Білім • 07 Желтоқсан, 2021

Мың бір домбыра үні

1764 рет
көрсетілді
5 мин
оқу үшін

Тұңғыш Президент күніне орай Назарбаев зияткерлік мектептерінің дәстүрлі «Ұлы дала мұрагерлері» флешмобында мың бір домбыра үні күмбірледі. Бірнеше жыл қатарынан NIS оқушылары мерекелік көңіл-күй қалыптастырып, виртуозды ойынмен домбыраның элективті курстары және «100 күй» мәдени жобасының маңыздылығын айқындап келеді.

Мың бір домбыра үні

«Нұрлы жол» вокзалында елор­дадағы физика-математика бағытындағы NIS-тің жас домбырашылары Құрманғазы­ның әйгілі үш туындысы – «Сарыарқа», «Бал­бырауын» және «Адай» күйлерін орындады. Тәуелсіздіктің 30 жылдығы­на арналған мерекелік марафон бар­лық Назарбаев зияткерлік мектептерінде дәс­түрлі «Ұлы дала мұрагерлері» флеш­мобынан бастау алды.

Алматыдағы химия-биология бағы­тындағы зияткерлік мектеп оқушыла­ры оңтүстік астананың «Апорт молл» ойын-сауық орталығы келушілеріне тамаша көңіл күй сыйлады. Аты аңызға айналған Нұрғиса Тілендиевтің «Ата толғау» күйін тартқан жас домбырашылар көрермендердің қошеметіне бөленді. Дәстүрлі флешмобқа алғаш рет қатысқан Богдан Миронов осы күйді ерекше шабытпен орындағанын жеткізді.

– Домбыра тартуды 7-сыныптан бас­тап үйрендім. Оркестр құрамына биыл қосылсам да, бірнеше күй білемін. Бүгінгі орындалған шығармалардың ішінде Нұрғиса Тілендиевтің «Ата тол­ғау» күйі ерекше ұнайды.

Семейдегі дәстүрлі флешмобтың бас­ты туындысын ұлы Абайдың «Тор жорға» күйі деп атауға болады.

– Біз үшін «Ұлы дала мұрагерлері» тәрбие жұмысындағы өзекті жобала­ры­ның бірі – «100 күй» бойынша шығар­машылық есеп, – дейді директордың орынбасары Лариса Әбілқасымова.

Қызылордада домбыра флешмо­бы Aray city mall ойын-сауық орталы­ғында жалғасты. Мерекелік репертуарға жас музыканттар сүйікті шығармалары – «Ерке сылқым», «Көрұғлы», «Әлқисса», «Құс қайтару» күйлерін қосты, көрер­мендер де оқушыларды қолдап, танымал халық әндерін орындады.

– Күй қашан да шабыт сыйлайды, халқымыздың дәстүрі мен құнды­лық­тарын еске салады, бізге нағыз қуаныш сыйлады, – деді 9-сынып оқушысы Сырсұнқар Базарбайұлы.

Ақтаулық «Ұлы дала мұрагерле­рі» Қ.Сыдиықов атындағы Маңғыстау об­лыс­тық кітапханасында өнер көрсетті.

– Назарбаев зияткерлік мектебіне түскен әрбір жетінші сынып оқушысы міндетті түрде қолына домбыра алады. Ата-аналарымыздың дәстүрлі флеш­мобымызға қолдау танытқаны үшін қуаныштымыз, – дейді «Қос перне» дом­быра клубының жетекшісі Гүлсім Тәжмағамбетова.

Ақтөбе қаласындағы Keruen City сауда, ойын-сауық орталығында мек­теп­ішілік «Ақжелең» ұлт аспаптар ор­кестрі Құрманғазының «Адай» және «Балбырауын», Дәулеткерейдің «Көр­ұғлы» күйлерін қалың көпшілікке тарту етті, ал хордың орындауында «Батырлар ұраны» және «Алға, Қазақстан!» әндері шырқалды, сондай-ақ зияткерлер көрер­мендерге «Күй шертіп, сыйлық ал» ойынын ұйымдастырып, қатысушыларға қолдан жасалған кәдесыйлар дайындады.

Шымкенттегі физика-математи­ка бағытындағы зияткерлік мектеп оқу­­шылары үшін RIXOS KHADISHA қонақ үйінің атриумы импро­­ви­зацияланған сахнаға айналды. Құрман­ғазы­ның «Балбырауын», Нұрғиса Тілен­диевтің «Әлқисса», Дәулеткерей Шығайұлының «Қосалқа», Әбдімомын Желдібаевтың «Ерке сылқым» және «Қара жорға» халық күйіне көптеген шетелдік қонақ­тар қошемет көрсетті.

Орал қаласындағы «Орал» сау­да, ойын-сауық орталығында жас дом­бы­рашылармен бірге NIS-тің танымал «Ғажайып» би ансамблі «Қазақ өр­нектері» атты жаңа композициясының тұсауын кесті.

Павлодардағы онлайн-сахнада домбырамен қатар шаңқобыз, дауылпаз, дабыл, қобыз секілді бірегей халық аспап­тарының үні шырқалды.

Қыркүйек айында ғана домбыра ас­пабын қолына алған зияткерлік мек­тептердің жетінші сынып оқушылары Өскемендегі мерекелік концертке алғаш рет қатысты.

Атыраудағы атақты күйшілер Құр­манғазы, Дина және Дәулеткерейлер­дің танымал шығармаларын зияткерлік мектеп оқушыларымен бірге ұстаздары мен ата-аналары да орындады.

– Ішекті аспаптар мен күй әуендері арқылы біздің мәдени құндылықтары­мыз бен дәстүрлеріміз ұрпақтан ұрпаққа жалғасып келеді. Қазақ домбыраны құрметті жерде ұстаған, күйші әрдайым қадірлі қонақ болған. Домбыраға деген асыл көзқарас бүгінде жалғасын табуда, – деп атап өтті Талдықорған қа­ласындағы педагог-ұйымдастырушы-куратор Жанар Оразбаева.

Көкшетау қаласындағы NIS-тің YouTube-каналында «Шаттық» дом­бы­ра­­шылар ансамблі «Тепе көк», «Бал­бы­рауын» және «Ерке сылқым» күйлерін шебер орындағаны үшін үлкен қошемет пен құрметке бөленді.

– Біздің дәстүрлі флешмобымыз – ұлттық салт-дәстүріміз бен өнерімізді, әсіресе қазақ халқының аспабы – домбыраны құрметтеу мен дәріптеуді не­гізге алады, – деп бөлісті Нұр-Сұлтан қаласындағы Халықаралық мектептің домбыра үйірмесі жетекшісі Қазбек Атамбаев.

Тараз қаласындағы дәстүрлі флешмоб NIS-тің жас өнерпаздары дайындаған мерекелік концертке ұласты.

Мектеп арналарында елордадағы Назар­баев зияткерлік мектебі (IB), Қос­танай, Петропавл және Қарағандының жас домбырашылары өнер көрсетті.

Тәуелсіздіктің 30 жылдығына ар­налған Назарбаев зияткерлік мектеп­терінің «Ұлы дала мұрагерлері» дәстүрлі флешмобына мыңнан астам жас виртуоз қатысты. NIS-те бірнеше жылдан бері жұмыс істеп келе жатқан домбыра бойынша элективті курстар мен «100 күй» мәдени жобасы оқушылардың халық тарихына, оның дәстүрлері мен рухани құндылықтарына деген қызы­ғушылығын арттырады.

Соңғы жаңалықтар

Су үнемдейтін қондырғы

Технология • Кеше