Елорданың даму динамикасы тұрақты

Эпидемиялық ахуал күрделі

Індет қаупі төнген шақта ең алдымен осы Нұр-Сұлтан қала­сында жедел шешімдер қабылданып, нақты іс-шаралар қолға алынғаны белгілі. Дәл қазір елордада эпидемиялық жағдай ушығып тұр. Коронавирустың жаңа штамы ахуалды одан сайын күрделендіріп жіберді. Соған сәйкес денсаулық сақтау жүйесі айтарлықтай жаңғыртылды. Мемлекет басшысының тапсырмасына сәйкес, денсаулық сақтау саласын қолдауға қомақты қаражат бөлінді. 14 стацио­нардағы төсектік орын саны 2 мыңға жетті, оның 1 400-інде (75%) науқастар жатыр. Күн са­йын стационарларға 200-ге жуық пациент келіп түседі. Ал зертханалар саны 2-ден 27-ге дейін өсті. Тәулігіне 10 мыңға дейін зерттеу жүргізіледі.
«Қазір эпидемиологиялық жағдай күрделі күйінде қалып отыр. Маусым айының басында ауру жұқтыру саны төмендеген еді, тәу­лігіне шамамен 100-110 жағ­дай анықталатын және «қы­зыл аймақтан» шығуымыз керек еді. Бірақ «Дельта» штамы пай­да болып, қазір ауру күрт өс­кенін байқап отырмыз. Бүгін 678 жағдай тіркеліп отыр. Санитарлық дәрігерлер қосымша шектеу шараларын қабылдады. Бұл – мәжбүрлі шара. Бүгінде вакциналау белсенді жүріп жатыр. Өздері келіп, вакцина алған саналы азаматтарға алғыс айтамын, бұл қосымша ұжымдық иммунитетті қалыптастырады және бірінші кезекте азаматтардың өздерін және басқаларды қорғайды. Барлық емханада, жеке және мемлекеттік амбулаториялық мекемелерде вакциналау пункттері ашылды. Ірі сауда орталықтарында вакциналау пункттері жұмыс істейді. Осы сауда орталықтарының кәсіп­керлеріне, басшылары мен құ­рыл­тайшыларына алғыс айтқым келеді. Адамдарды вакцина­лауға ынталандыру үшін бағалы сый­лық­тар ұсынылды. КВИ-мен кү­ресудің вакциналаудан басқа жолы жоқ. Медицина қызметкерлерінің 90%-дан астамы, коммуналдық қызметтердің 70%-дан астамы вакцина салдырды», деді А.Көлгінов.

Биыл 10 мың әлеуметтік пәтер салынады

Нұр-Сұлтан қаласында соңғы үш жылдың ішінде қолжетімді тұрғын үй саны 5,5 еседей ұлғайды. Қала әкімі қолжетімді баспана құрылысының қарқыны, тұрғын үй сертификатының көлемін ұлғайту және қатысушылар санатын кеңейту туралы атап өтті.
«Қала тұрғындарының ма­ңыз­ды және өзекті мәселелерінің бірі – тұрғын үй. Мемлекет бас­шысының тапсырмасы бо­йынша қолжетімді тұрғын үй құрылысы көлемін ұлғайтуды жүйелі жүргізіп жатырмыз. Мысалы, 2018 жылы 1 800 әлеуметтік пәтер, ал 2019 жылы 2 900 әлеуметтік пәтер салынса, 2020 жылы осындай 7 мыңнан аса пәтер салынып, пайдалануға берілді. Биыл бұл көрсеткішті 10 мыңға жеткізуді жоспарлап отырмыз. Жақында әлеуметтік аз қамтылғандар арасында кезекте тұрған отбасыларға 400-ге жуық пәтер кілті беріледі. Әлеуметтік тұрғын үйлер құры­лысы қаланың барлық ауданында жүргізіліп жатыр. Мысалы, Отау, Жағалау шағын аудандарында, Пригородный елді мекені, Ш.Құдайбердіұлы, Р.Қошқарбаев көшелерінде, жаңа вокзал ауданында салынып жатқан үйлер баршылық», деді А.Көлгінов.
Бұған қоса Нұр-Сұлтан әкі­мінің тапсырмасы бойынша тұр­ғын үй сертификатының сомасы 1 млн теңгеден 1,5 млн теңгеге дейін ұлғайтылды. Қазақстандық тұрғын үй компаниясының (ҚИК) бағдарламасы бойынша қатысушылар санаты кеңейтілді. Енді бұл игі бастамаға медицина қызметкерлері, педагогтер, әлеуметтік қызметкерлер, өрт сөн­дірушілер, тәртіп сақшылары, мәдениет және спорт қайраткерлері қатыса алады.
Сондай-ақ Елбасының бастамасымен қолға алынған «Жұмыс істейтін жастарға арналған сатып алу құқығынсыз жалға берілетін» бағдарламасы биыл да жалғасады. Осы бағдарлама аясында жыл соңына дейін тағы 1 мыңнан аса жас баспаналы болады. Осы мың пәтерден бөлек биыл жыл басында 350 жасқа пәтер кілті тапсырылған еді. Сол сияқты 2021 жылы жастар үшін арнайы тұрғын үй бағдарламасы (әлеуметтік кредиттеу) іске қосылады.
Сонымен қатар 2021 жылы құрылысы ұзаққа созылған үй­лер саны 57-ге қысқарады. Проб­лемалы көппәтерлі тұрғын үй ке­шен­дерінің мәселесі шешіліп, көп­тен күткен пәтер кілтін 7 мыңнан аса үлескер алады. Осылайша, екі жыл­дың ішінде «сақалды» құ­­ры­­­лыс саны екі еседен көп қыс­қара­ды.

