Білім • 17 Мамыр, 2022

Ербол Шаймерденов атындағы шәкіртақы берілді

73 рет көрсетілді

Әл-Фараби атындағы ҚазҰУ-дың журналистика факультетінде еліміздің мәдениеті мен баспасөзіне, тіл саласының дамуына қомақты үлес қосқан қоғам қайраткері, жазушы-публицист Ербол Шаймерденұлы шығармашылығын насихаттау мақсатында «Шаймерденов оқулары» өтті.

Шараны Әл-Фараби атындағы ҚазҰУ-дың журналистика фа­культетінің деканы Сансызбай Мәдиев ашып, ел мүддесіне қыз­мет еткен, халқының мәдениеті мен тілін дәріптеп өткен тұлғаны мәңгі есте қалдыру мақсатында іске асатын шаралар барысына тоқталды.

Алғашқы болып сөз алған уни­­вер­ситеттің бірінші проректоры мін­детін атқарушы Қанатбек Мұқанов ұлттық баспасөзіміз­дің өркендеуіне үлкен еңбек сіңір­ген тұлғаның шығармашылы­ғын өскелең ұрпаққа, болашақ журналистерге үлгі етіп, өнеге тұту мақсатында журналистика факультетінде ұйымдастырылып отырған «Шаймерденов оқулары» іс-шарасының аясын кеңейтуді, оған жастарды мейлінше көбірек қатыстыру мәселесін қозғады.

Алқалы жиынға қатысқан Алматы қаласы әкімінің орынбасары Арман Қы­рық­баев мем­лекетшіл тұлғаның жайдары мінезі, жастарға ақылшы ретіндегі жана­шырлығы туралы айта келіп, Жоғарғы Кеңесте баспасөз хатшысы, Президент Әкім­шілігінде, Парламентте, Мәдениет және ақ­парат министрлігіндегі жа­уапты қызметтерде жүргенінде жауап­кершілікті, мәдениетті һәм білікті, білімді тұлға ре­тінде дараланып тұратындығын еске алды.

Алқалы жиынға қонақ ретінде шақы­рылған Е.Шаймерденұлы­ның жұбайы Күләш Шаймерде­нова, филология ғылы­мдарының докторы, профессор, жазушы Кәкен Қамзин, Қазақстанның ең­бек сіңірген қайраткері Қайнар Олжай, танымал тележурналист Гүлма­рия Барманбекова, Қазақстан Республикасының мәдениет қай­­раткері, Қазақ радиосының ардагері Темірхан Момбекұлы-Түркістан, ақын, журналист Бек­жан Әшірбаев, тағы басқа қатысушылар белгілі қаламгер Ербол Шаймерденұлының қо­ғам­мен байланыс орнату ісіндегі еңбегін, мемлекетшіл мінезін, қайраткерлік қасиетін танытар тәлімді әңгімелерін ортаға салды. Осы орайда курстасы Темірхан Момбекұлы-Түркістан «Курста 50 студент едік. 41 ұл, 9 қыз. Осы қырық бірдің ішінде адалдық пен тазалық жөнінен Алпысбай Шымырбайұлы мен Ерболдың алдына түсетін ешкім жоқ болатын» деген жүрекжарды естелігімен бөлісе келіп, «Жаны таза еді. Принципті мәселелерде тек әділетіне қарай жүретін», деп ой толғады.

«Шаймерденов оқулары» аясында халықаралық журналис­тика мен қоғамдық байланыс са­ласы­ның ұлттық және жаһан­дық ақпа­рат­тық кеңістікте дамуы, цифр­лық медианың бүгіні мен болаша­ғы, салалық журналистика­ның өткені мен бүгінін саралау­ға арналған ғылыми-зерттеу жо­баларының қорытындысы жария­ланып, шығармашылық бай­қаудан оза шапқан студенттерге Е.Шаймерденұлы атындағы шә­кірт­ақы табыс етілді.

 

АЛМАТЫ

Соңғы жаңалықтар

Бүгін - Ұлттық домбыра күні

Қазақстан • Бүгін, 08:50

Ұқсас жаңалықтар