Елена Сергеевнаның көркемдік дүниетанымының ерекшеліктерін оның қолтаңбасынан анық аңғаруға болады. Суретшінің жан дүниесінде әлем туралы және өзінің сезімдері жайлы әр түрлі тілдерде сөйлей алатын ақын өмір сүреді дерсіз. Туындыгердің Ә.Қастеев атындағы өнер музейінде ашылған «Көз тартар шынайы әлем» көрмесі тіршілік бояулары мен адам көңілінің ішкі ырғақтарын шынайы жеткізе білген. Оның өмірі өнерден өріс тауып, қоршаған әлемнің сұлулығына тәжім етумен қаныққан.
– Суретші шексіз таңдану мен табиғат көріністерінің байлығына сүйсіну дарынына ие. Оның қылқаламы бүкіл тіршілік бөлшектері мен мәңгілікті, тіпті бір сәттік бояулардың өзін ұстап алуға және жазып алуға ықыласты. Суретші үшін барлық нақтылық қайталанбас сүйкімділікте жатыр. Бейсембинова алма, өрік бұтағын немесе сәлдегүл сұлулығын көрсету арқылы, өзінің жарық әлемге деген сүйіспеншілігін аңғартады. Ол не жазса да жанымен жазатын шебер. Көрмеге музей қорынан және автордың жинағынан алынған 90-нан астам туынды қойылды, – дейді көрме жетекшісі Күлжазира Мұқажанова.
Елена Бейсембинова Саратов қаласында дүниеге келген. Мәскеудің жоғары көркемдік-өнеркәсіптік училищесін (бұрынғы Строгановское) бітірген.
Оқуды бітіргеннен кейін, жұбайы Арсен Бейсембиновпен бірге Алматыға келді. Сол кезден бастап оның өмірі мен шығармашылығы Қазақстанмен, дәлірек айтсақ, Алматымен тығыз байланыста. Еске салсақ, Елена Бейсембинова әйгілі кеңестік суретші Татьяна Яблонскаяның қызы. Яблонскаяны заманында тұтас ТМД-ға танымал етіп, түрлі журналдардың мұқабасына жаппай жарияланған «Таңертең» деп аталатын картинаның басты кейіпкері де қызы Елена. Аталған туынды туралы газетіміздің 2018 жылдың 18 маусымындағы санында «Таң шапағына шомылған таныс қыз» атты мақаламызда кеңірек жазған болатынбыз.
АЛМАТЫ
