Президент • 14 Қыркүйек, 2021

Өңір тынысын ашатын өркенді жобалар

42 рет көрсетілді

Маңғыстау облысында Мемлекет басшысының Жолдауын іске асыру бағыт­тары белгіленді. Мемлекет басшысы белгілеген бірін­ші міндет – пандемиядан кейінгі ел эко­номикасын дамыту. Бұл бағытта өңір экономикасын әртараптандыру бойынша жүйелі жұмыс істеліп, негізінен өңдеу өнеркәсібі, туризм, құрылыс, ауыл ша­руа­шылығы мен көлік және логистика сала­ларын дамытуға басымдық берілуде.

2025 жылға қарай облыстағы өңдеу өнеркәсібінің көлемін 254,3 млрд теңгеге дейін арттыру жоспарланған. Көз­дел­ген межеге қол жеткізу үшін өңір эконо­микасына тікелей инвестиция тарту, өңдеу өнеркәсібін дамыту бойынша жұмыстар жанданбақ.

Облысқа инвестор қаржысын тартуда Ақтау арнайы экономикалық аймағының үлесі зор. Арнайы экономикалық аймағы ашылғалы 200 млрд теңгеден астам инвестиция құйылған. Бүгінде бұл аймақта 19 өндіріс ошағы жұмыс істеп тұр. Онда 1 800-ге тарта адам еңбек етуде. Ал­дағы уа­қытта шетелдік және отандық инвес­тор­лар­дың қатысуымен тағы 14 жоба жүзеге асырылмақ. Оның 5-еуі биыл іске қосылады.

Сондай-ақ Президент Жол­дауы Маңғыстауда жаңа кен орын­дары­ның ашылуына да тың серпін бермек. Мемлекет басшысы гео­ло­гия­лық барлау және жер қойнауын кешенді зерттеуді тапсырды. Бұл бағытта Өзен, Жетібай, Қаламқас және тағы да бас­қа кен орындарында геологиялық бар­лау жұмыстары жүргізілмек. Аталған бас­тама бүгінде облыста әзірленіп жатқан әлеу­меттік-экономикалық даму кешенді жос­­парына енді. Бұл аймақтағы мұнай қорын анықтауға, мұнай мен газ өндіру кө­ле­мін ұлғайтуға және мұнай компания­ларына қызмет көрсететін мекемелердің жұ­мыс көлемін арттыруға мүмкіндік бермек.

Маңғыстаулықтар үшін Жолдауда айтылған тағы бір жаңалық Астрахан-Маңғыстау» магистралды су құбырының жаңғыртылуы.

Елімізде 2030 жылға қарай су тапшылығының көлемі 40 пайызға жетуі мүмкін. Аталған мәселенің алдын алу үшін Президент Қасым-Жомарт Тоқаев жаңа Жолдауында атқару­шы органдарға нақты тапсырмалар жүк­теді. Мемлекет басшысы «Астрахан-Маңғыс­тау» магистралды су құбырының жаңғыртылатынын және Кендірліде су тұшыту зауытын салу қажеттігін айтты.

Құзырлы орындардың ақпаратына сүйенсек, өңірде қазір бұл зауыттың жоба­лық-сметалық құжаттамасы жасақ­талуда. Құны 87 млрд теңге болатын жоба тәулігіне 50 мың текше метр су тұ­шы­тады деп жоспарланып отыр. Кәсіп­о­рын іске қосылғанда Жаңаөзен қаласы тұрғындарын таза ауыз сумен қамтып, қаланың тіршілік нәріне деген сұранысын толық өтемек.

Маңғыстаулықтар үшін ауыз су мәсе­лесі өте өзекті, әсіресе жаз айларында су тө­ңі­­ре­гінен шу кеткен емес. Ақтау қаласы жә­не оған іргелес орналасқан Мұнайлы, Қа­ра­қ­ия аудандарының ауылдарын ауыз су­мен жеткілікті деңгейде қамтамасыз ету мақ­сатында «Каспий» су тұшыту зауы­ты­ның қуатын екі есе, яғни 40 мың текше метр­ге дейін ұлғайту көзделген еді. Қазір осы бағыттағы жұмыс жүргізілуде. Жоба­ны 2022 жылдың басында аяқтау жоспарланған.

