Облыстық жұмыспен қамтуды үйлестіру және әлеуметтік бағдарламалар басқармасының басшысы Азамат Мәмбетовтің мәліметінше, мұнайлы өңірде мүмкіндігі шектеулі 23 656 адам бар. Оның ішінде бірінші топтағы мүгедектер – 2 011, екінші топта – 9 480, үшінші топ санатын 8 358 адам алған. Сондай-ақ мүгедек балалардың саны 3 807-ні құрап отыр. Былтыр олар әлеуметтік қызметтер порталы арқылы техникалық оңалту құралдарының 55 түрімен, санаторий-курорттық емдеу қызметі, жеке көмекші мен ымдау тілі мамандарының көмегімен қамтылған. Мәселен, портал арқылы 16 434 адамның өтініші қабылданып, оның 14 798-ci қажетті құралдармен, тифло-техникалық, сурдо-техникалық, гигиеналық, протез-ортопедиялық және қызметтермен қамтамасыз етілген. Мемлекеттік әлеуметтік тапсырыс шеңберінде 305 адам 22 инватаксимен 9 914 рет тасымалданған.
Ал «Азаматтарға арналған үкімет» мемлекеттік корпорациясы» КеАҚ Атырау филиалының директоры Мұса Хайруллиевтің айтуынша, №1 халыққа қызмет көрсету орталығында ерекше қажеттілігі бар жандар үшін цифрлық қызмет бұрышы ашылған. Арнайы бұрышта ерекше қажеттілігі бар адамдар мемлекеттік қызметтерді өз бетінше алуына жағдай жасалып отыр. Мұнда есту және сөйлеу қабілеті нашар клиенттердің пайдалануына толық бейімделген компьютерлер орнатылды. Компьютерлер құлаққаптармен, арнайы пернетақтамен жабдықталды. Бағдарлама барлық қажетті ақпаратты құлаққап арқылы жібереді. Қазір аталған филиалда ерекше қажеттілігі бар 25 адам жұмыс істейді. Олардың арасында арнайы бұрыш ашуды ұсынған Айбек Идаятов пен Айнұр Мұстажапова да бар.
Мәселен, сондай жандардың арасында елімізге ғана емес, әлемге танылған атыраулықтар бар. Өткен жылы Атырау облысынан Токиода өткен Паралимпиадаға алты дзюдошы, бір таэквондошы мен бір жүзуші қатысты. Оның үшеуі – парадзюдошылар Әнуар Сариев, Теміржан Дәулет пен Зарина Байбатина Паралимпиада ойындарының күміс жүлдегері атанды.
«Біз де адамбыз» қорын құрған Гүлназ Қосмұрзиева мүмкіндігі шектеулілердің де қоғамның белді мүшесі екенін насихаттап жүр. Енді ол ерекше қажеттілігі бар адамдарға арт-терапиясын жүргізу үшін инклюзивті театр ашу жобасын қолға алып отыр.
– Инклюзивті театр – мүмкіндігі шектеулі жандардың қатысуымен өтетін сахналық әрекет. Біз қор резиденттері арасында сауалнама жүргізіп, Атырау қаласында мүмкіндігі шектеулі жандардың уақытын өткізуге қолайлы орын жоқ деген қорытындыға келдік. Содан соң инклюзивті театр ашу жөнінде идея туындады. Шындығында, тиісті жағдай жасалмаса, мүгедек адамдарды әлеуметтендіру мүмкін емес. Идея туындағаннан кейін жоба дайындап, қаржылай көмек көрсететін демеушілердің қолдауымен алғашқы қадамға кірістік. Біздің ойымызша, инклюзивті театрдың көмегімен мүгедек жандарға әлеуметтік оңалту жүргізіп, олардың да қоғамның белсенді мүшесі ретіндегі бейнесін қалыптастыруға ықпал етеміз, – дейді Гүлназ Қосмұрзиева.
Жаңа жобаның үйлестіру ісін арба үстіндегі биден Қазақстанның бірнеше мәрте жеңімпазы атанған Есболат Балабаев қолға алған. Оның айтуына қарағанда, инклюзивті театрда вокал, би, актерлік шеберлік, сөйлеуді түзеу және дамыту бағытында арнайы үйірме ашылады. Театр әртістері жыл соңына дейін екі сахналық қойылым мен екі шығармашылық кеш ұйымдастыруды көздеп отыр.
– Өзімнің тәжірибеме сүйеніп, шығармашылық жұмыстың теріс эмоциялармен, оқшауланумен, сондай-ақ депрессиямен күресуге көмектесетінін білемін. Сол себептен осы жобаның жүзеге асырылатын сәтін тағатсыздана күтіп жүрмін. Ерекше әртістеріміз шығармашылық арқылы өзін өзі түсіну, өзгелермен байланыс орнату секілді қабілетін жақсартады. Өйткені тағдырдың жазуымен мүгедектікке ұрынған адамдар түрлі стереотипке бой алдырады. Сөйтіп, жаңа әлеуметтік байланыс орнатудан алшақтайды. Бұрынғы таныстарымен байланысын үзеді. Мұны қоғам мен адамдардың өздері жасап отырған жасанды кедергілер деуге болады. Біздің мақсатымыз – осындай кедергілерді жойып, ерекше жандардың шығармашылық әлеуетін дамыта алатын орта қалыптастыру. Инклюзивті театрды терапияның бір түріне айналдырсақ деген ойымыз бар, – дейді Есболат Балабаев.
Атырау облысы
