Қоғам • 18 Ақпан, 2022

Қалта ұрлығы мен алаяқтық көбейген

158 рет көрсетілді

Өткен жылы Ақтөбе облысында тіркелген әрбір қылмыстың төртіншісі – алаяқтыққа қатысты қылмыстар. Бұл туралы Полиция департаменті бастығының орынбасары Мұрат Сейталин өңірлік коммуникациялар қызметінде өткен брифингте мәлімдеді. Соңғы уақытта адамдардың аңқаулығын пай­даланып, сеніміне кіріп, телефон арқылы жеке мәліметтерін пай­даланып, тақырға отырғызып кетіп жатқандар тіпті көбейіп ба­рады.

Қазіргі кезде жұртты алдап-арбаудың ең көп таралған түр­ле­рі – OLX жарнамасымен зат сатып алу мен сатуда алдау, онлайн несие рәсімдеу, микро­несие ұйымдары арқылы тұрғындардың сыртынан қаржы алу. Соңғы уақытта жергілікті полиция қыз­меткерлері мектептерге, кәсіп­орын­дарға алаяқтықтың құрбаны болудан сақтандыратын бейнероликтер, буклеттер таратуды бастады.

Салыстырмалы түрде қара­ғанда өткен жылы кісі өлімі, бұ­за­қылық, өзгенің мүлкін ұрлау қыл­мыстары азайса, соның ішін­де қоғамдық орындар мен кө­шеде мас күйінде жасалған қыл­мыстар өте аз тіркелген. Алай­да көлік ұрлығы, соның ішінде аккуму­лятор ұрлау көбейіп кетті. По­лиция аккумуляторларды қабылдайтын орындарды тексеру барысында, осы жерлерде жұмыс істейтін кейбір адам­дар­дың көлік ұрыларымен байланысы барын анықтады. Соның арқасында өткен жылы аккумулятор ұрлығына әбден маманданған жеті қылмыстық топ ұсталып, іс қозғалды. Өткен аптада тағы да қылмыстың осы түрімен айна­лысқан екі жас жігіт ұсталып, олардың үстінен ҚК 188-бабы 3-бөлігі «Ұрлық» бойынша сотқа дейінгі тергеу басталды.

Көліктегі қалта ұрлығы биыл да азаймай тұр. Облыс орта­лы­ғын­да қалта ұрылары белгілі бір маршруттарда және жолаушылар көп мінетін мезгілде жүреді. Өткен жылы қалта ұрлығына маманданған 12 топ ұсталды.

Үйдің ауласына қойып кеткен көліктер де жиі жоғалып жатады. Былтыр автокөліктерді ұрлайтын 16 қылмыстық топ құрықталды. Бұл жерде әдетте көпқабатты үй­лердің ауласына қойған көлік­тер түнде қолды болып жатады. Егер иелері көліктерін күзеті­летін тұрақтарға қойса, осы қыл­мыстың жолы кесілер еді. Кө­лік ұрлығының орын алуына қала­дағы автокөлік тұрақтарының аздығы да себепші.

Қылмыстардың алдын алу мен ашуда бейнебақылау камера­ла­рының көмегі өте жоғары. Соның бір мысалы, өткен жылы бейнекамера көмегімен 210 қыл­мыс ашылса, жол ережесін бұз­ған 14 мың құқықбұзушылық тіркелді.

Сондай-ақ өткен жылы іздеуде жүрген 90 қылмыскер ұсталып, 74 із-түзсіз жоғалған азамат табылды. Жиі жоғалатындар, үйден себепсіз кетіп қалатындардың арасында жасөспірімдер көп. Үйлерінен жиі кетіп қалуды әдетке айналдырған балаларды жедел­дете табуға волонтерлер мен қоғамдық көмекшілердің жәрдемі зор. Ол үшін полицияға шұғыл хабар беру керек. Көп жағдайда жасөспірімдердің кетіп қалуына үйдегі жанжал, ата-ана­ларымен арадағы келіспеу­шіліктер, тұрмыстық жағдайдың қиындығы, мектептегі әлімжеттік себеп болып жатады.

Өткен жылы есірткінің заңсыз айналымына қатысты 255 қыл­мыс­тың жолы кесілді. Дәлірек айтқанда, 50 есірткі сатқан ақ­тө­­­белік қолға түскен. Есірткі са­ту­­мен тұрақты айналысқан же­ті топ ұсталып, олардан 208 кг түр­лі есірткі алынып, бір есірт­­кі да­йындайтын орын анық­тал­ды. Синтетикалық есірткі жасөспірімдер арасында таралып жатыр. Өткен жылы тәркіленген есірткі заттарының ішінде 36 килограммы синтетикалық есірт­кілер болған.

Полиция бастығы орынба­са­рының хабарлауынша, Ақтөбе облысында 1 824 адамның елі­міздің көші-қон заңын бұзғаны анықталып, олар әкімшілік жауап­кер­шілікке тартылды. Сондай-ақ алимент төлеуден жалтарған не қарыздарын төлеуден қашып жүрген ақтөбелік 628 тұрғынның мекенжайы анықталды.

Өткен жылы көшеде, қоғам­дық орындар мен ойын-сауық орындарында­ қылмыстың азаюы­­на пандемияға байланыс­ты шектеу шаралары әсер еткені анық.

 

Ақтөбе облысы

Соңғы жаңалықтар

Ұқсас жаңалықтар