![Туризмнің дамуын тежемеген дұрыс](/media/2022/06/01/crop-6_8_1372x1450_infografika-01-06-2022-ukimet-otyrysyna.jpg)
Инфографиканы жасаған Амангелді Қияс, «ЕQ»
Ұлттық парктерге келушілер көбейді
Осы аптадағы Үкімет отырысында туризмді дамыту мәселесі талқыланды. Мәдениет және спорт министрі Дәурен Абаевтың пікірінше, былтыр Іле Алатауы, Көлсай, Шарын сияқты ұлттық парктерге келушілер саны еселеп өскен. 2020 жылмен салыстырғанда орналастыру орындарының саны 172 бірлікке артып, 3 686 қонақүйді құрады. Нөмірлік қор өсіп, 193 мың төсектік орынға жетті. Бір ғана Түркістан облысында 40 қонақүй салынды. 2021 жылы туризм саласында көрсетілген қызметтердің көлемі 109 млрд теңгені құраған. Өсім бар. Ол отандық туристер санының артуымен байланысты.
– Салада инфрақұрылымдық жобалар іске асырылып жатыр. Бүгінде өңірлерде туризм инфрақұрылымының жалпы қажеттілігі 870,5 млрд теңге болатын 244 жобаны құрады. Басым туристік дестинациялар инфрақұрылымдық жобаларының қажеттілігі – 422,8 млрд теңге болатын 178 жоба. Дестинацияларда инфрақұрылым салудан басқа, маршруттар бойындағы инфрақұрылымның дамуына назар аудару, сондай-ақ туристік өнімнің материалдық емес компоненттерін дамыту қажет. Ел бойынша «Қазақстанның Гранд-туры» негізіне кіретін бес басым бағыт айқындалды. Бұл қазірдің өзінде сұранысқа ие бағыттар, – деді Мәдениет және спорт министрі.
2021 жылы туризм саласындағы негізгі капиталға салынған инвестициялар көлемі 564,4 млрд теңгені құрапты. Жоспарланған көрсеткіштерге 8 өңірде қол жеткізілген. Биылғы қаңтар-сәуірде салаға 75,6 млрд теңге тартылған. 2022 жылғы жоспар – 1 трлн теңге.
Биыл 1 қаңтардан бастап туристік салада мемлекеттік қолдаудың жаңа шаралары қолданысқа енгізілді. Оларды жетілдіру мақсатында министрлік Мәжіліс депутаттары бастамашылық еткен туристік саланы қолдау мәселелері жөніндегі заң жобасы аясында жұмыс жүргізіп жатыр.
– Қазіргі уақытта 25 елмен 80 бағыт бойынша халықаралық әуе қатынасы қалпына келтірілді. 74 елге визасыз режім жүйесі бар. Құрлық шекаралары ашылды. Таяу келешекте визалық режімді одан әрі либерализациялау міндеті тұр, – деді Д.Абаев.
Министр туристік саланы цифрландыру аясында жұмыс жалғасып жатқанын айтты. Қазіргі уақытта eQonaq жүйесінде республика бойынша 3 123 орналастыру орны тіркелген. 159 320 шетелдік турист тіркеуден өткен.
– Туризм нысандарының, гидтердің, туркомпаниялардың, жол бойындағы сервистердің жұмыс сапасын бағалау үшін шағымдар мен пікірлерді қабылдайтын цифрлы модуль құрылды. Алынған ақпарат туристік өнімдердің сапасын бақылау, өңірлердің рейтингтерін құру, кемшіліктерді анықтау және нақты шешу үшін пайдаланылатын болады, – деді Д.Абаев.
Өкінішке қарай, бүгінгі таңда Қазақстанда білікті гидтердің жетіспеушілігі байқалады. Оларды дайындау және сертификаттау жүйесі жаңғыртуды талап етеді. Осы мақсатта гидтердің бірыңғай тізілімін цифрландыру жұмыстары жүргізіліп жатыр. Платформа гидті тіркеуге, сертификаттауды растауға, жұмыста пайдалану үшін QR код пен бейдж алуға өтініш беруге мүмкіндік береді. Бұл жүйе – гидтер мен экскурсия жетекшілерін іздеу мүмкіндігі бар толыққанды деректер базасы. Ал QR-кодтар жүйесі өз кезегінде белсенді емес гидтерді анықтауға және тізілімнен шығаруға мүмкіндік береді.
Дүниежүзілік экономикалық форумның нұсқасы бойынша жақында жарияланған жаһандық туризм рейтингінде Қазақстан 80-орыннан 66-орынға көтеріліп, өз позициясын жақсартқанын атап өткен жөн.
Экология, геология және табиғи ресурстар министрі Серікқали Брекешев ұлттық парктер аумағында экологиялық туризмнің дамуы туралы баяндады. Министрдің айтуынша, қазіргі уақытта Қазақстанда жалпы ауданы 2,7 млн гектарды құрайтын 14 ұлттық парк бар. Соңғы жылдардағы статистика туристер санының өскенін көрсетеді. Мәселен, 2021 жылы ұлттық парктерге келген туристердің саны шамамен 1,5 млн адамды құрады. Бұл 2020 жылға қарағанда 40 пайызға көп.
– Ұлттық парктер аумағында халықаралық тәжірибені ескере отырып, жаңа маршруттар және соқпақтар салу арқылы экотуризм дамып келеді. Бұл ретте заманауи визит-орталықтар, глэмпингтер, кемпингтер, қазақ этноауылдары мен керуен-сарай салынуы көзделуде. Осыған байланысты барлық ұлттық табиғи парктер жүйесін дамытудың бас жоспарлары бекітілді, кейбір парктер бойынша түзету жұмыстары жүргізіліп жатыр, – деді министр.
Үкімет басшысы Әлихан Смайылов туризмнің өте перспективті сала екенін атап өтті. Пандемияға дейін туризм саласына жаһандық қызмет көрсету экспортының 30 пайызы, әлемдік инвестициялардың 7 пайызы және салық түсімдерінің 5 пайызы тиесілі болды. Басқа жағынан, бұл фактор ішкі туризмді дамытуға үлкен септігін тигізді. Қазақстандағы туристік объектілерге қызығушылық артып келеді. Сондықтан Үкімет басшысы туристік әлеуеті жоғары өңірлерде инфрақұрылым мен сервисті дамыту қарқынын одан әрі күшейту қажет екенін айтты.
Сондай-ақ экотуризм объектілеріндегі қызмет көрсету инфрақұрылымын дамытудың маңызы зор. Оны іске асыру кезінде ерекше қорғалатын табиғи аумақтардың экожүйесі қатаң сақталуға тиіс.
Ә.Смайыловтың пікірінше, кейбір туристер демалатын жерлерге әуе және темір жол тасымалының болмауы, демалыс маусымында жол қатынасының қиындығы туризмнің дамуын тежеп отыр. Осыған байланысты Индустрия және инфрақұрылымдық даму министрлігі интермодалдық жолаушылар тасымалын дамыту бойынша ұсыныстар әзірлеп, авиа, авто және темір жол көліктерінің ыңғайлы қиылысқан бағыттарын қамтамасыз етуі қажет. Сондай-ақ туристік сала мамандарын кәсіби даярлауға жүйелі тәсіл керек екені айтылып жүр.
– Қолданыстағы бағдарламалар туризм саласының нақты қажеттіліктеріне сай келмейді. Сондықтан осы бағыттағы жұмысты, оның ішінде Түркістан қаласындағы Халықаралық туризм және меймандостық университетінің базасында күшейту қажет, – деді Ә.Смайылов.
Жалпы, Үкімет басшысы туризм саласының дамуында оң динамика бар екенін, осы орайда келесідей мәселелерге көңіл бөлу керек екендігін атап өтті. Біріншіден, туристік объектілерді инженерлік инфрақұрылыммен уақтылы қамтамасыз ету шараларын қабылдау қажет. Екіншіден, туристердің қауіпсіздігі мен қызметтердің сапасын арттыруды көздейтін туристік өнімдер ұсыну жөнінде кешенді жұмыстарды ұйымдастыру маңызды. Үшіншіден, Имантау-Шалқар курорттық аймағын дамыту жоспарын бекітіп, ондағы шараларды іске асыруға кірісу керек.
– Туристерге қызмет көрсету сапасына назар аудару керек және де биотуалеттер мәселесі шешілуге тиіс. Бұл туристер санының өсуіне ықпал етеді. Отандық және шетелдік туристер көбіне дәл осы сервистің нашарлығын айтып, шағымданады. Сондықтан бұл мәселені мұқият пысықтау қажет, – деді Үкімет басшысы.
Бар жақсылық – балаларға
Сонымен қатар Үкімет отырысында Балалар жылын ойдағыдай өткізу мәселесі қаралды. Білім және ғылым вице-министрі Шолпан Қаринованың айтуынша, Балалар жылы аясында мектеп жасына дейінгі балалар үшін 34 мың орындық 322 балабақша ашылады. Биылғы 5 айда 9,4 мың орындық 130 балабақша ашылған. Жыл соңына дейін 3-6 жастағы балаларды балабақшамен қамту 99,3 пайызға жеткізілмек.
– Жекеменшік балабақшаларда орын алатын келеңсіздіктерге жол бермеу үшін қауіпсіздік шараларын күшейтеміз. Біліктілігі сәйкес мамандармен қамтамасыз ету талаптарының орындалуын қадағалап, мемлекеттік тапсырыстың сапасын ваучерлік механизм арқылы жақсартамыз. 15 мыңнан аса тәрбиеші жаңа модель бойынша тиісті курстардан өтіп жатыр. Олар тәрбиелеу сапасын жақсартады. Ашықтықты қамтамасыз ету үшін кезектің бірыңғай базасын құру жұмысы жүргізіліп жатыр, – деді вице-министр.
Оның айтуынша, биыл алғаш рет 25 мыңнан аса баланы оқу орнына қауіпсіз тасымалдау үшін арнайы мектеп автобустарының автопаркі жаңартылады. Әкімдіктер 515 мектеп автобусын лизингпен сатып алуда. Оған қоса, Балалар жылы бастауыш сынып оқушыларын тегін ыстық тамақпен қамту 10 пайызға өскен.
– 2,4 млн оқушы қосымша білім алып жатыр. Биыл 270 мыңнан аса бала қосымша үйірме және секциялармен қамтылады. Жыл соңына дейін қамту көрсеткіші 5 пайызға ұлғаяды. Одан бөлек, биыл қазақстандық олимпиадашыларға халықаралық 7 беделді олимпиадаға қатысуға 31 толық квота бөлінді. Алғаш рет республикалық қаражат есебінен аталған халықаралық интеллектуалдық олимпиадалардың жеңімпаздары мен жүлдегерлеріне, оларды дайындаған педагогтерге сыйақы беріледі. Әлеуметтік осал отбасылардан шыққан үлгерімі төмен 1 000 бала алғаш рет дарынды балаларға арналған 134 мектепте талантты балалармен қатар оқу мүмкіндігіне ие болады, – деді Ш.Қаринова.
Биыл колледжге түсетін балаларға техникалық және кәсіптік білім беруге 45 мың орынға республикалық бюджеттен 10 млрд бөлінді. Сөйтіп, мемлекеттік тапсырыс 40 пайызға ұлғайтылды. Жоғары оқу орнына баратын балаларға арналған гранттардың саны 88 214-ке артты. Бұл 2021 жылмен салыстырғанда 15 мыңға артық. Техникалық мамандықтарға гранттар 60 пайызға, ауылдық квота 35 пайызға ұлғайтылды. Әлеуметтік аз қамтылған санаттарға 7 мыңнан аса грант бөлінді.
Денсаулық сақтау министрі Ажар Ғинияттың айтуынша, балалар мен жасөспірімдердің денсаулығын сақтаудағы ең маңыздысы – жүктілік кезеңінен бастап, балалардың өсіп-даму кезеңдерінде медициналық көмек көрсетудің бірыңғай жүйелі стратегиясын айқындау. Сондықтан бүгінгі таңда жүкті әйелдерді ұрық ағзалары мен жүйелерінің ақауларын анықтауға арналған пренаталдық скринингпен қамту толықтай жүргізіледі.
