Маңғыстау облысының қоғамдық коммуникация орталығының хабарлауынша, қазіргі таңда бөлінген қаражаттың 50%-ы игерілген, яғни 5 275-ке жуық жеке қосалқы үй шаруа қожалықтарына 611,3 млн теңге және 500 шаруа қожалығына 277,4 млн теңге қаржылай мемлекеттік қолдау көрсетілді. Қалған 1 млрд теңге қыркүйек айында игерілмек.
Бұдан басқа өңір шаруаларына тағы да алдағы қазан-қараша айларында жергілікті бюджеттен 700 млн теңге бөлу жоспарланған. Бұл қаражат Ауыл шаруашылығы министрінің 2019 жылғы 15 наурыздағы «Асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларын бекіту туралы» №108 бұйрығына сәйкес субсидия ретінде берілмек.
Құзырлы орындардың мәліметіне сүйенсек, қазіргі уақытта шаруаларды жемшөппен қамтамасыз етіп, мал азығы тапшылығын жою мақсатында бірқатар жұмыс жүргізілуде. Мысалы, жергілікті бюджеттен 150 млн теңге бөлініп, «Каспий» ӘКК АҚ арқылы аталған қайтарымды қаржыға 15 шілдеден бері әр қала, аудандардан тағайындалған операторлар қажеттілікке қарай шөп тасымалдауда екен. Бүгінге дейін 1 мың тоннаға жуық шөп сатып алынған және бұл жұмыстар жыл аяғына дейін жалғаспақ. Сондай-ақ жергілікті бюджеттен 54 млн теңге бөлініп, қайтарымды қаражатқа аудандардан тағайындалған операторлар Қостанай облысынан 546 тонна арпа жеткізді. Қазіргі таңда арпа түгел сатылып, айналымдағы қаржыға тағы мал азығын сатып алу жұмыстары жасалып жатса, 107 млн теңгеге 15 вагон 3-4 сұрыпты бидай (бидай қалдығы) сатып алынған.
Жалпы, жыл басынан бері өңірге 30 мың тоннасы өзге аймақтардан, 4 мың тоннасы жергілікті жерден шабылған
37 500 тонна шөп тасымалданыпты. Ал 3500 тонна шөп (140 вагон) өзге өңірлерден көмек ретінде жеткізіліп, қуаңшылықтан зардап шеккен мал иелеріне тегін үлестірілген. Өңірге өзге облыстардан 20 500 тонна жем тасымалданса, жергілікті жерден
1 500 тонна жем өндірілген.
Қоғамдық коммуникация орталығында өткен брифингте Маңғыстау облысы ауыл шаруашылығы басқармасының басшысы Серік Қалдығұлдың айтуынша, бүгінде өңірдегі шаруа қожалықтарында 783 тонна шөп пен 5 020 тонна жемнің қоры бар. 2021-2022 жылдарға өңірдегі төрт түлікті қыстық мал азығымен қамтамасыз ету мақсатында, Премьер-Министр А.Маминнің тапсырмасына сәйкес, бюджеттен қайтарымды қаражат ретінде мал азығына 5,3 млрд теңге қаржы бөлінген, оның 1,9 млрд теңгесі шөпке, 3,4 млрд теңгесі жемге жұмсалмақ. Бұл қаржыға жыл соңына дейін 26 мың тонна шөп пен 34 мың тонна жем сатып алынады деп жоспарлануда.
Қазір аталған қаржының 600 млн теңгесіне мал азығын тасымалдайтын операторлар тағайындалып, өзге өңірлерден шөп тасымалдау жұмыстары басталып кетті.
– Әр ауданда жемшөп сақтайтын база жасақтап, қысқа дайындықты күшейту бағытында жұмыс атқарылуда. Осыған орай әр ауданның орналасқан географиялық аймағына байланысты базалар жасақтап жатырмыз. Мәселен, Маңғыстау ауданында 4 база болады, Түпқараған мен Қарақияда 3 базадан болмақ. Ауыл, аудан әкімдіктері жұмысын бастап кетті, – дейді Серік Қалдығұл.
Бұдан бөлек Атырау мен Ақтөбе облыстарының шабындық жерлерінен шөп шабуға 5 шаруа қожалығы аттанды. Олар өздеріне қор жинап, артығын өзге мал иелеріне сататын болады. Сондай-ақ бүгінгі күні жергілікті шабындықта 14 бригада шөп шауып жатыр. Олар жыл аяғына дейін 15 мың тонна шөп дайындамақ.
Маңғыстауда биыл мал басын аман алып қалу мәселесі күн тәртібінде тұр. Құзырлы орындар берген ақпарат бұл бағытта атқарылып жатқан жұмыстарды баяндайды. «Жақсы сөз – жарым ырыс» дегендей, жақсылықтың жақын болуы – көптің жалғыз тілегі.
Маңғыстау облысы