Қоғам • 25 Мамыр, 2022

Тауар тапшылығы сезілмейді

1751 рет
көрсетілді
3 мин
оқу үшін

Ресей мен Украина арасында қақтығыс басталған ал­ғашқы апталарда Қа­зақ­станның электроника на­рығындағы ойын­шылар да осы кезеңмен және Қазақстандағы оқи­­ға­лармен сәйкес келген логистикалық шектеулерге, қаржылық тұрақ­сыз­дыққа байланысты өте қиын жағ­дай­ға тап болғаны белгілі.

Тауар тапшылығы сезілмейді

Геосаяси оқиғалардың әуел ба­сында желілер Еуро­па, Бе­ла­русь және Ресей ар­қы­лы логис­тикалық тіз­бек­­­­тердің бұзы­лу мә­се­лесін болжады. Қазақстан эко­­но­­­микасы Ресеймен тығыз ин­тег­рацияланған. Импорт­тың басым бөлігі ел аумағына Ре­се­й порттары немесе Еуро­па ар­қылы автожолдармен кіре­ді. Санкциялар күшіне ене баста­ға­нда көптеген тасы­мал­­дау­шы­ Ресей арқылы тран­зитті тоқ­татты. Өйткені сау­да желі­ле­рі тауар алуға бай­ланыс­ты қиындықтарға душар болу­дан сескенді. Мәселен, осы жыл­дың наурыз айында теңіз, теміржол және автомобиль жолдары арқылы жет­кі­зілетін кейбір тех­ни­ка­ның жетіспеушілігіне тап боламыз деп күдіктендік.

«Қазіргі таңда да логисти­ка­­­да­ғы жағдай күрделі. Бірақ нарық қазіргі нақты жағ­дайға бейімделіп келеді. Тауар­лардың 70-75%-ға дейінгі үлесі Қазақстандағы жеткізу­ші­лердің қоймаларынан алынады. Тауардың бір бөлігін біз DDP және CIP жеткізу шарттарында аламыз, яғни жеткізуші бізге тауарды қоймаға өзі жет­кі­зеді. Егер көрші мемлекетке қатысты енгізілген санкциялар туралы айтатын болсақ, бұл біз­дің қоржынымызда маңызды шамада үлеске ие Қытайдан ке­летін жүктердің тарифтік құны мен транзиттік уақытына әсер еткен жоқ. Айта кету керек, ақпан және наурыз айла­рымен салыстырғанда, бұл бағыттағы тарифтер елеулі шамада төмендеді. Ресейден де тауарлар ешбір қиындықсыз жет­кізіледі, біз бұл өнімдерге деген тапшылықты сезбейміз. Біз сондай-ақ Еуропадан «ескі» бағамен тауар әкеліп үлгердік, күрт тапшылық жоқ. Еуропадан әкелінетін тауарларға тарифтер 30-дан 50%-ға дейін өсті, тарифтерге бағамның үлкен құ­был­малылығы әсер етті, қазір жағдай біршама түзелді және мөлшерлемелер тұрақтанды. Сондай-ақ қиындық Ресей және Беларусь нөмірлеріне ие көліктердің ЕО аумағына кір­гі­зіл­меуінен көрінеді. Өйткені олар ЕЭК пен ЕО арасындағы жүк тасымалының негізгі көлемін жүзеге асырушы еді. Қазақстан бағытында қазақстандық және қырғыз нөмірлері бар машиналар фрахталады, бірақ бұл көліктер паркі қажеттілікті толық өтей алатындай үлкен дәрежеде емес. Алайда жоғарыда айтып өткенімдей, логистикалық ком­паниялар бейімделіп келе­ді және автокөлік паркі ұлғая түсуде.

Жалпы алғанда, тауардың күрт тапшылығы сезілмейді, тауарды жеткізу бойынша барлық сұраныстарды жауып отырмыз. Ағымдағы геосаяси жағдай жет­­кізу­шілердің кез келген б­а­ғыт­тан тауарлар жеткізуіне елеу­лі әсер ете қойған жоқ. Осын­дай техниканың арасында теледидарлар, тоңазытқыштар, пли­талар мен тұмшапештер, кір жуғыш машиналар бар. Әри­не, қазақстандықтар айфон­сыз қал­майды. Ұсақ және қым­бат жабдықтар бұрын да әуе қаты­на­сы арқылы жеткізіліп келген. Сондықтан мұнда ешнәрсе өзгере қойған жоқ», дейді Evrika компаниясының логистика жө­нін­дегі директоры Владимир Татаринов.

 

АЛМАТЫ