– Жаңа туған нәрестелердегі денсаулық кемістігі құрылымында ағзалар мен жүйелердің ақаулары 96,3 пайызды, хромосомалық әртүрлі бұзылу 3,7 пайызды құрайды. Туа біткен ақаулардан болатын өлім-жітім нәрестелер өлімінің себептері құрылымында екінші орын алады және төмендеу үрдісі жоқ. Бұл ультрадыбыстық зерттеу мамандарының жетіспеушілігі мен біліктілігінің жеткіліксіздігіне байланысты. Республика бойынша пренаталдық скринингке арналған ультрадыбыстық зерттеу аппараттарымен жарақтандырылуы 67 пайызды құрайды, – деді А.Ғиният.
Жағдайды жақсарту үшін министрлік пренаталдық скринингті жүргізудің жаңа қағидаларын бекітті. Пренаталдық ультрадыбыстық зерттеу скринингін өткізу стандартын әзірледі. Ультрадыбыстық зерттеу диагностикасының халықаралық стандарты бойынша 150 маманды оқытқан. Биыл жоғары эксперт-класының 50-ден астам ультрадыбыстық зерттеу аппараты сатып алынбақ.
Премьер-Министр балалардың білім алып, жан-жақты дамуына, демалуы мен медициналық қызмет алуына жағдай жасау мемлекеттің маңызды міндеті екенін атап өтті. Жыл сайын елімізде жүздеген мектеп, балабақша, мәдениет және спорт нысандары салынады – мұның бәрі балалардың жан-жақты дамуы үшін қажет.
Үкімет басшысы Балаларды қорғау күні қашан да жазғы сауықтыру компаниясының бастамасы болғанын атап өтіп, Денсаулық сақтау министрлігіне жаз мезгілін барынша тиімді пайдаланып, кешенді шараларды қабылдауды тапсырды.
– Ең бастысы – көшеде, суда демалу кезінде, түрлі экскурсияда балаларымыздың қауіпсіздігін қамтамасыз ету. Балалар қатысатын кез келген іс-шараны ұйымдастыру, ең алдымен, олардың қауіпсіздігіне кепілдік беруі тиіс, – деді Премьер-Министр.
Осыған байланысты салалық ведомстволарға тиісті қызметтердің жұмысын жұмылдырып, оқу орындарын қауіпсіздік жүйесімен жарақтандыру және жаңғырту жұмыстарын жандандыру тапсырылды.
Оған қоса, Ә.Смайылов облыс әкімдіктеріне әлеуметтік жағынан аз қамтылған санаттағы балаларды сауықтыру шараларымен, жазғы демалыспен және бос уақыттарын пайдалы өткізумен барынша қамтуды тапсырды. Барлық ауылдық елді мекендерде спорт алаңдарын, балаларды дамыту орталықтарын жабдықтап, ойын-сауық, мәдени іс-шаралар ұйымдастыру қажет.
– Денсаулық сақтау бойынша шалғайдағы елді мекендерде балалардың денсаулық жағдайына скринингтік және стоматологиялық тексерулер жүргізу үшін жылжымалы медициналық пункттердің жұмыс істеуіне қатысты шаралар қабылдануы керек. Одан бөлек, балалар құқықтарының сақталуын қамтамасыз ету үшін өңір әкімдіктері жанындағы тәуелсіз Бала құқықтары жөніндегі уәкілдердің лауазымдарын енгізуді тездету тапсырылды. Ішкі туризмді дамыту аясында балалар үшін экскурсиялық-танымдық іс-шаралар ұйымдастыру маңызды. Балаларды үйірме және секциялармен қамту мақсатында мемлекеттік білім беру, спорт және шығармашылық тапсырыстар бойынша ақпараттық жүйелер интеграциясы қамтамасыз етіледі. Бұл секциялар мен үйірмелердегі нақты жағдайды көруге, сондай-ақ олардың қолжетімділігін арттыруға мүмкіндік береді, – деді Үкімет басшысы.