Осыған орай еліміз әлемнің дамыған елдерінің элиталық клубына кіруі үшін адами капиталдың өсуі мен бәсекеге қабілеттілігі бойынша бірқатар мәселені шешу қажет. Осы ретте техникалық және кәсіптік білім беру жүйесін әлеуметтік және экономикалық драйвердің негізі ретінде қарастыруға болады.
Әрине, бұл бағыттағы отандық техникалық және кәсіптік білім беру жүйесіндегі кадрлар даярлауда айтарлықтай жетістіктер де бар. Дегенмен де кадрлар даярлау жүйесін халықаралық талаптармен үндестіру үшін әлі де тиісті жұмыстар атқаруымыз керек, оның ішінде цифрландыруға да айрықша назар аудару маңызды. Мемлекет басшысы Қасым-Жомарт Тоқаевтың Қазақстан халқына Жолдауында «Цифрландыру жобасы аясында 100 мың білікті IT-маманын даярлау керек жөнінде тапсырма берілді», деп цифрландырудың еңбек нарығындағы рөлін зерделеп айтты.
Техникалық және кәсіптік білім беру мен оқытуды жаңғырту процесі цифрлы экономика мен цифрлы қоғамға көшудің жаһандық процестерінен де туындауда. «Жас маман» жобасы аясында «қондырғылар паркі» жаңартылып жатқан 180 колледжді жабдықтау еңбек нарығының сұранысына сай, сондай-ақ ақпараттық жүйелерге, автоматтандыруға және цифрлыққа бағытталуда. Өйткені әлемдік экономикадағы, қоғамдағы үздіксіз өзгерістер жағдайында кадрлар даярлау жүйесін үнемі жаңғыртып отыру қажет, дәстүрлі форматтар ескіруде. Өз кезегінде өндірістің трансформациясы кадрлардың кәсіби дағдыларының өзекті болуын, заманауи құрылғыларда жұмыс істей алуын үнемі қажет етіп тұрады.
«Talap» коммерциялық емес акционерлік қоғамы тарапынан да тиісті жұмыстар жүргізілуде. Колледждерге академиялық дербестік беру арқылы білім мазмұны еңбек нарығының сұранысына сай өзгеретінін ескерсек, біздің тарапымыздан білім бағдарламаларын реестрге (электронды) орналасуы қадағаланады.
Қашықтан оқыту форматына көшуге байланысты ТжКБ педагогтері көптеген қиындыққа тап болды. Сол себепті педагогтерге IT-бағыт бойынша жаппай оқыту ұйымдастырылды, 30 мыңға жуық педагог біліктілігін арттырды. Қазіргі таңда колледж педагогтері біздің сайт арқылы онлайн режімде курстан өтуде.
Сондай-ақ Talap сайтында ТжКБ мамандықтары бойынша бейнесабақтар, электронды оқулықтар мен қосымша материалдар берілген. Қазіргі уақытта каталогта 24 100 цифрлы ресурс бойынша сілтемелер ұсынылған, олардың ішінде: 13 757-сі – бейнесабақ, 4 005-і – электронды оқулық, 6 338-і – қосымша материалдар. Біздің сайттан жүктеп алуға болады. Жұмысшы мамандығының мәртебесін арттыру мен дәріптеуге бағытталған WorldSkills Kazakhstan қозғалысының аясындағы чемпионаттарда да IT-бағыттағы құзыреттіліктер бойынша сайыстар өткізудеміз. Жалпы, кадр даярлауды жақсарту бойынша, оның ішінде IT құзыреттіліктердің дамуы бойынша жұмыстарды жалғастырамыз.
Әбдіманап БЕКТҰРҒАНОВ,
«Talap» коммерциялық емес акционерлік қоғамы президенті
