Еліміздің Бас мемлекеттік санитарлық дәрігерінің қаулысымен өңірдегі 12-17 жас аралығындағы жасөспірімдерді, жүкті және бала емізетін әйелдерді Pfizer вакцинасымен коронавирус індетіне қарсы иммундау жүргізу бойынша дайындық жұмыстары басталып кетті.
Бүгінгі таңда облыстық денсаулық сақтау басқармасының қоймасына -90 және -60 градусқа дейінгі температуралық режімде Pfizer екпесін сақтауға арналған 2 мұздатқыш алынған. Басқарма басшысы Әсет Қалиев жақын күндері аталған вакцинаның алғашқы партиясы аймаққа жеткізілетінін, Тараз қаласы мен аудандардағы емханаларға екпе арнайы термоконтейнерлермен тасымалданатынын және +2 градустан +8 градусқа дейінгі температуралық режімде тоңазытқыштарда сақталатынын айтты.
Егу науқанының басында Pfizer вакцинасын салу Тараз қаласындағы 9 емханада, сондай-ақ Шу ауданы Шу қаласының және он ауданның емханаларында ұйымдастырылады.
«Жасөспірімдерді, оқушылар мен студенттерді иммундау шараларын оқу орындарының медициналық пункттері, яғни аумақтық емханалар дәрігерлерінің көшпелі бригадасы жүргізеді. Қазіргі уақытта педиатрларды, акушер-гинекологтерді, жалпы тәжірибе дәрігерлерін, вакцинаторларды, мектептер мен колледждердің медицина қызметкерлерін, тіркеушілерді, психологтерді даярлау бойынша семинар-тренингтер, Pfizer вакцинасын егу жұмыстарын жүргізуге рұқсат беру мен оқыту жұмыстары белсенді жүргізілуде. Облыстық денсаулық сақтау басқармасы мен санитарлық-эпидемиологиялық бақылау департаментінің мамандары мобильді топпен бірге Тараз қаласы мен аудандардың медицина қызметкерлерін даярлау және оқу орындарының басшылары мен қызметкерлері, ата-аналар, жасөспірімдер мен антиваксерлер арасында түсіндіру жұмыстарын жүргізуде практикалық көмек көрсетуде», дейді Әсет Қалиев.
Қазіргі таңда Тараз қаласы мен Байзақ, Жамбыл, Жуалы, Сарысу және Талас аудандарында өткен 12 республикалық, облыстық және көшпелі өңірлік семинарларда барлығы 700-ден астам медицина маманы оқытылды. Сондай-ақ дәрігерлер барлық оқу орнының басшылары, оқытушылары, психологтерімен қатар, ата-аналар, жасөспірімдер мен антиваксерлер арасында 12-17 жас аралығындағы жеткіншектерді вакциналау мәселесін талқылады.
Жамбыл облысы
