«Токиодағы Олимпиада ойындарына Қазақстаннан 93 спортшы қатысты. Жеңіске деген ерік-жігер мен шеберлікті көрсеткен спортшыларға алғыс айтамын. Олимпиаданың қола жүлдегерлерін құттықтаймын, бұл олардың көп күндік қажырлы жаттығуларының әсерлі нәтижесі», деп жазды Мемлекет басшысы Twitter парақшасында.
Сондай-ақ, Президент ұлттық команданың қорытынды нәтижесі – 8 қола медаль және жалпы командалық есепте 83-ші орын - Қазақстанның спорттық әлеуетіне және мемлекет спортты дамытуға қосқан қомақты қаражатына сәйкес келмейтінін қосты.
Қасым-Жомарт Тоқаев Парижде өтетін келесі ойындарда азаматтарымыздың үмітін ақтайтын нәтижелерді көрсету үшін Токио Олимпиадасынан дұрыс сабақ алу қажеттігін атап өтті.
«Ұлттық құраманың Олимпиадада өнер көрсетуі спорт сияқты маңызды саладағы шұғыл, тиімді реформалардың пайдасын көрсетеді. Бұқаралық және балалар спортын дамытуға назар аударып, осы негізде әлемдік аренада көрнекті табыстарға жетуге ұмтылу керек», деп түйіндеді Президент.
