Әлем • 12 Шілде, 2021

Жаһандық салық жолға қойылды

G20 елдері жаһандық белсенді компаниялар үшін ең төменгі салықты – 15 пайыз мөлшерінде енгізуге келісті.

«Үлкен жиырмалық» елдерінің қаржы министрлері тарихи салық реформасына Венециядағы кездесуде келісті. Бұл шешім Amazon, Facebook секілді ірі компаниялардың қызметіне тікелей әсер етпек. Келісім бір ай бұрын Корнуоллдағы G7 елдерінің басшылары қол қойған жоспарды одан әрі пысықтай түсті. Ең ірі әрі қарқынды дамып келе жатқан экономикаға ие 19 ел мен Еуропалық Одақ атынан G20 қаржы министрлері Венециядағы екі күндік кездесуден кейін «жаһандық салық» ұсынысын қолдайтынын жариялады.

Ел үкіметтері көп елде бірдей жұмыс істейтін жаһандық компанияларға салық салу мәселесімен ұзақ уақыт күресіп келеді. Мұның маңызы Amazon және Facebook сияқты ірі технологиялық корпорациялардың көбеюіне орай арта түсті. Қазіргі уақытта бұл компаниялар корпоративтік салық төмен елдерде жергілікті филиалдарын ашып, сол жердің заңына сәйкес төмен салық төлеп келеді. Осылайша олар табыстары басқа елдерден түсіп жатса да, салықты өздері тіркелген елдің төмен мөлшерлемесімен өтейді. Бұл еш заңға қайшы келмейді.

Жаңа келісім ірі компанияларды енді салықты кірісін жариялайтын елде ғана емес, өз тауарларын немесе қызметтерін ұсынатын өзге елдерде де көбірек салық төлеуге ынталандыруды көздейді. Сондай-ақ баршаға бірдей төменгі салық мөлшерлемесі өзге елдердің салықты төмендетіп, бір-біріне бәсеке туғызбауына көмектеседі. Десе де, бұл келісімді елдердің барлығы бірдей қолдап отырған жоқ. Мәселен, Ирландия оған әлі қосылмаған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз