Алдымен айта кету керек, Мемлекет басшысының бірқатар бастамасы көпшілік халықтың және оппозиция өкілдерінің көңілінен шықты. Бұл саяси партиялар мен сайлау туралы заңдар туралы айтқанда. Ендігі кезекте саясат алаңында өз көзқарастарымен жаңа партиялар пайда болатыны анық. Алайда бұл Aмаnат партиясының беделі мен партияластар саны азаяды деген сөз емес. Бұл біздің партиямыздың өз жұмысына жаңадан көзқараспен, халықпен одан да тығыс жұмыс істеуге ынталандыратыны анық. Қаңтар оқиғасы бізге қазіргі уақытта одан әрі саяси реформаларды жылдам қарқынмен жүргізілуі керектігін көрсетті. Президенттің, Есеп комитеті мен Конституциялық кеңестің төрағалары мен мүшелерін партия мүшесі болмауы туралы шешім еліміздегі барлық партияларға тең мүмкіндік беріп, оларға бірдей жағдай жасалатынының бірден-бір белгісі. Ендігі кезекте облыс, қала, аудан, ауыл әкімдері мен орынбасарлары жергілікті партия төрағасы бола алмайды. Бұл ұсынысқа партия мүшелері де келісетіні сөзсіз. Себебі жергілікті мәслихаттағы фракциялардың жұмысы жанданып, әкімдер партияны әкімшіліктің бір бөлімі деп санауды қойып, партиялармен санасатын болады. Президент айтқандай, енді партия мен мемлекеттік органдардың жұмыстарын бөліп, ажыратып алуымыз керек. Бұл – сол бастамалардың бірі.
Жолдауда бір жағынан халық қалаған сәттер болды, ал екінші жағынан тосынсый болатын өзгерістер айтылды.Ол бірден үш облыс – Ұлытау, Абай және Жетісуды құру (немесе қайта құру) туралы болып отыр.
Жезқазған аймағына баса назар аудара отырып, кейбір облыстардың өңір орталығынан алыс орналасуы көптеген әлеуметтік, экономикалық мәселерді дер кезінде шешілуіне тосқауыл болып жатқаны мәлім. Тіпті халыққа да облыс орталығына барып-қайту көп уақыт пен қаржы алатыны бар. Менің ойымша, бұл дұрыс шешім. Әрине, елорда немесе Алматы қаласының тұрғындары үшін бұл – маңызды емес, тіпті бюджеттен артық ақша жұмсау сияқты көрінуі мүмкін, бірақ халықтың мұқтаждықтарын ескеру қажет. Жезқазған мен Семей тұрғындарының арасында бұл бастаманы қолдайтындар аз емес. Қалай болғанда да, бұл аймақтарды әлеуметтік-экономикалық дамудың жаңа деңгейіне көтеруге мүмкіндік береді. Сонымен қатар идеологиялық аспект пен ұлттық тарих туралы ұмытуға болмайды. Ұлытау – географиялық жағынан ғана емес, рухани жағынан да Қазақстанның жүрегі. Жетісуға келетін болсақ, басты аспект – Қасым-Жомарт Кемелұлының оның әкімшілік орталығына Дінмұхамед Қонаев атын беруге тікелей ұсыныс жасауы. Осының барлығы қазақ бірегейлігінің дамуына оң әсер етеді. Мемлекет басшысы сөзінің соңында өзінің басты міндеті елдің тәуелсіздігі мен аумақтық тұтастығын сақтау деп атап өтті.
Ғани ТАШҚАРАЕВ,
Парламент Мәжілісінің депутаты