15 мектеп пайдалануға беріледі

Нұр-Сұлтанда қала тұрғын­да­ры­ның жыл сайынғы өсуі еске­ріле отырып, ірі мектептердің құрылысы жүргізіліп жатыр. Биыл 15 мектеп салынады. Осы­лайша 40 мыңнан аса оқушы жаңа білім ошағында оқиды. Бұл 2020 жылмен салыстырғанда екі есе, ал 2019 жылдан төрт есе көп.
«Елордада жыл сайын ішкі көші-қон есебінен де, туу көрсет­кіші есебінен де қала тұрғын­дарының саны өсіп келеді. Мы­салға 2010 жылы қала мектеп­терінде 74 мың оқушы білім алса, қазір 193 мың оқушы білім алуда. Жыл сайын 1-сынып оқушыларының саны өсіп келеді. 2019 жылы 5,5 мың­нан аса түлек мектеп бітірсе, 1-сыныпқа 24,5 мыңға жуық балдырған келді. Ал 2020 жылы 6,6 мың түлек болса, 1-сыныпқа 21 мың­нан аса бала келді. 2030 жылға қарай Нұр-Сұлтанда 400 мыңға жуық оқушы болады деп ойлап отыр­мыз. Әрине, бұл тамаша көр­сеткіш, тиісінше мектептердің кө­бірек ашылуын талап етеді. Біз ірі мектептердің құрылысына көштік. Білім мекемелері қаланың барлық ауданында, соның ішінде тұрғын үй массивтерінде салынып жатыр. Қажеттілігі бар аудандарға ерекше назар аударылады», деді әкім.
Алдағы бес жылға елордада 67 мектептің құрылысы жоспарланып отыр. Оқу орындарының құрылысы жеке инвестицияларды тарту есебінен де жүргізілуде. Елорда әкімінің тапсырмасы бойынша болашақ педагогтерді ынталандыру мақсатында гранттар саны ұлғайтылды. Жыл сайын орта арнаулы оқу орындарында оқуға кемінде 800 грант, ал жоғары білім алуға тағы 300 грант бөлу жоспарланып отыр.

143 мың тұрғын газға қосылады

Елордада газ тарату желі­ле­рінің құрылысы жалғасуда. Биыл Нұр-Сұлтанда тағы 143 мың тұрғын үшін газ қолжетімді бо­лады. Бұл өткен жылмен салыс­тырғанда үш есе көп.
«Газдандыру – Елбасының ауқымды жобасы. Бұл жоба экологияны едәуір жақсартуға мүмкіндік береді, өйткені жеке сектор тұрғындары үйін кө­мірмен жылытпайды, нәти­жесінде қауіпсіздік артады, қала тұрғындарының өмір сүру жағ­дайы жақсарады. Мысалы, осы жылдың маусым айында Көктал-1 тұрғын алабы газға қосылды, осылайша тағы 2 600 үй көгілдір отынмен қамтамасыз етілді. Біз сыртқы желілерді жүргізгеннен кейін тұрғындар оны үйдің ішіне өткізуі керек. Сонымен қатар біз Оңтүстік-Шығыс тұрғын алаптарына, Агроқалашық (2020 жылы қосылмаған бөлік), Про­мышленный аудандарына газ тарату желілерін салуды жал­ғас­тырамыз. Сондай-ақ «ҚазТрансГаз Аймақ» АҚ Күйгенжар, Мичу­рино, Интер­национальный елді ме­кендерінде газбен жабдықтау желілерінің құрылысын жүргізуде. Биыл тағы 317 шақырым газ тара­ту желісін саламыз, оның 200 шақырымы бірінші жарты­жыл­дықта салынды. Осылайша жаңа жылыту маусымында тағы 7 тұрғын үй алабы газға қосылуға мүмкіндік алады. Мысалы, өткен жылы 43 мың тұрғын газға қосылды. Газ­дан­дыру процесі Мемлекет бас­шысының бақылауында», деді әкі­мі А.Көлгінов.
Сондай-ақ өткен жылы газ тарифі төмендетілді. Газдың бір текше метрінің бағасы 45 теңгеден 34,6 теңгеге дейін төмендеді. Бұрын бір текше метр үшін 60 теңге бағасын белгілеу болжанған.
Бұдан басқа жылу электр орта­лықтарын жаңғырту жұмыстары жал­ғасуда. ЖЭО-1 және ЖЭО-2-дегі төрт су жылыту қазандығы газ­ға ауыстырылды, қалған қазан­дық­тар осы жылдың соңына дейін газға көшіріледі.