігі бар. Жалпы, жобаның барлық кезеңінде 160 ҮЕҰ өкілін оқыту жоспарлануда.
«Егемен-ақпарат»
