![Биыл 3 мыңнан астам азаматқа қандас мәртебесі берілді](/media/2022/04/05/crop-13_0_541x721_fdzzjgbh.jpg)
Олардың басым бөлігі Өзбекстан, Қытай, Түрікменстан, Моңғолиядан көшіп келген.
Еңбек және халықты әлеуметтік қорғау министрлігінің мәліметінше, 2022 жылғы 1 сәуірдегі жағдай бойынша 3 078 этникалық қазақ қандас мәртебесін алған.
Жалпы 1991 жылдан бері республикаға 1 млн 90,1 мың этникалық қазақ оралған.
«Жыл басынан Қазақстанға келген қандастардың жартысынан көбі (66,3%) Өзбекстаннан, 11,3% – Қытайдан, 10,9% – Түрікменстаннан, 2,2% – Моңғолиядан және 9,3% басқа елдерден. Келген этникалық қазақтар негізінен Алматы (30,2%), Маңғыстау (19%), Түркістан (11,4%) және Жамбыл (5,9%) облыстарына, сондай-ақ Алматы (6,5%), Нұр-Сұлтан (7,1%) және Шымкент (7,6%) қалаларына қоныстанды», деп жазылған хабарламада.
Биыл 1 сәуірдегі жағдай бойынша еңбекке қабілетті жастағы этникалық қоныс аударушылар саны 62,7%, еңбекке қабілетті жастан кіші 23,2% және зейнеткерлер 14,1%. Еңбекке қабілетті жастағы қандастардың ішінен білім деңгейі бойынша 11,5% жоғары білімді, 39,6% орта кәсіби білімді, 47% жалпы орта білімді, 1,8% білімі жоқ.