Пікір • 23 Мамыр, 2022

Кәсіпкерліктің әлеуеті жоғары

Мемлекет басшысы Қасым-Жомарт Тоқаев еліміздің түкпір-түкпіріндегі шағын және орта бизнес өкілдерінің басын қосып, кездесу өткізді. Жиында кәсіпкерлік саласындағы өзекті мәселелер талқыланды.

Egemen Qazaqstan

Президент бұған дейінгі кездесуде ірі бизнес өкілдеріне басымдық берсе, бұл жолы шағын және орта бизнес өкілдері назарға алынды. Шамамен 80-ге жуық кәсіпкер жиылды. Бірқатар мәселе көтерілді. Атап айтқанда, салық саясатына, пандемиядан кейінгі тексеру, импорт, өңірлердегі кәсіпкерлікті дамыту мәселелеріне назар аударылды.

«Атамекен» ұлттық кәсіпкерлер палатасының төралқа төрағасы Райымбек Баталов шағын және микробизнестің бірқатары «көлеңкеде» жүргендіктен, барлығына бірдей салық жүйесін енгізу бастамасын көтерді. Сондай-ақ тексеруді тоқтатуды тағы бір жылға, яғни 2024 жылдың 1 қаңтарына дейін ұзартуға қатысты бастама көтеріп жатырмыз.

Жалпы, бизнес саласында қордаланған біраз мәселе бар. Президенттің қолдауының арқасында кәсіпкерлік дамиды деп ойлаймын. Мысалы, шағын және орта бизнестің үлесі – 34,7 пайыз. Алайда бұл көрсеткіш дамыған елдерде 50 пайыздан жоғары. Аталған көрсеткішке жету үшін «Атамекен» де ауқымды жұмыс атқарып жатыр.

Біздің есептеуіміз бойынша, 2020 жылы 31 мыңға тарта кәсіпкер өз ісін тоқтатты. Бірақ қазір кәсіпкерліктің саны артқанын көріп отырмыз. Ұлттық экономика министрлігінің деректеріне сүйенсек, 1,4 млн-нан астам кәсіпкерлік субъектісі бар. Олар 3,5 млн адамды жұмыспен қамтып отыр. Дегенмен әлеуетіміз бұдан да жоғары. Ол үшін ірі, алпауыт компаниялар тапсырысты жергілікті кәсіпорындарға беруі керек.

Бауыржан ОРАЗҒАЛИЕВ,

«Атамекен» ұлттық кәсіпкерлер палатасының Аппарат басшысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз