Жай ғана заңды Парламент қабырғасында қабылдай салу мен оны халықтың талқысына салудың айырмашылығы орасан зор. Түсінген адамға қоғам болып Конституцияға өзгеріс енгізуге ниеттену үлкен жаңалық екені белгілі. Жаңа Қазақстан дегенді жиі қолдана бастадық. Өткенде Президент бір сөзінде бұл идеяны сөзбұйдаға сала берудің қажет еместігін айтты. Жаңа Қазақстан деп айтқанмен бізге ешкім басқа мемлекетті өзге планетадан әкеп бермейді.
Жаңа Қазақстан дегеніміз не? Ол әрқайсымыздың санамыздың жаңғыруы. Біз көзқарасымызды жаңаша бағытта өзгерткен кезде ғана жаңарамыз, жаңғырамыз. Ол отбасынан, білім беру мекемелерінен бастау алуы керек. Әділетті Қазақстанды қалыптастыру үшін Президент қана емес, кез келгеніміз әділ болуға тиіспіз. Конституциялық реформаны қамтып отырған бұл референдумда сол әділетті қоғам құруға барлық қадам жасалып отыр. Соны барлығымыз жан жүрегімізбен түсінгеніміз абзал.
Ең бастысы, елімізде жаңаруға, жаңғыруға ниет зор екені белгілі болды. Сол себепті Жаңа Қазақстанды баршамыз бірлесе құруымыз керек. Саусақ бірікпей ине ілікпейтінін түсінетін кез келіп жетті.
Әли БЕКТАЕВ,
Сенат депутаты
