Ұзақ уақыт бойы халықаралық аренада Қазақстанның туы астында өнер көрсеткен және көрсетіп жүрген теннисшілердің дені Ресей тумалары екені баршаға мәлім. Солардың арасынан Ярослава Шведованы бөле-жара атауға болады. 34 жастағы Мәскеудің тумасы кезінде Ролан Гаррос (2010, 2012) пен Уимблдонның (2016) ширек финалына дейін жетті. Осы табысының арқасында 2012 жылы WTA рейтингінде 25-орынға көтерілді. Елена Рыбакина қарқынын күшейткенге дейін қазақстандық теннисшілер арасындағы ең үздік нәтиже осы еді. Одан бөлек, жұптық сайыста Шведова Уимблдон (2016) мен АҚШ-тың ашық біріншілігінің (2010) бас жүлдесін олжалап, Ролан Гарростың (2015) финалында ойнады. Бұл рекордтардың күні бүгінге дейін мұрты бұзылмай тұр.
2017 жылы нәрестелі болған Ярослава біраз уақыт сүйікті ісінен қол үзіп қалды. Біраз уақыт баласын бақты, сонымен қоса ескі жарақаттарын емдеді. Арада үш жыл өткен соң кортқа қайта оралды. Бірақ ол бұрынғы бабына қайта келе алмады. Ортаңқол жарыстардың өзінде жеңіске жету оған оңайға соқпады. Содан Шведова былтырғы жылдың соңында карьерасын аяқтайтыны жайында ресми түрде мәлімдеді.
Спорттық мансабын аяқтағандар арасында Сесил Каратанчева мен Галина Воскобоева өз заманында тәуір ойнады. Олардың бірі Болгариядан келсе, екіншісі Ресейден қоныс аударды. Жалындап тұрған шағындағы Каратанчеваның ең үздік көрсеткіші – 35-орын (2005), Воскобоеваның жеткен межесі – 42-саты (2012).
Бұл күндері өнер көрсетіп жүрген қыздардың арасынан Юлия Путинцева мен Зарина Диас ара-тұра елеулі табыстарға қол жеткізіп жүр. Қазіргі кезде үздіктер тізімінде 42-орынға табан тіреген Путинцева 2017 жылы 27-сатыға дейін көтерілді. Оның «Үлкен дулыға» санатындағы турнирлердегі нәтижелері де жаман емес. Мәскеудің тумасы Ролан Гарростың екі рет (2016, 2018) және АҚШ-тың ашық біріншілігінің бір мәрте (2020) ширек финалында күш сынасты. Озық 100 ойыншының тізімін маңайлап жүрген Диас бір кездері 31-орынды еншілеген еді. Ол Уимблдон жарысының төрт рет (2014, 2015, 2020, 2021) төртінші кезеңіне дейін жеткенін жанкүйерлер ұмыта қойған жоқ.
Ерлер арасында бірер жыл Андрей Голубев пен Михаил Кукушкин өз көрермендерін қуантып келді. Алғашқысы 2010 жылы АТР тізімінде 33-сатыға табан тіресе, екіншісі 2019 жылы 39-орынды иеленді. Салыстырмалы түрде алсақ, «Үлкен дулыға» додаларында Голубевке қарағанда Кукушкиннің көрсеткіші жақсырақ болды. Михаил Аустралияның ашық біріншілігі (2019) мен Уимблдонның (2019) төртінші кезеңіне дейін жетті. Ал Андрей ешуақытта аталған жарыстардың екінші айналымынан аспаған. Соған қарамастан, Дэвис кубогында Қазақстан құрамасының мықтылар санатына қосылуына қос жерлесіміз сүбелі үлес қосқанын ешкім жоққа шығара алмайды.
Дәл қазіргі кезде 24 жастағы Александр Бубликтің қарқыны қуантады. Нева жағалауынан келген спортшының Қазақстанның азаматтығын алғанына алты жылға жуықтады. Әлі буыны беки қоймаған бозбаланың мықты теннисші болып қалыптасуына біздің елде барлық жағдай жасалды. Нәтиже көп күттірген жоқ. Бүгінгі таңда Бубликпен сақа спортшылардың өздері санасады. Былтыр күзде ол АТР рейтингінде 34-орынға дейін көтерілді. Ал қазір Александр сол биігінен небәрі үш саты ғана төмендеді.
Қазақстан теннисі жайында әңгіме қозғағанда, Елена Лиховцеваға тоқталмай кетуге болмайды. 1975 жылы Алматыда туып-өскен отандасымыз 1999 жылы әлемдік рейтингте 15-орынға жайғасты. Кезінде ол Ролан Гарростың жартылай (2005) және Аустралияның ашық біріншілігі (2000) мен Уимблдонның (2002) ширек финалдарында ойнады. Бірақ бұл жетістіктерінің барлығына Лиховцева Ресейдің сапында өнер көрсеткен уақытта қол жеткізді. Сондықтан да аталған ойыншының табыстары Қазақстанға тиесілі емес.
Ал бүгінгі таңда өрелі өнерімен көзге түсіп жүрген Елена Рыбакинаға келер болсақ, ол 1999 жылы Мәскеуде туды. Жергілікті федерация тарапынан көңілдегідей қолдау таппағаннан кейін 2018 жылы Қазақстанға қоныс аударды. Сол кезден бері оның спорттық карьерасында өрлеу кезеңі басталды. Әлемдік рейтингте 191-орында тұрған Рыбакинаның көрсеткіші уақыт озған сайын жақсара түсті. Былтыр ол Мельбурндегі жарыстың үшінші кезеңіне шықса, биыл Уимблдонның төртінші айналымына жетіп, Ролан Гарростың ширек финалында шеберлік байқасты. WTA турнирлерін екі рет ұтты. Былтыр Токио Олимпиадасында төртінші орынға табан тіреді. Соның арқасында Елена бүгінгі таңда әлемнің 13-ракеткасы атанып отыр. Тағы да қайталап айтамыз, бұл – әзірге қазақстандық теннисшілер арасындағы ең зор көрсеткіш!
