Зейнетақы жинақтарының негізгі сомасы міндетті зейнетақы жарналары есебінен жинақталған. Оның мөлшері – 12,7 трлн теңге. Соңғы 12 айдағы өсім 4 пайызға тең. Міндетті кәсіптік зейнетақы жарналары бойынша жинақталған зейнетақы жинақтарының сомасы 349,5 млрд теңгені құрады. Өсім – 16 пайыз. Ал ерікті зейнетақы жарналары бойынша 1,6 млрд теңге жинақталған.
Осы жылдың тоғыз айында БЖЗҚ салымшылары өткен жылдың сәйкес кезеңімен салыстырғанда әлдеқайда көбірек қаражат салған. 1 қазандағы жағдай бойынша салымшылардың шоттарына жалпы көлемі 1,2 трлн теңге зейнетақы жарнасы түскен. Бұл – 2020 жылдың сәйкес кезеңіндегі көрсеткіштен 439,5 млрд теңгеге немесе 57 пайызға артық. Жарналардың жалпы көлемінің 95,7 пайызын БЖЗҚ-ға аударылған міндетті зейнетақы жарналарының түсімі құраған. Ол 917,4 млрд теңгеге тең. Соңғы 12 айдағы өсім – 24 пайыз. Міндетті кәсіптік зейнетақы жарналары бойынша 41,2 млрд теңге (өсім 17 пайыз), ерікті зейнетақы жарналары бойынша 496 млн теңге (өсім 41 пайыз) аударылды.
Салымшылардың жарналарынан бөлек, зейнетақы жинақтарының айтарлықтай өсуіне есептік кезеңде есептелген 1 трлн теңге көлеміндегі таза инвестициялық табыс та әсер еткен. Бұл көрсеткіш те өткен жылдың сәйкес кезеңінен асып түскен. Яғни 1 пайызға немесе 7 млрд теңгеге артық. Ұлттық банктің басқаруымен БЖЗҚ зейнетақы активтері бойынша кірістілік жыл басынан бері 8,89 пайызды, ал инфляция 6,2 пайызды құрады. Бұл ретте соңғы 12 айдағы кірістілік10,08 пайызға, осы кезеңдегі инфляция 8,9 пайызға тең.
БЖЗҚ-дағы жеке зейнетақы шоттарының саны 2021 жылғы 1 қазандағы жағдай бойынша 11,7 млн бірлікке жетті. Шоттардың көбі міндетті зейнетақы жарналары бойынша ашылған – 10 909 456 бірлік. Одан кейінгі орында міндетті кәсіптік зейнетақы жарналары есебінен қалыптасқан шоттар тұр – 534 067 бірлік. БЖЗҚ-дағы ерікті зейнетақы жарналары есебінен қалыптасқан шоттар саны қазір 54 013 бірлікке тең.
Жыл басынан бері БЖЗҚ салымшыларына шамамен 2,1 трлн теңге төленген. Төлемдердің басым бөлігін біржолғы зейнетақы төлемдері құрады – 1,9 трлн теңге. Одан кейінгі орында жасы бойынша зейнеткерлікке шыққандарға аударылатын төлемдер жайғасқан – 71,6 млрд теңге.
Сондай-ақ сақтандыру ұйымдарына аударылған аударымдар шамамен 47,6 млрд теңгені, мұрагерлік төлемдері 43,3 млрд теңгені, Қазақстан шегінен тыс жерге тұрақты тұруға кеткендерге берілетін төлемдер 29,1 млрд теңгені, жерлеуге жұмсалатын төлемдер 4 млрд теңгені және мүгедектік бойынша төлемдер 1,6 млрд теңгені құраған.
Кесте бойынша ай сайынғы орташа төлем сомасы (зейнет жасына толуына байланысты) – 28 525 теңге, ал ең жоғары сома – 673 643 теңге.
