Ауыл шаруашылығы министрлігінің Ветеринария бойынша ұлттық референттік орталығы осы жылдың 14 қаңтарында Қарағанды облысында аусыл ошағын тіркегені есімізде. Көп ұзамай Шет ауданы Киікті ауылдық округі әкімінің шешімімен шаруа қожалығына карантин қойылып, байланыста болған барлық жануар жойылды. Сондай-ақ дезинфекциялау жұмыстары жүргізілді.
Тиісінше, министрліктің Ветеринариялық бақылау және қадағалау комитеті жануарлардың денсаулығын қорғау жөніндегі дүниежүзілік ұйымға аусыл ауруы туралы дереу хабарлады. Осыған байланысты Дүниежүзілік жануарлар денсаулығын қорғау ұйымы вакциналаусыз аусыл бойынша саламаттылық мәртебесін тоқтатты, ал импорттаушы елдер (Ресей, Қытай, Беларусь және т.б.) Қазақстаннан тірі жануарларды, жануарлардан алынатын өнімдер мен шикізатты экспорттауға қатысты шектеу шараларын енгізді. Бұл қазақстандық экспорттаушылардың лоббиінің жоқтығын көрсетті.
«Министрлік жергілікті атқарушы органдардың ветеринариялық қызметі ауыл шаруашылығы құрылымдарының ветеринариялық дәрігерлерімен бірлесіп, аусыл бойынша жағдайды тұрақтандыруды қамтамасыз ету үшін жұмыс жүргізді. Ресейдің ветеринарлық және фитосанитарлық қадағалау жөніндегі федералдық қызметінің хаттарына сәйкес, биыл сәуір айынан бастап Қазақстан аумағынан тағамдық коллаген өндіру үшін ірі қара мал терілерін әкелуге рұқсат етілді. Сонымен қатар Ветеринариялық бақылау және қадағалау комитеті эпизоотиялық саулықты сақтау үшін Қазақстанның орталық аймағында ауыл шаруашылығы жануарларын вакциналау туралы шешім қабылдады. Бұл туралы Дүниежүзілік жануарлар денсаулығын қорғау ұйымын хабардар етті», делінген ведомствоның хабарламасында.
Айта кету керек, жануарлар ауруы туралы күдік туындаған жағдайда ветеринарлық қызметтер аккредиттелген зертханаларда зерттелетін биологиялық материалдың сынамаларын алады. Ақмола және Павлодар облыстарынан келген ауру жануарларға зертханалық зерттеу нәтижелеріне сәйкес инфекциялық ринотрахеит орнатылды. Нәтижесінде, шектеу шаралары енгізіліп, қазір қажетті жұмыстар жүргізіліп жатыр. Зерттеулердің нәтижесінде парагрипп-3, нодулярлық дерматит, аусыл, контагиозды плевропневмония, пастереллез және вирустық диарея сияқты аурулар анықталмады. Жалпы, елімізде аусыл бойынша эпизоотиялық жағдай тұрақты.