Аймақтар • 20 Желтоқсан, 2021

Құрыш қорытатын тағы бір зауыт

48 рет көрсетілді

Қазыналы Қарағандыда тағы бір ферроқорытпа зауыты бой көтеріп, пайда­лану­ға берілді. Qaz Carbon компаниясына қарасты бұл кәсіпорынның іргесі то­ғыз ай ішінде қаланды. Айта кететін бір жайт, аталған зауыт өңірдегі ферро­қорыт­па саласы бойынша соңғы екі жылда салынған екінші өндіріс ошағы.

Жобаны жүзеге асыру үшін Qaz Carbon компаниясы өзінің жекеменшік қаражатынан 11 млрд теңге жұмсады. Ал негізгі инвестиция көзі «Қазақстанның даму банкі» АҚ тарапынан болған. Банк аталған жобаға 38,8 млрд теңге қаржы салған. Ал «KazakhExport» ЭСК» АҚ жаңа кәсіпорынның экспорттық бағдар­лануын ескере отырып, осы қаржылан­дыру бойынша кредиттік тәуекелдердің жауапкершілігін өзінің мойнына алды.

Ферроқорытпа зауытының құрылы­сы 2020 жылдың желтоқсан айында бас­талды. Тамыз айында алғашқы рудотер­миялық ферроқорытпа пеші іске қо­сылды. Қазірдің өзінде 3 мың тоннадан астам отандық силикомарганец өн­ді­рілген. Кәсіпорынның алға қойған мақ­саты – экспорт көлемін арттыру. Ал­ғаш­қы өнім Жапония, Оңтүстік Корея, Еуро­одақ және ТМД елдеріне жөнел­тіле бастады.

Өндірістік үдеріс толығымен автомат­тандырылған. Пештер үш сағат ішінде қорытпалардың бір түрінен екіншісіне өздігінен ауыса алады. Кәсіпорын Қарағанды өңірінің шикізатын қайта өңдеуге жобаланғанын да айта кеткен ләзім. Бұл үздіксіз өндірістік циклды қамтамасыз етуге және әлемдік нарықтарға сапалы өнім шығаруға мүмкіндік береді.

Жаңа зауыттың ашылу салтанатында Қарағанды облысының әкімі Жеңіс Қа­сым­бек Qaz Carbon компаниясының ірі инвестициялық жобаларды іске асыруда үлкен тәжірибесі бар екенін атап өтті.

– Мұндай жобаны іске асыру – Мемлекет басшысының инвестициялар тарту, өңдеу өнеркәсібіндегі еңбек өнімділігін арттыру жөніндегі нақты тапсырмаларын орындауға тікелей ықпалын тигізеді. Жаңа зауытта 300-ден астам тұрақты жұмыс орны ашылды, – деді өңір басшысы.

Жаңа кәсіпорын жылына 57 мың тонна ферроқорытпа өндіретін болады. Зауыттағы әрқайсысы 8 МВт болатын 8 пеш тәулігіне 25 тонна түрлі ферроқорытпа өнімдерін шығаруға қауқарлы. Бірінші кезеңде 4 пеш жұмыс істей бастайды, қалған төртеуі жыл соңына дейін пайдалануға берілмек.

Qaz Carbon компаниясының акционері Ерлан Нығматулин кәсіпорында әлемдік тех­но­­ло­гиялық әзірлемелер қол­да­ныл­ғанын және жаңа жабдық­тар орнатылғанын айтады.

– Бұл өндірістің экология­лық тұрғыда таза екенін айтқым келеді, қоршаған ортаға тигізер әсері барынша аз. Зауытта ауаны ластамайтын үш сатылы газ тазалау жүйесі жұмыс істейді. Қалдықтарды қайта пайдалану көзделген. Qaz Carbon жоба­сының жалпы сомасы 50,7 млрд теңгені құрайды, оған байыту фабрикасы, агломерациялық фаб­ри­касы бар «Сарыарқа» ферроқо­рытпа зауыты және қолданыстағы өндірісті жаңғырту кіреді, – деді акционер.

«Қазақстанның даму бан­кі» АҚ басқарма төрағасы Абай Сарқұлов Qaz Carbon инно­вациялық кәсіпорнында ҚДБ-ның стратегиялық бағытта­ры­на – өңірдің әлеуметтік-эконо­микалық дамуына, импортты алмастыруға, экспортқа бағ­дар­­ланған стратегияға және әлем­дік нарықта қосылған құ­ны жоғары бәсекеге қабілетті өнім­нің отандық өндірісіне за­уыт құрылтайшыларының то­лық көлемде сәйкес келетін бі­регей инженерлік ойының іске асырылғанын мәлім етті.

Жалпы, Qaz Carbon компаниясы 2021 жылдың сәуір айында жылына 2 млн тонна көмір өндіретін байыту фабрикасын іске қосқан болатын. Компанияның көрме орталығы салынды. Осы жылдың соңына дейін қуаты жылына 200 мың тонна агломерациялық фабриканы іске қосу жоспарлануда.

Ал күні кеше ғана пай­да­­лануға берілген жаңа зауыт­ты еліміздегі қолайлы инвес­­­­ти­циялық ахуал­дың көрсет­­кіші деп сенімді түрде айтуға болады. Яғни бұл жерде шетел­дік инвесторлар алаңсыз жұмыс істеуге заңнамалық база мүмкіндік береді және басқа да қолайлы жағдайлар жасалған. Мұның өзі Қазақстанның бүгін­де ферроқорытпа нарығындағы болашағы зор ойыншы ғана емес, сонымен қатар қоры мол мықты бәсекелес болу факторына да тікелей әсер етеді.

р

 

ҚАРАҒАНДЫ

 

Соңғы жаңалықтар

Ұқсас жаңалықтар