Аталған іс-шараның мақсаты – оқу орындарының түлектерін өздері қалаған саладағы бос жұмыс орындарына бейімдеу және бірнеше жұмыс берушілермен тікелей байланыс орнату мүмкіндігіне жол ашып беру. Іс-шараға сонымен бірге мүмкіндігі шектеулі жандар да қамтылған.
Бағдарлама арқылы жұмыспен қамтылып отырғандардың дені – жастар. Екі жарым ай ішінде компьютерлік дизайнмен қатар камерамен жұмыс істеудің қыр-сырын жете меңгерген Саясат Бексұлтан марапатқа ие болып, бағдарлама иелеріне алғысын білдіріп: «Жүргізіліп отырған бастама арқылы көптеген дағды үйренуге мүмкіндік ашылды. Камерамен жұмыс істеуді үйреніп, басқа да жұмыс түрлерімен таныстым. Баршаңызға алғысымды жеткіземін», деді ағынан жарыла.
Ал қалаған саласы бойынша жұмыспен қамтылып, қошеметке ие болған Алтынай есімді қыз: «Алғаш жұмысқа кіріскенде ешнәрсе түсіне алмадым. Ал қазір камерамен бейнабаян түсіруді меңгердім. Көзімнің аздап ақауы болса да, бұл маған кедергі келтірген жоқ. Шавкат мырзаның көмек қолын созғанына алғысымды білдіремін. Жоғары кәсіби мамандардың арқасында оқу курсын да тез бітірдім, өйткені бәрі қолжетімді, жеңіл әрі түсінікті болды», деп ризашылығын білдірді.
