Инфографиканы жасаған Амангелді Қияс, «ЕQ»
Былтырғы көрсеткіштерімен салыстырғанда биржадағы белсенділік артып келеді. 2021 жылдың қаңтар-қазан аралығындағы сауда-саттық көлемі тура бір жыл бұрынғы жағдайға қарағанда 3,6 есе ұлғайыпты.
Қазан айының соңындағы жағдай бойынша AIX-тің ресми тізіміне 66 түрлі эмитенттің 111 бағалы қағаз шығарылымы еніп отыр. Оның ішінде 2 ETF (Exchange traded Funds) және 15 ETN (Exchange traded notes) шығарылымдары бар. Биржаның сауда мүшелері – 18 қазақстандық және 11 халықаралық брокер. AIX-тің орталық депозитарийінде инвесторлардың 155 мыңнан астам шоты ашылған.
Қазан айында AIX-тің ресми тізіміне Kaspi.kz холдингінің қарапайым акциялары енді.
Kaspi.kz-тің сауда-саттыққа жіберілген акцияларының жалпы саны 199 500 000-нің 192 187 223-ін құрады. Осылайша, еркін айналымдағы финтех-холдингтің қарапайым акцияларының 96 пайызына дейінгі бөлігін AIX арқылы сатуға болады. Бұл қадам
Kaspi.kz акцияларының өтімділігін арттырады деп күтілуде. Сондай-ақ акционерлерге компанияның қарапайым акцияларын иелену және сату үшін ыңғайлы болмақ.
Сондай-ақ қазан айында AIX-те «Самұрық-Қазына» ұлттық әл-ауқат қоры (500 млн доллар) мен Freedom Finance SPC Ltd компаниясының (66 млн доллар) борыштық құралдарының листингі өтті. Қор AIX, KASE (Қазақстан қор биржасы) және LSE (Лондон қор биржасы) биржаларында 2 пайыздық купон мөлшерлемесімен жалпы көлемі 500 млн доллар болатын бесжылдық дебюттік еурооблигацияларды орналастырды. Оның 57 млн доллары AIX арқылы саудаға түспек. Сұраныстың ұсыныстан айтарлықтай асып түсуі мәміле бойынша диапазонды 2,5 пайыздан 2,3 пайызға дейін төмендетуге және тәуелсіз еурооблигацияларға рекордтық төмен спрэд белгілей отырып, 2,25 пайыз мөлшерінде түпкілікті кірістілікті тіркеуге мүмкіндік берді.
Қазан айының соңында AIX-те үлестік құралдар листингі бар компаниялардың («Қазатомөнеркәсіп», Polymetal, «Халық банкі», Ferro-Alloy Resources Limited, «Центркредит банкі», Kaspi.kz, Kcell) жалпы нарықтық капиталдандырылуы 54 млрд доллардан асты.
Өткен айда AIXQI индексі іске қосылған сәттен бастап ең жақсы нәтиже көрсетті. Индекс мәні 13,8 пайызға, яғни 1 031,61 пункттен 1 173,98 пунктке дейін көтерілді. Индекстің барлық 8 компаниясы айды жасыл аймақта аяқтады. Акциясы өскен компаниялардың көшін «Қазатомөнеркәсіп» бастады – 35,8 пайызға өсті. Инвесторлардың компанияға деген сұранысының жоғарылығы уран нарығындағы қолайлы болжамдар есебінен сақталып отыр. Оның іргелі перспективалары АҚШ, Қытай, Еуроодақ елдері және Ресей тарапынан атом энергетикасына деген қызығушылықтың өсуі есебінен жақсарды.
Сонымен қатар тоқсандық есептілікті жариялау аясында Kaspi.kz те акцияларының айтарлықтай өсуімен (23,24 пайызға) көзге түсті. Central Asia Metal (11,76 пайызға) және Polymetal (11,52 пайызға) акциялары да өсті. Осылайша, Қытайда энергетикалық дағдарыс туындатқан түсті металл өндірушілер котировкаларының қыркүйекте орын алған жаһандық төмендеуі бұл компанияларға аса бір әсер ете қоймады.
AIXQI индексіне кіретін банк секторы компанияларының акциялары да жақсарған. «Центркредит банкі» акциялары 9,93 пайызға, ал «Халық банк» акциялары 5,14 пайызға өсті. «Қазақтелеком» (3,14 пайыз) мен KazTransOil (1,83 пайыз) компаниялары да шамалы өсім көрсетті.
