– Зайсан ауданында өңірлік «Бір қабатты Шығыс» бағдарламасы жүйелі іске асырылып, көпбалалы отбасылар жыл сайын қоныс тойын тойлап жатыр. Басқа аудандармен салыстырсақ, тұрғын үйлердің саны мен сапасы бізде көш бастап тұр. Биыл да 2 пәтерлі 35 үйді қолданысқа беруді жоспарлап отырмыз. Аталған үйлер орталық ауыз су, газ, электр желілеріне қосылып, кәріз су құбырлары тартылып беріледі, – дейді аудан әкімінің орынбасары С.Тлемесов.
Жыл сайын мемлекет азаматтардың әл-ауқатын аттыруға бағытталған түрлі бағдарламалар мен жобаларды нәтижелі іске асырып келеді. Әсіресе, шалғайдағы шекаралық аудандардың әлеуетін арттыру соңғы уақытта басты назарға алынып отыр. Шекаралық аудандарды дамытудың арнайы бағдарламасы да жасалды.
– Зайсан ауданы соңғы 2-3 жылда адам айтарлықтай өзгерді. Жаңа тұрғын үйлер бой көтеріп, қаланың сәні мен салтанаты жарасты. Зайсан қаласына кіре берістегі көпбалалы отбасыларға берілген 2 пәтерлі үйлер бөлек бір қалашық болды. Туған қаламыздың көркейіп, гүлденгені – әр тұрғынның қуанышы, – дейді қоғам белсендісі Әділхан Кәкеев.
Тұрғын үйлердің көп салынуы ауданның әлеуметтік-экономикалық жағдайының тұрақтылығының айқын көрінісі. «Бір қабатты Шығыс» бағдарламасының нәтижесінде ауданның демографиялық көрсеткіші жылдан жылға артып, халық саны өсіп келеді.
– Мен көпбалалы анамын. Биыл кезегім келіп, жаңадан салынып жатқан 2 пәтерлі 35 үйдің біреуін алатын болдым. Жаңа үйіміздің болатынына балаларым қатты қуанып жүр. Барша көпбалалы отбасыларға осындай қуаныш сыйлап, қоныс тойын тойлау мүмкіндігін берген мемлекетімізге аналық алғысымды білдіремін, – дейді көпбалалы ана А.Омарова.
Аталған бағдарлама көпбалалы аналарды қуантып қана қоймай, ауданның әлеуметтік-экономикалық дамуына үлкен әсерін тигізді. Құрылыс заттарын сататын дүкендердің сауда айналымы артып, азаматтар жұмыспен қамтылды. Айта кетсек, ендігі салынып жатқан үйлер I, II топтағы мүмкіндігі шектеулі азаматтарға, жетім балалар мен әлеуметтік жағынан аз қамтылғандарға берілмек.
Шығыс Қазақстан облысы,
Зайсан ауданы
