Ефрейтор Тілек Құмарбеков Ішкі істер министрінің орынбасары, Ұлттық ұлан Бас қолбасшысы атынан «Ұлттық ұлан қызметінің үздігі» төсбелгісімен және «Шығыс» өңірлік қолбасшылығы қолбасшысының құқығымен «Қоғамдық тәртіпті сақтағаны үшін» төсбелгісімен марапатталды.
Ағысы қатты адуынды өзенге қойып кете салу оңай емес. Қол созым жерде болса бір сәрі, жүзіп барып, баланы жағаға шығаруға да жүрек керек. Мұндайда екінің бірі өз өмірін қатерге тіге бермейді.
Оқиға қалай болған дейсіз ғой. Баяндайық. Шіліңгір шілденің аяқ тұсы. Үлбіге шомылып жүріп, батып бара жатқан баланы көріп қалған 3477 әскери бөлімінің ефрейторы Тілек Құмарбеков дереу көмекке асығады. Баланың қолынан ұстап, әупірімдеп жағаға шығарып үлгергені сол еді, кенет өзі су жұтып, тұншыға бастайды. Баланы құтқарып үлгергенімен өзі өзенге батып бара жатқанын көрген жағадағылар көмекке келіп, Тілектің өзін өзеннен шығарып алады. Су жұтқан ол есінен танып қалады. Жағажайдағылар жедел жәрдем шақырып, медициналық көмекке жүгінеді. Сөйтіп, екеуі де аман қалады.
Міне, Т.Құмарбековті қалай ғана бейбіт күннің батыры демейміз?! Осыған орай Өскемендегі 3477 әскери бөлімінде батырдың қайсарлығын жеке құрам алдында ұлықтап, салтанатты іс-шара өтті. Жиынға бөлім басшылығымен қатар Тілектің ата-анасы да қатысты.
– Қадірменді офицер мырзалар, әскери бөлімнің басшылығы! Баламның батыл әрекетін батырлыққа балап, жоғары баға беріп, құрметтеп жатқандарыңызға үлкен алғыс айтқым келеді, – деді батыр жігіттің әкесі Амантай Құмарбекұлы.
Айта кетсек, маусымда тағы осы 3477 әскери бөлімінің жауынгері, сержант Ризабек Қанапиянов көрші үйді өрт шарпығанын байқап, үй ішінен қарияны аман-есен алып шыққан еді. Ризабектің ерлігі де елеусіз қалған жоқ.
Шығыс Қазақстан облысы
