Айдың күннің аманында орын алған табиғи қауіп-қатерден ауыл тұрғындары әлі ес жияр емес. Бәрі бірлесіп, дауылдан зардап шеккен отбасыларына хәл-қадерінше көмектесіп жатыр.
«Табиғи апаттың қашан келетінін тап басып айту қиын. Ауыл мектебінің шатырын алай-түлей жел стадионға дейін сүйреп әкеткен. Одан бөлек 2-3 тұрғын үйдің төбесінің шифры көшені жауып қалған. Қуанышқа орай, зардап шеккен ешкім жоқ. Құлаған ағаштардан көшені тазартып жатырмын», дейді ауыл әкімі Айдархан Мырзақасым.
Өкінішке қарай, заң аясында жекеменшік үйлерге мемлекет тарапынан ешқандай көмек көрсетілмейді. Кеткен шығынды үй иелері өздері көтереді. Аудандық төтенше жағдайлар бөлімінің басшысы Ерсін Жағыпаров жақында арнайы комиссия құрылатынын айтты.
«Болған оқиғаға байланысты аудан әкімі арнайы комиссия құрып, келген шығынды есептейді. Акт жасалып, облыс орталығына жіберіледі. Әйтсе де, тұрғын үйлерге көмектесеміз деп айта алмаймыз. Ол мәселе заңда қарастырылмаған. Тек ауылдық білім мекемесін қайта қалпына келуіне жәрдемдесе аламыз», дейді Е.Жағыпаров.
