Іс-шара ең алдымен Батыс Қазақстан облысы дизайнерлер қауымдастығы мүшелерінің қолөнерлері ұсынылған көрмеден бастау алды. Көрмеге қазақтың ұлттық бұйымдары, қолдан жасалған сөмкелер, үй тоқымалары, құрақ көрпелер қойылды. Батыс Қазақстан облысы дизайнерлер қауымдастығының төрайымы Әсем Сырымованың жетекшілігімен қыз баланың қартайғанға дейінгі өмір кезеңдерін қамтып, қай кезде қандай орамал тағу керектігі шағын қойылыммен көрсетілді.
«Қоғамдық келісім» КММ басшысы Медхат Қамбетов пен облыстық ҚХА Аналар кеңесінің төрайымы Шалқыма Құрманалина өз сөздерінде халқымыз үшін ақ орамалдың қадір-қасиеті мен маңызы аса жоғары болғанына тоқталса, облыстық Іскер әйелдер кеңесінің төрайымы Ляна Тұрсынова ақ орамалдың құндылықтары хақында сөз қозғады. Сондай-ақ оның қазақ халқының дәстүрінде үлкен рөл атқаратындығын атап көрсетті.
Жалпы, ақ түсті жаулықтың қазақ мәдениетіндегі, тұрмысы мен тарихындағы философиялық мағынасы – ақ түс тазалықтың, ізгіліктің, аманатқа адалдықтың белгісі екендігі жөнінде кеңінен әңгімеленді. Қазіргі кезде заманауи үлгіде әдемі етіп тағу жолдарының көп екендігі де тілге тиек етілді. Соңында мерекелік іс-шараға өз үлестерін қосқан Батыс Қазақстан облысы дизайнерлер қауымдастығының мүшелеріне Алғысхат тапсырылды.
Рафхат ХАЛЕЛОВ
ОРАЛ