«ҚазМұнайГаз» ұлттық компаниясы «Қара­жан­бас» кен орнында тәулігіне 17 мың тек­ше метр су тұшытатын зауыт салу­да. Бұл зауыт биыл жыл соңына іске қо­сы­ла­ды деп күтілуде. Өндірістен ауысқан су тұр­­ғын­дардың қажетіне алынатын болады.

«МАЭК-Қазатомөнеркәсіп» ЖШС-не қарасты тәулігіне 24 мың текше метр су тұшытатын қондырғысын салу жоспарланған. Қазір жобалық-сметалық құжаттамасы жасақталуда. Құжат толық рәсімделіп біткеннен кейін жобаны келер жылы бастау көзделген.

Форт-Шевченко қаласында қуаты тәулігіне 5 мың текше метрді құрайтын су тұшы­ту қондырғысын NKOK ком­па­ния­сы­ның облыс үшін әлеуметтік қол­дау аясын­да іске асыру жоспарланып отыр. Дәл осын­дай жоба Ақшұқыр және Сайын Шапа­ғатов елді мекендерінде де салынады. Түп­қараған ауданына қарасты Ақшұқыр ауылында теңіз жағалауында 8 құдық іске қосылды.

Мұнайлы ауданындағы Баянды ауылында өткен айда тәулігіне 3 мың текше метр су тұшытатын мембрана іске қосылды. Бұдан бөлек, Баянды ауылында қазір тәулігіне мың текше метрге дейін су тұшытатын мембрана жұмыс істеп тұр. Ақпан айының басында іске қосылған мембрана «Құйылыс» жерасты су кен орнынан келген суды тұшытады. Бүгінде ол Баянды ауылын ауыз сумен қамтамасыз етіп отыр.

«Сонымен қатар «Құйылыс – Мұ­найлы – Ақтау» бағытында жаңа су құ­бы­ры тартылады. Өңірдегі су көз­дерін іздес­тіру-зерттеу жұмыстары қолға алынды.

Жолдауда Мемлекет басшы­сы халқы­мыздың әл-ауқатын арт­тыру­ға арнала­тын 5 негізгі бастаманы бел­гіледі. 2022 жыл­­дың 1 қаңтары­­нан бас­­тап ең тө­менгі жалақы мөлшері 42 500 тең­­геден 60 мың теңгеге дейін кө­бейетін бол­ды. Еңбек­ақының өсуі 19 365 маң­ғыс­тау­лық тұр­ғынға оң әсерін ти­гіз­бек. Со­нымен қатар Маң­ғыс­тау об­лысы бойын­ша 52 мың­нан астам аза­мат­тық қызмет­шілер­дің (мә­де­­ниет қыз­меткерлерінің, мұрағатшы­лар­дың, кітапханашылардың, техникалық қыз­мет­керлердің, қорық­шылардың, көлік жүргізу­шілерінің) еңбекақысы 2022 жылдан 2025 жылға дейін 20 пайызға өсетін болды.

Жолдауда зиялы қауым өкілдеріне ар­ты­лар жүктің зор екені де айтылды. Қа­зір­­­гі ғаламтор дәуірінде өсіп келе жат­қан ұр­­­пақ­қа мәдениеттілік, отаншылдық, бі­лім­ге құш­тарлық, еңбекқорлық сияқты қа­­сиет­тер­ді дәріптеуде ұлт зиялылары­ның рөлі зор.

 

Маңғыстау облысы

 

Соңғы жаңалықтар

Алматы маңында жер сілкінді

Аймақтар • Бүгін, 16:18

Доллар 9 теңгеге арзандады

Қаржы • Бүгін, 16:10

Ұқсас жаңалықтар