Сайлау ағаны мен бала күнімнен білемін. Өйткені біздің кішкентай күнімізде ауылға, әсіресе жаз кезінде облыстық «Шертер» фольклорлық-этнографиялық ансамблі жиі келіп, концерт қоятын. Сонда шыбықты ат қылып мініп жүрген біздер «ауылға концерт келді», деп үй арасына шапқылап қуанатынбыз. Бір жағынан, ол кісі – жерлесіміз. Сондықтан ауылдастары оның әсем әнін ғана емес, қазақы кең пішілген болмысы мен ақкөңіл мінезін де жақсы көрді. Содан кешке концерт басталады. Шағын клубтың іші көрерменге лық толады. Сахнада «Шертердің» шеберлері кезектесіп шығып, өнерлерін көрсетеді. Ал біз Сайлау ағаны тағатсыздана күтіп отырамыз. Ол шыққан кезде... Клубтың ішінен масаның да ызыңы естілмейді. Бәрі қалт тына қалады. Ағамыз кең құлашты дауысымен халық әндерімен бірге, эстрадалық туындыларды қатар орындап, ауылдастарының ыстық ықыласына бөленеді. Әсіресе ол ақын Айсұлу Қадырбаеваның сөзіне жазылған, композитор Темірәлі Бақтыгереевтің «Барып қайт, балам, ауылға» атты туындысын керемет орындаушы еді. Бұл әнді Тұңғышбай Жаманқұловтың орындауында теледидардан естігенбіз. Сонда да Сайлау аға өзгеше айтады. Мұңлы сазбен өрілген ән жан дүниеңді қозғап, өзге бір күйге бөлейді. Сол кезде алдыңғы қатардағы ата-әжелеріміз көздеріне жас алып, кешегі өздерінің қолында өскен баланың елге танылған әнші болғанына риза болып, марқайып отыратын.
Жасы үлкендердің айтуынша, әншінің әкесі Ордабай ақсақал соғыс жылдарында ұжымшар басқарып, елдің алғысын алған азамат. Сонымен бірге ол кісі атбегі, сері мінезді адам болған. Содан да болар, оның балаларының бәрі шетінен өнерлі. Кез келген музыкалық аспапта шебер ойнайды. Алайда солардың арасынан өнер жолын Сайлау аға ғана қуды. Оған да бір себеп бар. 1971 жылы жаңадан шаңырақ көтерген облыста «Торғай әуендері» атты аймақтық фестиваль ұйымдастырылады. Сонда Отан алдындағы азаматтық борышын енді өтеп келген жиырма бір жастағы жігіт алғаш ән айтып, байқаудың бас жүлдесін иеленеді. Сонымен бірге Алматыдағы республикалық фестивальге жолдама алды. Торғай облысынан жалғыз өзі барған ол сол кездегі астанамыздың ең үлкен сарайында ән салып, Кәукен Кенжетаев, Бекен Жылысбаев секілді өнер тарландарының батасына ие болды. Олар талапты жастың табиғи дауысы зор екенін байқап, консерваторияға оқуға шақырады. Алайда сол жылдары Торғай облыстық партия комитетінің үшінші хатшысы болып істеген, руханият жанашыры Өзбекәлі Жәнібеков оған өнерге келуге бағыт сілтеп, 1972 жылы Арқалық қаласындағы Серәлі Қожамқұлов атындағы музыкалық драма театрына орналастырады.
Сайлау Ордабаевтың өнердегі жолы 1974 жылы бұрынғы Торғай облысы филармониясы жанынан құрылған «Шертер» фольклорлық-этнографиялық ансамблімен тікелей байланысты. Осы ансамбльдің құрамында өнер көрсеткен оның даңқы елге бірден жайылды. Бұл өнер ордасы да Өзағаңның ықпалымен құрылған.
«Шертерді» халық жақсы көрді. Қазірде фольклорлық ансамбльдер жетерлік, бірақ олардан тарсыл-гүрсіл дыбыстар мен металдың үні құлақ жарады. «Шертерде» ондай бөгде дыбыс болған емес. Таза музыкалық аспаптардың үні естілетін. Өнерпаздар ұрмалы аспаптағы ырғақты ұстап, сүйемелдеп отыратын. Ансамбльдің репертуары да бай болды. Оны Өзбекәлі ағаның өзі қадағалады. Әсіресе ол кісі халық ән-күйі мен жергілікті өңірге арналған туындыларды айтуға мән берді. Кейін ансамбль белгілі әнші Сайлау Ордабаев, композитор Қалибек Деріпсалдин, күйші Әбжан Сәрсенбаевпен толықты. Ауылдарды жиі аралаймыз. Ел адамдары бізді құрақ ұшып қарсы алып, жаны қалмай күтеді. Ән-күйімізді ұйып тыңдайды. Осылай «Шертердің» аты Торғайға ғана емес, Қазақстанға танылды», деп еді бір сұхбатында осы ансамбльдің мүшесі, биші Қазақстанның еңбек сіңірген әртісі Тойған Ізім.
Әйгілі әнші «Шертер» ансамблімен бірге Қазақстанда ғана емес, Үндістан, Иран, Жапония, Вьетнам, Филиппин, Корея, Ресей және тағы басқа мемлекеттерде гастрольдік сапарда болып, ұлттық ән өнерінің мерейін асырды. 1980 жылы Мәскеуде өткен Бүкіл дүниежүзілік жастар фестиваліне қатысып, дипломант атанды. 2004 жылы Қостанай облыстық меценаттар клубының «Қазына» сыйлығын иеленді. Ағамыз өмірінің соңғы жылдарында қатты науқастанып, сахнадан қол үзіп қалса да, өзінен кейінгі шыққан жастарға қамқор болды. Ардақты азамат 2007 жылы өмірден озды.
Жақында әлеуметтік желіге бір жерлесіміз Сайлау Ордабаев орындаған «Торғайды аңсау» атты әнін жүктепті. Бұл туынды қай жылдары шыққанын нақты білмеймін. Бірақ осы шығарманың музыкасын ұзақ жылдар бұрынғы Торғай облысының Мәдениет басқармасын басқарған, өзі де сан қырлы өнерлі азамат Жұмағали Өмірбеков жазыпты. Осы әнді тыңдап отырып, туған жерін шексіз сүйген біртуар әншінің қайталанбас дауысын естіп, көңілімді мұң басты.
