Суретті түсірген Ерлан ОМАР, «EQ»
Қолданылуға тиісті ағаш сүрегінің жалпы көлемі елде 127 млн текше метр болса, соның 15 пайызы Солтүстік Қазақстан облысына тиесілі. Оны қорғау, күзету, өсіру, өрттен сақтау жұмыстарымен облыстың орман шаруашылықтарындағы 800-дей адам айналысады. Жеріміздің «жасыл байлығы» деп саналатын бұл саланы аман сақтау әрбір азаматты толғандырады. Кесілген ақ қайыңдарды көргенде жүрегі шым етпейтін адам жоқ шығар. Бірақ кесілген ағаштың орнына жаңа түп егілетінін қалың көпшілік біле бермейді.
Жақында облыстағы орман шаруашылығының құрылғанына 75 жыл толуы салтанатты іс-шарамен аталып өтті. Жиында сөйлеген сөзінде Солтүстік Қазақстан облысы әкімінің орынбасары Сәтжан Аблалиев Мемлекет басшысы Қасым-Жомарт Тоқаевтың жалпы еліміз бойынша бес жылдың ішінде 2 млрд түп ағаш отырғызу жөнінде тапсырма бергенін еске салды. «Соның ішінде біздің облыс 100 млн түп ағаш отырғызуымыз керек. Облыс әкімдігі осы жұмыстарды атқаруға барлық жағдайды жасап отыр. Соңғы жылдары ғана орман шаруашылықтарына жарты млрд теңге қаражат бөлінді. Алдағы уақытта шаруашылықтарға жасалатын қаржылай көмек арта береді», деді С.Аблалиев.
Орманшы қызметі жеңіл жұмыс емес. Қыстың қақаған аязы мен жаздың аптап ыстығында орманның күзеті мен қауіпсіздігін бақылап жүруді оңай шаруа дей алмайсыз. Оның үстіне ағаш егу маусымында танаптардағы өскіннің сәтті тамыр жайып кетуін бақылап, үнемі аттан түспей, шаруамен айналысып жүргені. Орман танаптарына тиісті жерлерді кейбір жер пайдаланушы шаруашылықтардың жайпап тастайтыны да соңғы жылдары үлкен мәселе болып отыр. Бұл орманның жайылуына кедергі келтіреді және оның құнарына шығатын жемістердің гүлденуіне мүмкіндік бермейді.
Облыстағы орман шаруашылығының мерейтойына орай көптеген еңбек сіңірген орманшыға мемлекеттік және ведомстволық марапаттар берілді. Соның бірі – М.Жұмабаев ауданындағы Булаев орман шаруашылығында қырық жылдан артық қызмет еткен Жұмағали Балпаңов. Ақсақал қазіргі орман шаруашылықтарының материалдық-техникалық базасы бұрынғыға қарағанда әлдеқайда қуатты екенін айтты. «Қазір барлық шаруашылықтарға кілең жаңа тракторлар, соқалар мен үлкен сыйымдылықтар алынған. Бұрын мұндайдың бірі болмайтын. Биыл барлық орманшыларды жаңа униформалармен де қамтамасыз етті. Осының бәрі – жергілікті биліктің орман қорғау мен өсіру ісіне қамқорлық көрсетіп жатқандығының белгісі. Бұл істі жоғарыдан қолға алған Президентке де ризамыз», деді ол.
Облыс әкімінің Құрмет грамотасымен марапатталғандардың арасында орманшылық қызмет өтілі 12 жыл болған Берік Қалықов та болды. Қазір ол Қызылжар орман шаруашылығы мемлекеттік мекемесінің директоры. Ол орманды сауықтыру, сақтау, қорғау мен молайту жұмыстарын бір мезгілде атқарып, үнемі ат үстінде жүретіндерін айтты. «Халық арасында ормандардың заңсыз оталып жатқаны туралы әңгіме көп. Ішінара ондайлардың болатыны жасырын емес. Біз олармен күресіп, соттасып та жатамыз. Кейбір орман алқаптарының жекешелендіріліп кеткені және олардың келісімшарт бойынша тек белгілі мерзімге дейін ғана профилін сақтайтындығы туралы шарт біздің жеңуімізге мүмкіндік бермейді. Бірақ мұндай құжаты жоқтарға сот арқылы түрлі шаралар қолданылып жатыр», деді ол.
Көздің көркі, табиғаттың сұлу пішіні – жасыл байлықтың азып-тозбауына барлық адам мүдделі. Оттегін шығарып, көкірек көзін ашатын таза ауаның тұрағы да жасыл орман. Сондықтан адамдардың бәрі олардың қорғалуына жанашырлықпен араласуы керек.
Солтүстік Қазақстан облысы
