Тәрбие • 10 Ақпан, 2023

Ықыласты балаға үйірме көп

537 рет
көрсетілді
3 мин
оқу үшін

Қолы бостық, қарны тоқтық адамды аздырар болса, бұғанасы бекімеген бала үшін бұл қазір тіпті қауіпті. Интернет кеңіс­тіктегі толассыз ағылған ақпараттың ағы мен қарасын айыра алмай, жеткіншектердің арбалып, алданып қалатыны – осы бос уақытының назардан тыс қалуында. Сондықтан да мемлекет қазіргі кезде баланың уақыты зая кетпеуі үшін тегін үйірме, секцияларға ден қойғаны мәлім.

Ықыласты балаға үйірме көп

Осы орайда Қарағанды облысында тегін үйірме мен секциялар мыңдаған баланың бабы мен бағын сынауға мүмкіндік беріп келеді. Мәселен, Қарағанды аймағында биыл балалардың тегін спорт секцияларына 2 млрд 164 млн теңге қаржы бөлінді.

Қарағанды қаласындағы «Спор­тика» фитнес-клубында жүзу, хоккей, дзюдо және би үйірмелері бар. Клуб жетекшілерінің айтуынша, Artsport бағдарламасы іске қосылғанға дейін барлық секцияға қатысушылардың ұзын саны 170 адам шамасында болыпты. Кейін бағдарлама негізінде мемлекеттік қаржыландырудан соң клубта жүзуге келген бала саны 527-ге жеткен екен.

вар

– Қазір жүзуге – 527, хоккейге – 271, биге – 15, дзюдоға 17 адам келеді. Бәрі – тегін. Хоккей­ші­ле­ріміздің нәтижелері көңіл көн­ші­теді. Олар – Қазақстан чем­пио­наттарының жүлдегерлері. Сон­дай-ақ басшылықтың бастамасымен бізде 10 ерекше бала тегін жаттығады, – дейді фитнес-клуб әкімшісі Юлия Ульянова.

Бауыржан Қасымовтың шах­мат академиясы да жас шахмат­шылардың басын қосқан. Мұнда Аrtsport бағдарламасы және ақылы негізде шахмат сабақтары өтеді. Бұған дейін мектептің үш филиалында 200 адам дәріс алған көрінеді. Қазір олардың қатары мыңдап саналады.

ыяар

– Ал Artsport бойынша жұ­мыс істей бастағаннан бері оқу­шылар саны мыңнан асты. Бұл бағдарламаға дейін көптеген бала секция, үйірмеге қатыса алмай кел­гені белгілі. Өйткені оның бәрі ақылы еді. Қазір бізде 500-700-ге жуық адам – кезекте. Бізден жал­пы 5 мыңнан аса адам оқып шық­ты. Бес жыл қатарынан академия Қарағанды облысының ең мықты мектебі ретінде танымал. Біздің тәрбиеленушілеріміз – рес­публикалық, халықаралық жарыс­тардың жеңімпаздары мен жүлдегерлері, Әлем чемпионат­тарының қатысушылары. Бағ­дарлама көмегімен біз Сұрыптау, При­шахтинск және серіктес қа­ла­­­ларда филиалдар ашуды жос­парлап отырмыз, – дейді шахмат академиясының бас бапкері және оның негізін қалаушы Б.Қа­сымов.

«Аманат» футбол клубындағы баланың саны да өскен. Бұрын са­наулы бала келсе, бүл күні 220 адам тегін жатығып жүр.

– Біз де алдымен, ақылы не­гізде жұмыс істедік. Ол уақытта ықылас білдірген бала аз. Топта барлығы 10 балаға дейін ғана болатын. Бес жаттықтырушы жұмыс істеді. Жан басына қаржыландыру бағдарламасы арқылы балалар мен жаттықтырушылар саны кө­бейді. Қазір бізде ваучерлер бо­йынша 13 топта 220 адам тегін жат­тығады. Сондай-ақ 20-ға жуық бала мектептің бастамасымен те­гін айналысады, олардың 10-ы – көп балалы отбасынан, – дейді футбол мектебінің жетекшісі Андрей Миронов.

Спорт секцияларын ұйымдас­тыруға өңірде Қарағанды, Темір­тау, Балқаш, Қарқаралы, Шах­тинск, Саран, Бұқар жырау, Осака­ров, Абай және Шет аудандарынан 48 спорт қызметін ұсынушылар жұмылдырылып отыр.

 

Қарағанды облысы