Көрмеге суретшінің 90-нан аса туындысы қойылды. Оның көбі автордың биыл салған еңбектерінен құралып, арнайы тақырыптарға бөлінген. Әр тақырыптың көтеріп тұрған жүгі жеңіл емес болса да, бәрі де – ұлттық болмысымызды айшықтаған арнаға тоғысады. Әсіресе жас таланттың психологиялық портреттері айтар ойының тереңдігімен, бояуының көркемдігімен ерекшеленеді. Біз көбінесе қоғамдағы кез келген құбылыстың сыртқы бейнесіне мән береміз де, ішкі әлеміне жіті үңілмейміз. Негізі, осы дұрыс па? Ал суретшінің осы портреттерін көргенде, сыртқы әсемдікке деген құштарлығыңыз, ойыңыз, көзқарасыңыз өзгереді. Сіз оны енді басқаша түйсінесіз. Бұл картинаның астарында қазіргі мың құбылған уақытта адамдық шынайы болмысымызды, қасиетімізді қалай сақтап қала аламыз деген терең философиялық ой жатыр. Суретші соны меңзейді. Сондай-ақ «Атамекен» атты триптих мүсінінде қазақтың қазыналы қариясы арқылы – жұмыр жердің бетінде ата-бабаның қаны тамған жерден артық ел жоқ екенін бояу түсімен көркем жеткізген. Ал «Уақыт және құн» атты сериясымен салған еңбектерінде алғашқы ұлттық теңгемізде жарияланған айтулы тұлғаларымыздың бейнесі айшықты бейнеленген. Сонымен қатар қазақы отбасылық құндылықты дәріптеген туындылары да келушілерге мазмұнды ой салды. Мәдени іс-шараның ашылуында белгілі суретші Сембіғали Смағұлов жас таланттың шығармашылығы туралы парасатты ой қорытты.
«Сонау тоқсаныншы жылдардағы қиыншылық кезеңде бейнелеу өнерінің дамуы кішкене бәсеңдеп қалды. Өйткені оған сол кездегі күрделі жағдайдың әсері тиді деп ойлаймын. Әйтпесе бейнелеу өнерімізге сонау алпысыншы жылдардан бастап, лек-лек талантты жастар келіп, ұлттық өнерімізді биікке көтерді. Сол үрдіс аздап үзіліп қалғандай болып еді. Енді, міне сол, қайта жанданып, қазір бейнелеу өнеріне дарынды жастар көптеп келіп жатыр. Соның бел ортасынан Оралбек Қабөкені көремін. Бүгін біз оның елді қуантқан көрмесінің куәсі болып отырмыз. Талантты суретшінің әр жұмысынан ұлттық бояуға бай қолтаңбасы айшықталып тұрады. Оны ешкімге ұқсата алмайсыз. Ізденгіш, айтар ойы да терең», деп көрме иесіне жылы лебізін білдірді. Одан кейін сөз алған танымал қылқалам шебері Лейла Махат Оралбектің өмірге өзгеше қарайтын суретші екендігін атап өтті. «Ол халқымыздың тарихы мен салт-дәстүрін жақсы біледі. Бір жағынан, шығармаларынан өнерге адалдығы көрінеді», деп лайықты бағасын берді.
Бүгінде Оралбек Қабөкені көзіқарақты қауым заманауи дарынды суретшілердің бірі ретінде жақсы біледі. Ол Т.Жүргенов атындағы Қазақ ұлттық өнер академиясын тәмамдаған. Бірқатар республикалық және халықаралық байқаудың жүлдегері. 2010 жылы «Шетелдегі қазақ жастары және ана тілі» атты халықаралық өнер фестивалінде топ жарса, Қазақ хандығының 550 жылдық мерейтойына арналған республикалық «Каспий көкжиегі» атты суретшілердің байқауында бас жүлдені иеленген.
Іс-шара соңында Оралбек Қабөке көрмеге қойылған жұмыстарына қысқаша шолу жасады.
«Бұл көрменің «Бейне» деп аталуы тегін емес. Өйткені ол менің шығармашылық бейнем ғана емес, қоғамдағы әр құбылысты жан-дүниемнен сезініп өткізген бейнелердің жиынтығы десем болады. Көрмеге қойылған картиналарымның денін биыл салдым. Біз қазір уақытпен жарысып күн кешеміз. Әрбір өнер адамы өзі өмір сүрген уақытты бедерлейді. Мен де ұлттық бейнеден ажырамай, өз дәуірімнің келбетін сомдап, халқымның болмысы мен ерекшелігін бейнелесем», деген мақсат-мүддесін айта келіп, осы көрмені өткізуге мұрындық болған Ұлттық музей ұжымы мен жиналған жұртшылыққа алғысын айтты.
