Атап айтқанда, осы ұжымның құрамына кіретін «Самғау» домбырашылар ансамблі байқаудың бас жүлдесін жеңіп алды. Ал жалпы, қарағандылық жас өнерпаздар аталған фестивальде 21 медаль, кубок және сегіз жолдаманың иегерлері атанды.
Құрамы дарынды 11 баладан тұратын «Самғау» домбырашылар ансамблі биылғы жылдың қыркүйек айында құрылған. Түркиядағы өнер тартысында олар «Көксерек» және «Секіртпе» күйлерін орындап, қазылар мен көрерменнің ықыласына бөленген екен.
Ансамбль жетекшісі Жазира Омарованың айтуынша, фестивальде қазылар алқасының талқысына 48 қойылым ұсынылыпты.
– Байқауға бес елден үміткерлер қатысты. Біз Гран-при иегерлері ретінде Болгария мен Италияда болатын өнер байқауларына жолдаманы жеңіп алдық, – дейді ол.
Италиядағы байқау келесі жылдың шілде айында өтсе, ал Болгариядағы фестиваль тамыз айында ұйымдастырылады. Ал «Самғау» ансамблінің домбырашылары болса, өнер додаларына деген дайындыққа қазірден бастап кірісіп кеткен.
Аталған фестивальде қарағандылық жас әншілер де «Вокал» номинациясында жақсы нәтижелерге қол жеткізді. Атап айтқанда, Жәния Аманжол, Айлана Марат, Самал Жомартхан, Тілеу Серікқали сынды балғын өнерпаздар бірінші жүлдеге ие болып, Италияда ән салатын болды. Осы санатта Айша Төлеубек пен Әлихан Жұмабек те тамаша өнер көрсетіп, бірінші орын иегерлері атанды. Ал Бимария Ыбырай және Жұлдызай Құмаштың шәкірттері Арлан және Дінмұхаммед Бегендік қола жүлдені қанағат етті.
Өнер байқауында «Дәстүрлі ән» аталымы бойынша Ерсұлтан Төлеубектің жұлдызы жанды. Ол орындаған «Бастау» әні бірінші орынға лайық деп танылды. Енді Кәмшат Мүслімованың шәкірті Италиядағы фестивальде бақ сынайтын болады.
Сондай-ақ Түркиядағы фестивальде Толқын Байшағыр бастаған «Аққу» ансамблі де жүлдегер атанып, Болгарияда өтетін байқауға жолдаманы жеңіп алды.
ҚАРАҒАНДЫ
