Білім • 03 Қыркүйек, 2021

Мамандар даярлауға қолдау көрсетіледі

83 рет
көрсетілді
2 мин
оқу үшін

Мемлекет басшысы Қ.Тоқаевтың Қазақстан халқына Жолдауында берілген тапсырмаларды орындауға арналған Үкімет отырысында Цифрлық даму, инновациялар және аэроғарыш өнеркәсібі министрі Бағдат Мусин IT-мамандарды даярлау жұмысына тоқталды.

Мамандар даярлауға қолдау көрсетіледі

«Мемлекет басшысы өз Жол­дауында атап өткендей, «отан­дық IT-секторды дамыту және нығай­ту маңызды. Елге жас, білімді, ынталы мамандар қажет. Бүгі­н­де елімізде IT-секторында кадр­лардың айтарлықтай жоғары тап­шылығы қалыптасты. Бұл эконо­микалық бәсекеге қабілеттілік­ке қолжеткізуге мүмкіндік бер­мей­ді», дейді Б.Мусин.

Осы орайда ведомство басшысы ел Президентінің 100 мың жоғары білікті IT-маманды даярлау жөніндегі тапсырмасын іске асыру мақсатында орындалатын іс-шараларға тоқталды.

Біріншіден, жыл сайын жеке IT-мектептерде оқыту үшін IT-ваучерлер берілетін болады. Осылайша, жеке ақпараттық техно­логиялар мектептері нары­ғына қол­дау жасалып, 2025 жыл­ға дейін 20 мың IT-ваучер бері­леді. Бұл ша­ра барлық ниет білдіру­ші­лерге на­рықта құрылатын жоға­ры дәре­желі IT-мектептерінде IT-маман­дарын қайта оқытуға мүмкіндік береді.

Екіншіден, Білім және ғылым министрлігімен бірлесіп IT-ма­мандықтары бойынша бағдар­ламаларды өзгертуге дайындық жүргізілуде.

Үшіншіден, университеттермен ақпараттық технология­лар дағдылары бар салалық мамандарды даярлау мақсатын­да IT-мамандықтарды бейінді өндірістермен біріктіру бойынша жұмыстар жүргізілуде.

«Мемлекет басшысы белгі­леген екінші бағыт – ұлттық компания­лардың IT-нарығымен тығыз өзара іс-қимылын қамтама­сыз ету. Бұл үшін отандық бағ­дар­ламалық қамтылым тізілімі әзір­леніп қойылған. Осы тізілім арқылы өнімдерді бір көзден сатып алу қарастырылған. Бұдан басқа бүгінде IT-нарығы мен ұлттық ком­паниялар арасында коллаборацияны қамтамасыз етуге арналған SIMP платформасы жұмыс істей­ді. Ұлттық компанияларды осы платформаға пайдалануға тартатын боламыз. Сонымен қатар IT-нарығын дамыту мақсатында 20 млн доллар сомасында венчур­лық ерте қаржыландыру қорын құру пысықталып жатыр. Мұның барлығы бізге, Қасым-Жомарт Кемелұлы атап өткендей, 2025 жылға қарай IT-қызметтері мен өнімдері экспортының көлемін кемінде 500 млн долларға арттыру бойынша алға қойылған мақсатқа қол жеткізуге мүмкіндік береді», деді министр.

 

«Егемен-ақпарат»