Қарағанды өңірі тарапынан болған көмекті ұйымдастыру ісінің басында облыстың бас имамы Өмірзақ қажы Қазкенұлы бастаған дін өкілдерінің жүргенін айта кеткен жөн. Маңғыстауда мал қырылып жатқанда, бұған бейжай қарамаған жамағат арнайы қайырымдылық акциясын ұйымдастырып, жұрттан қаражат жинады.
– Жұмыла кіріскеннің арқасында біз Маңғыстау облысының Шетпе және Бейнеу аудандарына әрбіріне 1500 тюктен тиелген жүк көліктерін жөнелттік, – дейді бас имам.
Жалпы алғанда, дін өкілдерінің үндеуіне шын пейіл танытқан жамағат аз ғана күннің ішінде 2,7 млн теңге жинап, оны шөп сатып алуға жаратқан еді. Мұндай қайырымды іске құлшына кіріскендердің бірі қоғам белсендісі Марат Түсіпов болды. Ол өзінің туған жері Шет ауданындағы жерлестеріне үндеу тастап, оларды игі іске жұмылдыра білді. Соның нәтижесінде қайырымды жандар төрт вагонды көк шөпке толтырып, Маңғыстау облысына жіберді.
Арқа төсінен дер кезінде жеткен мал азығын қабылдап алған маңғыстаулықтар алғыстарын бейнебайланыс арқылы жеткізді.
Иә, Маңғыстау өлкесіне вагон-вагон болып жеткен шөптің негізі еркекшөп пен жоңышқадан тұрған еді. Мұндай мал азығы шаруашылықта өте құнарлы саналады. Осы орайда шөптің осындай түрлерін жинауға облыстық «Қайрат» ұлттық және ат спорты түрлері мектебінің басшылығы кеңес бергенін айта кеткен жөн.
Маңғыстауға көмек беру ісінің басы-қасында жүрген белсенді азамат, Қарағанды облыстық «Рухани жаңғыру» жобалық кеңсесінің басшысы Айтбай Жұмағұл жамағат жиған қаражатқа сатып алынған шөптің кезекті партиясы жөнелтілгенін мәлімдеп, осы шаруаға атсалысқан қайырымды жандарға алғыс білдірді.
Қарағанды облысынан жөнелтілген шөп Маңғыстаудың шойын жолдан алыс, ең шеткі Бозащы түбегіндегі Тұщықұдық, Шебір, Қызан, Ақшымырау ауылдарына жеткізіліпті. Мал азығы әр ауылға 120 престен келіп, көмекке мұқтаж отбасыларға таратылған.
Арқа өңірінің азаматтары Маңғыстау облысына көмектің алдағы уақытта да жалғасын табатынын айтады.
Қарағанды облысы
