Облыстық сәулет және қала құрылысы басқармасының басшысы Абзал Жайлыбаев өткен жылмен салыстырғанда өңірде тұрғын үй құрылысы 25%-ға өскенін айтады.
– 2021 жылдың 9 айында 400 мың шаршы метр тұрғын үй пайдалануға берілді. Биыл 662 мың шаршы метрді пайдалануға беру жоспарланған, – деп мәлімдеді ол.
Қарағандылық құрылысшылар жұмыс барысында негізінен отандық өнімдерді пайдалануға басымдық береді. Бұл өңірдегі еңбек нарығын және құрылыс материалдары өндірісін жандандыруға септігін тигізуде. Қазірдің өзінде құрылыс секторында 5 мыңнан астам адам жұмыс істейді. Яғни жергілікті өндірісті дамыту облыс әкімдігінің басты міндеттерінің бірі болып отыр.
Жаңа тұрғын үйлер көптеп салынғаннан кейін, баспана кезегіне де оң өзгерістер ене бастаған. Мысалы, жыл сайын «Нұрлы жер» бағдарламасы аясында халықтың әлеуметтік осал топтарына 2-2,5 мың пәтер бөлініп келеді. Бұл жерде айта кететін бір жайт, жалға берілетін және несиелік тұрғын үйлердің барлығы кезекте тұрғандардың табысына байланысты бөлініске түседі.
Бір ғана мысал: кеншілер астанасының тұрғыны Саягүл Ниязбекова 13 жыл кезекте тұрып келіп, биыл Оңтүстік-Шығыс шағын ауданындағы жаңа үйлердің бірінен екі бөлмелі пәтерді сатып алу құқығынсыз жалға алды. Қазір ол айына коммуналдық төлемдерден басқа бар болғаны 7 800 теңге ғана төлейді.
– Қуанышымызды айтып жеткізе алмаймын. Бұған дейін төрт баламмен қала шетіндегі барак үлгісіндегі үйде тұрдық. Суды сырттан тасып іштік, пеш жақтық. Енді жұмыстан шаршап келгенде, рахат болды: шүмектен ыстық және суық су ағып тұрады, үй жылы. Аялдама мен мектеп тура жанымызда. Серуендеуге арналған саябақ та үйге тиіп тұр, – дейді ол мәз-мейрам болып.
Облыстық сәулет және қала құрылысы басқармасының басшысы Абзал Жайлыбаев алдағы уақытта 830 мың шаршы метр тұрғын үй салу жоспарда бар екенін айтады. Ал жыл аяғына дейін Қарағанды облысында кезекте тұрған 3 мыңға жуық адам баспанамен қамтылмақшы.
Әлбетте, құрылыстың мұндай қарқыны қарағандылықтарды қуантады. Дегенмен, санмен бірге сапаға да мән беруді ұмытпаған жөн. Мәселен, кейінгі кездері салынған кейбір көпқабатты үйлердегі кемшіліктерге деген тұрғындардың өкпе-реніші баршылық.
