Жақында халықаралық IT-стартаптар технопаркі алғаш рет Caspian Startup-2022 халықаралық байқауы аясында ұйымдастырған Demo Day іс-шарасы өтті. Жаңа жобаға қатысушы NIS оқушылары әуелі үш ай бойы AstanaHub-та онлайн оқудан өтіп, тәлімгерлермен бірлесіп өз жобаларын әзірлеген болатын. Кейін үздік шыққан жоба авторлары өз туындыларын көрсетіп, қорғау үшін Ақтау қаласына жиналды.
Demo Day алаңына шыққан жобалар ішінде Оралдағы NIS командасының «NFT-оятқыш L7RK» стартапы үздік деп танылды. Бұл жоба өте қызық: ұйқыдан ерте тұрған адам бай болады! Оралдық өнертапқыштар жасаған NFT сағаты өз қожасын ұйқыдан ерте оятады. Арнайы тексерістің көмегімен иесінің ұйқыдан тұрғанына көз жеткізген соң, бағдарлама оған токен (криптовалюта) есептейді. Осылай жиналған қаражатты иесі цифрлық долларға айырбастап немесе басқа цифрлық әмияндарға аудара алады.
«Бұл жобаны жасаған команданың әр мүшесінің өз міндеті бар: Адэля Шәукенева топ көшбасшысы болса, Алмас Сапаров пен Азамат Оразғали – мобильді жасақтауға жауапты, Ернұр Нәсіпқали – веб-дизайнер және фронтенд, Абылай Мәметан – аналитик маман», дейді оралдық NIS баспасөз хатшысы Айдана Хамидуллина.
Жеңімпаздар мобильді қосымшаны әзірлеп болып, енді AstanaHub-тың BlockChainBattle-де бақ сынап көрмек. Өнертапқыш ұл-қыздардың жетекшісі, мектеп мұғалімі Орал Қыдыршаев осындай байқаулар оқушыларды өз ісін қалай бастауға, өз өнімін таныстыру және компаниялармен қарым-қатынас орнатуға үйрететінін айтады.
Тағы бір жаңалық – команданың белді мүшесі Алмас Сапаров кеше ғана INFOMATRIX-ASIA халықаралық конкурсында пневмонияның бар-жоғын лезде анықтайтын ChestXRayAl қосымшасы үшін алтын медаль иеленді. Бұл байқауға Қазақстанмен бірге Түрікменстан, Тәжікстан, Қырғызстан және басқа елдердің өкілдері қатысқан болатын.
Радиологтерге қолғанат болатын осындай бағдарлама жасау идеясы авторға пандемия кезінде келген екен. Ол үшін медициналық орталықтардан жиналған 6 мыңға жуық рентген суреті бар базаны пайдаланып, визуалды кескіндерді өзі талдай алатын конволюционды нейрондық желі жасалған.
– Бұл бағдарлама рентген суреті арқылы өкпе қабынуын 92 пайыз дәлдікпен анықтайды. Мамандар әр суретті қарап, кеңесіп, диагностика үшін 15 минут жұмсаса, ChestXrayAI жасанды интеллектісіне бірнеше секунд жеткілікті, – дейді Алмастың ғылыми жетекшісі, мектеп мұғалімі Борис Зеленов.
Батыс Қазақстан облысы
