Экономика • 27 Қараша, 2022

Кетігін тапқан кәсіпорын

213 рет
көрсетілді
3 мин
оқу үшін

Өңірде құрылыс жұмыстары жыл өткен сайын қарқын алып келеді. Ең бастысы, құ­ры­лысқа қажетті өнімдер өзімізде өндіріле бастады. Мұ­ның үлкен маңызы бар. Өйт­кені алыс-жақын шет­елдерден тасымалданатын, кейде қасқалдақтың қанын­дай таптырмайтын, бағасы удай қымбат өнімдерге енді мұқтаж болмаспыз.

Кетігін тапқан кәсіпорын

Соңғы жылдары құрылыс саласына қажетті кірпіш облыста молынан өндіріле бастады. Бұрыннан жұмыс істеп келе жатқан кәсіпорындарға заманауи жабдықтармен толық жарақ­тандырылған, сапалы өнім шығара­тын жаңа өндіріс орындары қосылып жатыр. Бұл облыстың құрылыс саласын­дағы әлеуетін арттырып, қанатын кеңге жаюға мүмкіндік береді.

Аршалы ауданындағы Волгодо­новка ауылындағы «SG BRICK» кірпіш зауыты – Орталық Азияда теңдесі жоқ кәсіпорын. Бұл кәсіпорын «G-Park» құрылыс компаниясы тобының құра­мына кіреді. Зауыт іргедегі елорданы ғана емес, еліміздің бірқатар өңірін сапалы өніммен қамтамасыз етпек.

Өнеркәсіп секторы өңір экономикасында басым сала болып табылады. Салаға серпін беретін жаңа жобалардың жүзеге асырылуы көңілге қуаныш ұялатып, ел көкірегіндегі сенімді нығайта түседі. Жаңа зауыттың іске қосылуы облыстағы кірпіш өндірісін екі есеге арттырып отыр.

Зауыт құрылтайшысы, «G-Park» ЖШС құрылыс компанияла­ры тобы­ның бас директоры Ғабит Сат­ма­ғамбетовтің айтуынша, компа­ния бұған дейін отандық өнімдер­мен салыс­тырғанда бағасы едәуір қым­бат тұра­тын құрылыс материалдарын Өзбек­стан, Украина, Ресейден жет­кізу­­ші­лермен өзара ынтымақтастық қарым-қатынас жасаған. Әрине, сырттан тасы­мал­данған материалдар салын­ған нысан­ның шаршы метрінің өзіндік құны­­ның біршама өсіп кетуіне әсер етеді.

– Мен біртіндеп импорттан бас тартып, өз зауыттарымды салу туралы жауапты шешім қабылдадым. Жылжымайтын мүліктің түпкі құны төмен болуы үшін көптеген құрылыс компаниялары сапалы әрі арзан құрылыс материалдарын қажет етеді, – дейді Ғ.Сатмағамбетов.

Сапалы керамикалық кірпіш әлемге әйгілі «Beralmar» компаниясының испан технологиясы бойынша өндіретін зауыттың жанында жалпы ауданы 161 гектарды алып жатқан карьер бар. Бұл жерден қызыл және сары саз шығарылады. Жылу тасымалдағыш ретінде өндірісте табиғи газ пайдаланылады. Газдың жылдық қажеттілігі – 18 млн текше метр. Бүгінде компания кірпішті бояу өндірісін жолға қоюда. Қазір бояулардың бірнеше түрі қолданыла бастады. Ыстыққа төзімді және су өткізбейтін 27 үлгісі алынды.

Жаңа өндіріс дегеніміз – ең алды­мен жергілікті еңбек адамдарын жұ­мыспен қамту. Кәсіпорында 250 жұ­мыс орны ашылады. Осы орайда жа­қын маңайдағы ауылдардан жұ­мыс­шылар тарту көзделіп отыр. Тұ­рақ­­ты еңбекақы алатын болған­дықтан, ауыл тұрғындарының да әлеуметтік-тұр­мыстық жағдайы жақсармақ. 

Зауыт жылына 120 млн дана кір­піш шығаруға қабілетті. Бұл жоба Ин­дустрияландырудың бірыңғай картасы аясында жүзеге асырылуда. Жобаның құны – 27 млрд теңге. Биыл шілде айында пайдалануға берілді.

– Кірпіш зауыты бір жарым жыл­дың ішінде түгел салынып бітті, – дей­ді зауыт директоры Асхан Қабыл­дин, – қазір бірнеше түрлі кірпіш дайын­дау­дамыз. Ғимаратты қаптауға қажетті кір­пішке сұраныс мол.

Қазір зауытта өнім өндіру қарқын­ды жүргізілуде. Өндірілген өнім сапа­­сы сынақтан өткізіліп, жақсы баға­­сын алған. Дәл осындай қуатты кәсіп­­орындар жарқын болашақтың құры­лыстарын көркейте түсетіні сөзсіз.

 

Ақмола облысы  

Соңғы жаңалықтар

Су үнемдейтін қондырғы

Технология • Кеше