Саланың ресми өкілі Айбек Смадияровтың айтуынша, биылғы 12 қаңтарда Премьер-министрдің орынбасары – Сыртқы істер министрі Мұхтар Тілеубердінің төрағалығымен Сыртқы істер министрлігі алқасының отырысы өткен. Онда сыртқы саясат ведомствоның 2022 жылғы қызметінің қорытындылары шығарылып, ағымдағы сын-қатерлер мен алдағы кезеңге арналған жұмыс бағыты айқындалды.
«2023 жылғы 12-13 қаңтарда Мехико қаласында Мексиканың Сыртқы істер министрі Марсело Эбрардтың сол елде аккредиттелген дипломатиялық корпуспен 34-ші жыл сайынғы кездесуі өтті. Министр Марсело Эбрард өз сөзінде биылғы мақсаттар туралы айтып, 2023 жылы Мексика бес жаңа елшілік, оның ішінде Қазақстанда да елшілік ашатынын ресми түрде жариялады. Қазақстан Мексика үкіметінің шешімін құптайды және Мексиканың Астанада елшілігін ашуға қажетті көмек көрсетуге дайын», деді А.Смадияров.
Сондай-ақ спикер 2023 жылғы 16 қаңтарда Швейцарияның Давос қаласында Дүниежүзілік экономикалық форумның жыл сайынғы отырысы басталғанын хабарлады. Айта кетерлігі, іс-шара 2023 жылғы 20 қаңтарға дейін жалғасады. Форумның тақырыбы – «Бөлінген әлемдегі ынтымақтастық». Қазақстан тарапынан осы іс-шараға Стратегиялық жоспарлау және реформалар агенттігінің төрағасы Әсет Ерғалиев қатысады.
«18-20 қаңтар аралығында XV Дүниежүзілік азық-түлік және ауыл шаруашылығы форумы мен «Жасыл апта-2023» халықаралық көрмесіне қатысу үшін министр Ербол Қарашөкеев бастаған Ауыл шаруашылығы министрлігі делегациясының Берлинге сапары жоспарланған. Халықаралық «Жасыл апта» – ауыл шаруашылығы, азық-түлік өндірісі және бау-бақша саласындағы ең ірі халықаралық көрме-жәрмеңке. Ол 1926 жылдан бері Берлинде жыл сайын өткізіліп келеді. Іс-шара аясында қазақстандық тарап халықаралық азық-түлік индустриясының озық технологиялық әзірлемелерімен және өнімдерімен танысады», деді А.Смадияров.
Сондай-ақ брифинг барысында шетелде құлдыққа түскен қазақстандықтар мәселесі де сөз болды. Кейінгі кезде «алтын үшбұрыш» деп аталатын Оңтүстік-Шығыс Азия аумағында (Мьянма, Лаос және Таиланд) қазақстандықтардың құлдыққа түсуі туралы ақпарат жиі тараған-ды.
«Алдын ала сөз байласқан халықаралық қылмыстық топтар, көбінесе үшінші тарап – әлеуметтік желілер арқылы Қазақстан азаматтарын Таиланд аумағында орналасқан компанияларға жұмысқа шақырады. Таиландқа келгеннен соң түрлі желеу айтылып, азаматтар алаяқтық жолмен Мьянма аумағына жеткізіледі. Оны кейін түсінген отандастарымыз қайта елге оралуға ниет білдірген жағдайда, компания олардан 5-10 мың доллар төлеуді талап етеді. Осыған байланысты, мұндай соманың болмауына орай, қазақстандықтар қытайлық компанияларда жұмыс істеуге мәжбүр болады.
Мәлім болғандай, жәбірленушілер Еуропа мен Америка азаматтарынан алаяқтық жолымен ақша шығаруға машықтанған қылмыстық компанияларға көбінесе аудармашы болуға немесе клиенттермен жұмыс істеуге қабылданады. Жұмыстан бас тартқан жағдайда, азаматтарды басқа ұқсас қылмыстық компанияларға 5-7 мың долларға сатып жібереді. Бұған қоса, зорлық-зомбылықпен, психикалық қысым, тамақ бермеу секілді әдістермен қорқытады», деді А.Смадияров.
Осы орайда, Қазақстанның Таиланд және Вьетнамдағы елшіліктері осы мәселені толық шешу мақсатында Таиландтың, Лаостың және Мьянманың құқық қорғау органдарымен және сыртқы саясат ведомстволарымен тұрақты байланыста екенін айта кеткен жөн. Сондай-ақ бұл үдеріске Таиландтағы халықаралық үкіметтік емес ұйымдар да жұмылдырылған.
