Өз кезегінде, Мемлекет басшысының әкімшілік-аумақтық реформалары бұрын жабылып қалған Семей, Талдықорған және Жезқазған облыстарын қайта жандандыруға бағытталып отыр. Көптен күткен жаңалықты қуанышпен қарсы алған өңірлердің тұрғындары ғана емес, сонымен қатар барша қазақ халқы болды. Осы орайда Президенттің ұлтжандылығы, стратегиялық жағынан көрегенділігі, ұлттық мүддеге деген қырағылығы мен халықтың мұң-мұқтажын жақсы сезіне білетіндігі әбден байқалды.
Еуразия континентінде бауырлас басқа түркі елдері іспеттес Байқал мен Балқанның дәл ортасында орналасқан Ұлы далада қазақ халқы да көне заманнан бері өмір сүріп келеді. Ұлан-байтақ еліміздің Күнгейі мен Теріскейінде, Батысы мен Шығысында халықтың пассионарлық дамуына әсер ететін қасиетті жерлері аз емес. Ондай жерлердің болуы ұлтымыздың жанашырлары, лидерлері және бәсекеге қабілетті элитаның пайда болуына тікелей ықпал етті. Бұл географиялық немесе ұлттық кодтың бір белгісі, өлшемі ретінде саналатын дүние.
Елбасы кезінде айтып өткендей, ұлттық код, ұлттық мәдениет сақталмаса, ешқандай жаңғыру болмайды, сондай-ақ алға басу үшін ұлттың дамуына кедергі болатын өткеннің кертартпа тұстарынан бас тарту керек. Әлбетте, осындай қасиетті жерлердің қатарында, өзіне тән ұлттық және географиялық ерекшеліктері бар аумақтардың бірі – киелі Торғай.
Жапон билігі әзірлеп, бекіткен Ұлттық қуат мемлекеттік стратегиясына сәйкес, құжат ұлттық мораль мен ұлттық рухты қоса алғанда, «жұмсақ» және «қатаң» өлшемдерден тұрады.
Қазақ даласын отарлау кезінде лайықты тойтарысты Торғай өңірі осы ұлттық мораль мен ұлттық рух арқылы жасады. 1916 жылғы Қазақстандағы ұлт-азаттық көтерілісі осы Торғайдан басталып, одан әрі Жетісуда жалғасты. Көтерілістің шығу себебі әлеуметтік-экономикалық және саяси сипаттағы факторлар еді. Яғни отарлық езгінің күшеюі, жерді тартып алу және т.б. Көтерілістің басталуына ресейлік патшаның 1916 жылғы 25 маусымда армияның қара жұмысына Түркістан өлкесінің және ішінара Сібірдің 19-дан 43-жасқа дейінгі ер-азаматтарын шақыру жөніндегі жарлығы түрткі болды.
Шілденің басында қазақ даласында көп кешікпей қарулы көтеріліске айналған стихиялық бас көтерулер басталды. Ол біртіндеп ұйымдасқан сипат алды.
Өңірде ұлттық мораль мен ұлттық рух болғаннан және сақталғаннан Ахмет Байтұрсынұлы, Міржақып Дулатов, т.б. сияқты тұлғалардың өмірге келуі заңды құбылыс.
Осы орайда экономикалық және демографиялық өлшемдерді есепке алмағанда, Торғай өңірінің әлеуетін келесі кейстермен негіздеуге әбден болады.
Ұлтты оятудағы Ахмет Байтұрсынұлының кейсі:
Торғайда туған рухани көсеміміз, Алаш өкіметі лидерлерінің бірі, ғалым Ахмет Байтұрсынұлы «Қазақ» газетінің 1915 жылы шыққан ғылыми талдау еңбектерінде қазақ халқының мұң-мұқтажын көтереді. Ұлттық мүддеге арналған Ахаңның көзқарастары осы газеттің «Шаруашылықты яғни экономиканың өзгеруі» атты айдарымен шыққан бірнеше мақалаларда жан-жақты көрсетілген. Ұлттық мүдде тұрғысынан Ахмет Байтұрсынұлының пікіріне қарағанда, қоғамның дамуына келесі қозғаушы күштер әсер етеді. Олар:
- Табиғи орта;
- Халықтың тығыздығы;
- Техникалық прогресс;
- Басқа елдерді жаулап алу;
- Саясат пен құқық;
- Дін мен адамгершілік;
- Білім мен оның таралуы;
- Сыртқы елдердің әсер етуі;
9.Мемлекеттің қойған мақсаты.
Ахаң жасаған тұжырымды ескере отырып, ұлттық қуатты сипаттайтын төмендегі қорытындыға келуге болады: ұлттық мүдде материалдық базисті, сол ұлттың жаңа идеяларды қалыптастыру және қабылдау қабілеттілігін, елдің халықаралық байланыста атқаратын рөлін, сондай-ақ мемлекеттің қолында бар барлық ресурстың жиынтығы.
Басқа сөзбен айтқанда, Торғай өңірін қайта жаңғыртсақ, болашақта Алаштың жаңа, заманауи қайраткерлер мен патриоттардың өмірге келулеріне әкімшілік-аумақтық және әлеуметтік-экономикалық алғышарттар жасаймыз.
