Суретті түсірген Ерлан ОМАР, «EQ»
Іс-шара басталмас бұрын келушілер музейдің ұйымдастыруымен ежелгі экспонаттардан тұратын «Тараздың жауһар жәдігерлері» атты жылжымалы көрмені тамашалады. Басқосуда алғаш сөз алған «Ежелгі Тараз ескерткіштері» тарихи-мәдени музей-қорығының директоры Берік Жүсіп Таисия Сенигованың жарты ғасыр бұрын жарық көрген монографиясын қазақ тіліне аударып, Тараз жұртын төл мәдениетімен, археологиялық мұраларымен таныстыру керектігін тіліне тиек етті. Сондай-ақ конференция барысында «Тараз қалашығының археологиялық зерттелуі», «Тараз қалашығын зерттеген көрнекті археологтер жайындағы естеліктер», «Жамбыл облысының археологиялық экспедицияларының далалық материалдары» және «Т.Н.Сенигованың «Ортағасырлық Тараз» монографиясы – Оңтүстік Қазақстанның ортағасырлық қалаларын зерттеудің негізі» секілді өзекті тақырыптар талқыланды.
Конференция барысында Мадияр Елеуов, Жұман Смайлов, Дөкей Тәлеев, Серік Ақылбек, Ералы Ақымбек, Борис Железняков, Мәмбет Шағырбаев, Сауран Қалиев баяндама жасады. Іс-шараға Таисия Сенигованың қызы Инна Бочкарева Мәскеуден бейнебайланыс арқылы қосылып, ұйымдастырушыларға алғысын жеткізді.
ТАРАЗ
