Бұл өз кезегінде жаңа саяси маусымды жаңа міндеттер күтіп тұрғандығын, олардың жүзеге асырылуына биліктің барлық тармағы жауапты екендігін аңғартады және халықтың орталық мемлекеттік органдардың жұмысын бағалауы көп жағдайда Жолдауда қойылған тапсырмалардың тиісті деңгейде орындалуымен тікелей байланысты.
Биылғы Жолдаудың басты өзегі былтырғы жылдан өршуін тоқтатпай тұрған пандемиядан кейінгі экономикалық даму, халықтың әл-ауқатын әрі қарай да жақсартуға байланысты, жаңа жағдайдағы Қазақстанның іс-қимылдарына жан-жақты көңіл бөлініп, дамудың бір-бірімен тығыз байланыстағы басым бағыттары ұсынылды.
Мемлекет басшысы еліміздің стратегиялық мақсаты ретінде Орталық Азия аймағындағы көшбасшы рөлін нығайту, әлемдік экономикада өз орнын айқын бекіту деп атап өтуі осы бағыттағы тәуелсіздіктің 30 жылында жеткен жетістіктерді одан әрі жетілдіру, қазіргі жаһандық саясатта қалыптасқан ахуалға уақтылы, жедел және кәсіби түрде тойтарыс беру қажет екендігін көрсетеді.
«Ауғанстандағы жағдай, жаһандық шиеленістің артуы қорғаныс-өнеркәсіптік кешен мен әскери доктринаны қайта жүктеу міндетін қойды. Қорғаныс қабілетін нығайту, тиімділікті арттыру, қатерлерге қарсы әрекет ету де мемлекеттік маңызы бар басымдықтарға айналуға тиіс», деді Қ.Тоқаев Қазақстан халқына жыл сайынғы Жолдауында. Осыған дейінгі Әскери доктрина 2017 жылы бекітілген болатын.
Ауғанстандағы қазіргі ахуал жалпы әлемнің, соның ішінде қазақстандық қоғамның да алаңдаушылығын тудыруда. Бұл елде бейбітшілік пен тұрақтылықтың орнауына Орталық Азия аймағы елдері мүдделі. Айта кетерлігі, болып жатқан оқиғалар Қазақстанға тікелей қауіп төндірмейді, бірақ, әрине, олар белгілі бір тәуекелдерді тудырады.
Бұл өз кезегінде еліміздегі жағдайдың күрделі сипатта өрбуіне дайын болуын талап етеді, Қазақстанның және аймақтың қауіпсіздігіне сыртқы сын-қатерлерді модельдеудің өзектілігін байқатады. Қорғаныс саласында олқылықтардың бар екендігін таяу арадағы Жамбыл облысында болған оқиға да айқын көрсетті.
Әсел НАЗАРБЕТОВА,
Қазақстан Президенті жанындағы ҚСЗИ бөлім басшысы