Торғайдың ғарыштық немесе кванттық толқындар кейсі:
Киелі Торғай өңірінде әлемге әйгілі Үштоғай квадраты яғни шаршысы орналасқан (Torgay geoglyphs. Ushtogay square). Нысанның орналасқан жері: Амангелді ауданы Үштоғай ауылынан шығысқа қарай 15 шақырым жерде. Бүкіл әлемдік ғалымдар назарын жұмбақ Торғай геоглифтері – ұшар биіктен яғни ғарыштан ғана көрінеді. Ол геометриялық және пішінді өрнектер. Жалпы, осы аймақта 200-ге жуық осындай таңбалар бар. Нысандар туралы алғашқы рет 2007 жылы қолжетімді Google Earth бағдарламасындағы ғарыштан түсірілген суреттерге зерттеу жүргізген сарапшылар (Д.Дей) нысандар қатарын тапты. «Үштоғай шаршысы» геоглифінің белгіленген диагональдар ұзындығы 406 м. Диаметрі 10-12 м, биіктігі 1 м болатын 101 үйіндіден тұрады. Эзотериялық ілімді ұстанғандар геоглифті «күш беретін орын», адам мен ғарыштың энергетикалық байланыс жолы деп есептеуде.
Ең басты ерекшелігі, шаршының аумағы бойынша ешқандай жануар аяқ баспайды, бармайды, тіпті үстінен құстар да ұшпайды. Бір тылсым күштің бар екені рас. Бір таныс кісі жеңіл машинасын осы шаршы ішіне 20 минутқа қалдырып кеткенде, көліктің аккумуляторы осы уақытта балқып, еріп кеткен.
Шаршының емдік қасиеттері де жоқ емес, энергетикасы ғажап. Таңғалдыратын құбылыс бар: ішінді 20-30 минут болсаңыз, шаршы сыртында 2-3 сағат уақыт зымырап өтіп кетеді. Демек уақыт пен кеңістік айырмашылығы бар. Сол себептен болар, бұрынғы КСРО (Т.Әубәкіров, Т.Мұсабаев, А.Айымбетовті қоса алғанда), соңыра Ресейдің ғарышкерлері үнемі осы өңір арқылы Жерге қонып жатады. Былайша айтқанда, ғарыш пен осы жердің ортасында бір құпия даңғыл мен дәліздің бар екендігі ақиқат.
Сайып келгенде, жоғарыда келтірілген ойлар мен стратегиялық жағынан маңызды басымдықтарды басшылыққа ала отырып, төмендегі тұжырымдарды жасауға болады.
Біріншіден, бюджеттік тапшылық заманында жабылған облыстар мемлекеттік бюджет көлемі ұлғайғасын қайтадан ашылуда. Тізімге енбей қалған тек қана Торғай. Демек, дискриминациялық принцип тұрғысынан осы өңірдің құқықтары тиісті шешімін таппады.
Екіншіден, Торғайдың қайта облыс болмауының негізгі критерийлері (өлшемдері) экономика мен демография болды. Сондықтан осы өңірдің әбден тозған барлық саладағы инфрақұрылымын қайта жаңғырту жөнінде Үкіметтің кешенді бағдарламасын қабылдау керек. Егер ауыл шаруашылығына түбегейлі инвестиция құйылса, өңірдің демографиялық жағдайы біртіндеп жақсарады.
Үшіншіден, биыл осы өңірде өмірге келген ұлт ұстазы, рухани көсеміміз, Алаш өкіметі лидерлерінің бірі, ғалым Ахмет Байтұрсынұлының 150 жылдығы атап өтіледі. Сол себептен және Ахаңның рухына мемлекеттік деңгейде тағзым ету тұрғысынан ел Президенті Қасым-Жомарт Кемелұлы Тоқаев киелі Торғай өңіріне барса, нұр үстіне нұр болар еді. Ол үшін Президент Әкімшілігі мен Үкімет алдын ала ұйымдастыру жұмыстарын бастағаны жөн.
Төртіншіден, кезінде Ұлы даланың мемлекет қайраткері, ақын, жырау, би, философ Асанқайғы (XIV-XV ғасырлар) РФ космодромы орналасқан қасиетті Байқоңырды Жердің кіндігі деп бекер айтпаған. Ғарышкерлердің әуеге тура, шапшаң ұшатын жері Байқоңыр болса, ал олардың әуеден тура, шапшаң қонатын жері Торғай өңірі. Сондықтан ғарыштық және кванттық бағыттарда ұлттық мүдделерді барынша қорғап, Қазақстан билігі қасиетті және киелі екі жерді де өз құзыретіне айналдырған орынды.
Бесіншіден, Торғай өңіріне облыс мәртебесін беру популизм емес. Ол ерте ме, кеш пе түбі шешілетін мәселе. Ұлттық қуат стратегиясының компоненті ұлттық мораль мен ұлттық рухтың бір қайнар көзі осы өңірдің топырағында жатыр. Сонымен қатар облыс жабылғанда осы өңірде тұрған және көшіп кеткен 290 мыңға жуық торғайлық Мемлекет басшысының лайықты шешімін қолдар еді, барша қазақ халқы өз ризашылығын білдіретін болады.
Сөз соңында келесі іріктелген ойды өрбітуге болады. Сонау сақтар мен ғұндар заманынан келе жатқан киелі Торғай топырағы ұлттық қауіпсіздік пен еліміздің территориялық тұтастығын сақтап қалу аясында талай пассионарлық дүмпулер мен ұлтжанды азаматтарды сыйлады.
Абайдың әкесі Құнанбайдан қалған ұлағатты сөз бар: «Адам өседі, Жер өспейді». Түбі Торғай жерінде де демография жағынан халық санының өсетініне кәміл сенеміз.
Қайырбек АРЫСТАНБЕКОВ,
Экономикалық саясат институтының директоры, Қазақстан Республикасы Президенті жанындағы Реформалар жөніндегі
жоғары кеңестің комитет мүшесі